Mahabharata · Chapter 7.61

dilīpaṃ cāpi rājendra mṛtāṃ sṛñjaya śuśruma /
yasya yajñaśateṣvāsanprayutāyutaśo dvijāḥ //

tantrajñānārthasampannā yajvānaḥ putrapautriṇaḥ / svacchandāḥ puṇyagandhāśca subhakṣā hemamālinaḥ /
yasya karmāṇi bhūriṇi kathayanti manīṣiṇaḥ //

ya imāṃ vasusampūrṇāṃ vasudhāṃ vasudhādhipaḥ /
ījāno vitate yajñe brāhmaṇebhyo hyamanyata //

rājāno vitate yajñe upahārānupāharan / dilīpasya tu yajñeṣu kṛtaḥ panthā hiraṇmayaḥ /
taṃ dharma iva kurvāṇāḥ sendrā devāḥ samāgaman //

sahasraṃ yatra mātaṅgā agacchanparvatopamāḥ /
sauvarṇaṃ cābhavatsarvaṃ sadaḥ paramabhāsvaram //

rasānāṃ cābhavankulyā bhakṣyāṇāṃ cāpi parvatāḥ /
sahasravyāmā nṛpate yūpāścāsanhiraṇmayāḥ //

caṣālapracaṣālau ca yasya yūpe hiraṇmayau /
nṛtyantyapsaraso yatra ṣaṭ्sahasrāṇi sapta ca //

yatra vīṇāṃ vādayati prītyā viśvāvasuḥ svayam /
sarvabhūtānyamanyanta mama vādayatīti tam //

rāgakhāṇḍavabhojyaiśca mattāḥ patiṣu śerate //

tadetadadbhutaṃ manye anyairna sadṛśaṃ nṛpaiḥ /
yadapsu yudhyamānasya cakre na paripetatuḥ //

rājānaṃ dṛḍhadhanvānaṃ dilīpaṃ satyavādinam /
ye'paśyanbhūridakṣiṇyaṃ te'pi svargajito narāḥ //

pañca śabdā na jīryanti dilīpasya niveśane /
svādhyāyaghoṣo jyāghoṣaḥ pibatāśnīta khādata //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //