Mahabharata · Chapter 7.6

karṇasya vacanaṃ śrutvā rājā duryodhanastadā /
senāmadhyagataṃ droṇamidaṃ vacanamabravīt //
duryodhana uvāca /

varṇaśraiṣṭhyātkulotpattyā śrutena vayasā dhiyā /
vīryāddākṣyādadhṛṣyatvādarthajñānānnayājjayāt //

tapasā ca kṛtajñatvādvṛddhaḥ sarvaguṇairapi /
yukto bhavatsaśro goptā rājñāmanyo na vidyate //

sa bhavānpātu naḥ sarvāndevāniva śatakratuḥ /
bhavannetrāḥ parāñjetumicchāmo dvijasattama //

rudrāṇāmiva kāpālirvasūnāmiva pāvakaḥ /
kubera iva yakṣāṇāṃ marutāmiva vāsavaḥ //

vasiṣṭha iva viprāṇāṃ tejasāmiva bhāskaraḥ /
pitṝṇāmiva dharmendro yādasāmiva cāmburāṭ //

nakṣatrāṇāmiva śaśī ditijānāmivośanāḥ /
sarveṣāmiva lokānāṃ viśvasya ca yathā kṣayaḥ //

viśvotpattisthitilaye śreṣṭho nārāyaṇaḥ prabhuḥ /
evaṃ senāpraṇetṝṇāṃ mama senāpatirbhava //

akṣauhiṇyo daśaikā ca vaśagāḥ santu te'nagha /
tābhiḥ śatrūnprativyūhya jahīndro dānavāniva //

prayātu no bhavānagre devānāmiva pāvakiḥ /
anuyāsyāmahe tvā'jau saurabheyā ivarṣabham //

ugradhanvā maheṣvāso divyaṃ viṣphārayandhanuḥ /
dṛṣṭvā bhavantaṃ saṅgrāme nārjunaḥ prahariṣyati //

dhruvaṃ yudhiṣṭhiraṃ saṅkhye sānubandhaṃ sabāndhavam /
jeṣyāmi puruṣavyāghra bhavānsenāpatiryadi //
sañjaya uvāca /

evamukte tato droṇaṃ jayetyūcurnarādhipāḥ /
siṃhanādena mahatā harṣayantastavātmajam //

sainikāśca mudā yuktā vardhayanti dvijottamam / duryodhanaṃ puraskṛtya prārthayanto mahadyaśaḥ /
duryodhanaṃ tato rājandroṇo vacanamabravīt //