Mahabharata · Chapter 7.5

rathasthaṃ puruṣavyāghraṃ dṛṣṭā karṇamavasthitam /
hṛṣṭo duryodhano rājannidaṃ vacanamabravīt //

sanāthamiva manye'haṃ bhavatā pālitaṃ balam /
atra kiṃ nu samarthaṃ yaddhitaṃ tatsampradhāryatām //
karṇa uvāca /

brūhi naḥ puruṣavyāghra tvaṃ hi prājñatamo nṛṣu /
yathā cārthapatiḥ kṛtyaṃ paśyate na tathetaraḥ //

te sma sarve tava vacaḥ śrotukāmā nareśvara /
nānyāyyaṃ hi bhavānvākyaṃ brūyāditi matirmama //
duryodhana uvāca /

bhīṣmaḥ senāpraṇetā'sīdvayasā vikrameṇa ca /
śrutena copasampannaḥ sarvairyodhagaṇaistathā //

tenātiyaśasā karṇa ghnatā śatrugaṇānmama /
suyuddhena daśāhāni pālitāḥ smo mahātmanā //

tasminnasukaraṃ karma kṛtavatyāsthite divam /
kaṃ tu senāpraṇetāraṃ manyase tadanantaram //

na vinā nāyakaṃ senā muhūrtamapi tiṣṭhati / āhaveṣu viśeṣeṇa bhraṣṭanetreṣvivāñjanam /
āhaveṣvāhavaśreṣṭha netṛhīneva naurjale //

yathā hyakarṇadhārā nau rathaścāsārathiryathā /
dravedyatheṣṭaṃ tadvatsyādṛte senāpatiṃ balam //

adeśiko yathā sārthaḥ sarvaḥ kṛcchraṃ samṛcchati /
anāyakā tathā senā sarvāndoṣānsamarcchati //

sa bhāvanvīkṣya sarveṣu māmakeṣu mahātmasu /
paśya senāpatiṃ yuktamanu śāntanavādiha //

yaṃ hi senāprametāraṃ bhavānvakṣyati saṃyuge / taṃ vayaṃ sahitāḥ sarve kariṣyāmo na saṃśayaḥ /
karṇa uvāca /

sarva eva mahātmāna ime puruṣasattamāḥ /
senāpatitvamarhanti nātra kāryā vicāraṇā //

kulasaṃhananajñānairbalavikramabuddhibhiḥ /
yuktāḥ śrutajñā dhīmanta āhaveṣvanivartinaḥ //

yugapanna tu te śakyāḥ kartuṃ sarve puraḥsarāḥ /
eka eva tu kartavyo yasminvaiśeṣikā guṇāḥ //

anyonyaspardhināṃ hyeṣāṃ yadyekaṃ tvaṃ kariṣyasi /
śeṣā vimanaso vyaktaṃ na yotsyanti hitāstava //

ayaṃ ca sarvayodhānāmācāryaḥ sthivaro guruḥ /
yuktaḥ senāpatiḥ kartuṃ droṇaḥ śastrabhṛtāṃ varaḥ //

ko hi tiṣṭhati durdharṣe droṇe śastrabhṛtāṃ vare /
senāpatiḥsyādanyosmācchukrāṅgirasadarśanāt //

na ca so'pyasti te yodhaḥ sarvarājasu bhārata /
droṇaṃ yaḥ samare yāntamanuyāsyati saṃyuge //

eṣa senāpraṇetṝṇāmeṣa śastrabhṛtāmapi /
eṣa buddhimatāṃ caiva śreṣṭho rājangurustava //

evaṃ duryodhanācāryamāśu senāpatiṃ kuru /
jigīṣanto surānsaṅkhye kārtikeyamivāmarāḥ //