મહાભારત · અધ્યાય 7.6

કર્ણસ્ય વચનં શ્રુત્વા રાજા દુર્યોધનસ્તદા ।
સેનામધ્યગતં દ્રોણમિદં વચનમબ્રવીત્ ॥
દુર્યોધન ઉવાચ ।

વર્ણશ્રૈષ્ઠ્યાત્કુલોત્પત્ત્યા શ્રુતેન વયસા ધિયા ।
વીર્યાદ્દાક્ષ્યાદધૃષ્યત્વાદર્થજ્ઞાનાન્નયાજ્જયાત્ ॥

તપસા ચ કૃતજ્ઞત્વાદ્વૃદ્ધઃ સર્વગુણૈરપિ ।
યુક્તો ભવત્સશ્રો ગોપ્તા રાજ્ઞામન્યો ન વિદ્યતે ॥

સ ભવાન્પાતુ નઃ સર્વાન્દેવાનિવ શતક્રતુઃ ।
ભવન્નેત્રાઃ પરાઞ્જેતુમિચ્છામો દ્વિજસત્તમ ॥

રુદ્રાણામિવ કાપાલિર્વસૂનામિવ પાવકઃ ।
કુબેર ઇવ યક્ષાણાં મરુતામિવ વાસવઃ ॥

વસિષ્ઠ ઇવ વિપ્રાણાં તેજસામિવ ભાસ્કરઃ ।
પિતૄણામિવ ધર્મેન્દ્રો યાદસામિવ ચામ્બુરાટ્ ॥

નક્ષત્રાણામિવ શશી દિતિજાનામિવોશનાઃ ।
સર્વેષામિવ લોકાનાં વિશ્વસ્ય ચ યથા ક્ષયઃ ॥

વિશ્વોત્પત્તિસ્થિતિલયે શ્રેષ્ઠો નારાયણઃ પ્રભુઃ ।
એવં સેનાપ્રણેતૄણાં મમ સેનાપતિર્ભવ ॥

અક્ષૌહિણ્યો દશૈકા ચ વશગાઃ સન્તુ તેઽનઘ ।
તાભિઃ શત્રૂન્પ્રતિવ્યૂહ્ય જહીન્દ્રો દાનવાનિવ ॥

પ્રયાતુ નો ભવાનગ્રે દેવાનામિવ પાવકિઃ ।
અનુયાસ્યામહે ત્વાઽજૌ સૌરભેયા ઇવર્ષભમ્ ॥

ઉગ્રધન્વા મહેષ્વાસો દિવ્યં વિષ્ફારયન્ધનુઃ ।
દૃષ્ટ્વા ભવન્તં સઙ્ગ્રામે નાર્જુનઃ પ્રહરિષ્યતિ ॥

ધ્રુવં યુધિષ્ઠિરં સઙ્ખ્યે સાનુબન્ધં સબાન્ધવમ્ ।
જેષ્યામિ પુરુષવ્યાઘ્ર ભવાન્સેનાપતિર્યદિ ॥
સઞ્જય ઉવાચ ।

એવમુક્તે તતો દ્રોણં જયેત્યૂચુર્નરાધિપાઃ ।
સિંહનાદેન મહતા હર્ષયન્તસ્તવાત્મજમ્ ॥

સૈનિકાશ્ચ મુદા યુક્તા વર્ધયન્તિ દ્વિજોત્તમમ્ । દુર્યોધનં પુરસ્કૃત્ય પ્રાર્થયન્તો મહદ્યશઃ ।
દુર્યોધનં તતો રાજન્દ્રોણો વચનમબ્રવીત્ ॥