Mahabharata · Chapter 7.57

aṅgaṃ ca pauravaṃ vīraṃ mṛtaṃ sṛñjaya śuśruma /
sahasraṃ yaḥ sahasrāṇāṃ śvetānaśvānavāsṛjat //

tasyāśvamedhe rājarṣerdeśāddeśātsamīyuṣām /
śikṣākṣaravidhijñānāṃ nāsītsaṅkhyā vipaścitām //

vedavidyāvratasnātā vadānyāḥ priyadarśanāḥ /
subhikṣācchādanagṛhāḥ suśayyāsanabhojanāḥ //

naṭanartakagandharvaiḥ pūrṇakairvardhamānakaiḥ /
nityodyogaiśca krīḍadbhistatra sma pariharṣitāḥ //

yajñe yajñe yathākālaṃ dakṣiṇāḥ so'tyakālayat /
dvipāndaśasahasrākhyānadātkāñcanasaṃvṛtān //

yaḥ sahasraṃ sahasrāṇi kanyā hemavibhūṣitāḥ // dhūryujāśvagajārūḍhāḥ sagṛhakṣetragośatāḥ /

śataṃ śatasahasrāṇi svarṇamālānatharṣabhān // gavāṃ sahasrānucarāndakṣiṇāmatyakālayat /

hemaśṛṅgyo raupyakhurāḥ savatsāḥ kāṃsyadohanāḥ // dāsīdāsakharoṣṭrāṃśca prādādājāvikaṃ bahu /

ratnānāṃ vividhānāṃ ca vividhāṃścānnaparvatān // tasminsaṃvitate yajñe dakṣiṇāmatyakālayat /

tatrāsya gāthā gāyanti ye purāṇavido janāḥ // aṅgasya yajamānasya api viṣṇupade vayam /

amādyadindruḥ somena dakṣiṇābhirdvijātayaḥ /
devamānuṣagandharvāṃścātyarocanta dakṣiṇāḥ //

aṅgasya yajamānasya svadharmādhigatāḥ śubhāḥ /
guṇottarāstu kratavastasyāsansārvakāmikāḥ //

sa cenmamāra sṛñjaya caturbhadratastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //