Mahabharata · Chapter 7.56

suhotraṃ nāma rājānaṃ mṛtaṃ sṛñjaya śuśruma /
ekavīramaśakyaṃ tamamarairabhivīkṣitum //

yaḥ prāpya rājyaṃ dharmeṇa ṛtviṅmantripurohitān /
sammānya cātmanaḥ śreyaḥ pṛṣṭvā teṣāṃ mate sthitaḥ //

prajānāṃ pālanaṃ dharmo dānamijyā dviṣajjayaḥ /
etatsuhotro vijñāya dharmyamaicchaddhanāgamam //

dharmeṇārādhayandevānbāṇaiḥ śatrūñjayaṃstathā /
sarvāṇyapi ca bhūtāni svaguṇairanvarañjayat //

yo bhuktvemāṃ vasumatīṃ mlecchāṭavikavarjitām /
yasmai vavarṣa parjanyo hiraṇyaṃ parivatsarān //

hairaṇyāstatra vāhinyaḥ svairiṇyo vyavahanpurā /
grāhānkarkaṭakāṃścaiva matsyāṃśca vividhānbahūn //

kāmānvarṣati parjanyo rūpyāṇi vividhāni ca /
sauvarṇānyaprameyāṇi vāpyaśca krośasammitāḥ //

sahasraṃ vāmanānkubjānnakrānmakarakacchapān /
sauvarṇānvihitāndṛṣṭvā tato'smayata vai tadā //

tatsuvarṇamaparyantaṃ rājarṣiḥ kurujāṅgale /
ījāno vitate yajñe brāhmaṇebhyo hyamanyata //

so'śvamedhasahasreṇa rājasūyaśatena ca /
puṇyaiḥ kṣatriyayajñaiśca prabhūtavaradakṣiṇaiḥ //

kāmyanaimittikājasrairiṣṭveṣṭāṃ gatimāptavān /
sa cenmamāra sṛñjaya caturbhadratarastvayā //

putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //