Mahabharata · Chapter 7.53

prajāsarganimittaṃ hi kṛto yatnastvayā vibho /
tvayā sṛṣṭāśca vṛddhāśca bhūtagrāmāḥ pṛthagvidhāḥ //

tāstaveha punaḥ krodhātprajā naśyanti sarvaśaḥ /
tā dṛṣṭvā mama kāruṇyaṃ prasīda bhagavanprabho //
brahmovāca /

saṃhartuṃ na ca me kāma etadevaṃ bhavediti /
pṛthivyā hitakāmaṃ tu tato māṃ manyurāviśat //

iyaṃ sannā tadā devī bhārārtā samacūcudat /
saṃhārārthaṃ mahādeva bhāreṇābhihatā satī //

tato'haṃ nādhigacchāmi buddhyā bahu vicārayan /
saṃhāramaprameyasya tato māṃ manyurāviśat //
rudra uvāca /

saṃhārārthaṃ prasīdasva māruṣo vasudhādhipa /
mā prajāḥ sthāvarāścaiva jaṅgamāśca vyanīnaśaḥ //

tava prasādādbhagavannidaṃ vartettridhā jagat /
anāgatamatītaṃ ca yacca samprati vartate //

bhagavankrodhasandīptaḥ krodhādagnimavāsṛjat /
sa dahatyaśmakūṭāni drumāṃśca saritastathā //

palvalāni ca sarvāṇi sarvai caiva tṛṇolapāḥ /
sthāvaraṃ jaṅgamaṃ caiva niḥśeṣaṃ kurute jagat //

tadetadbhasmasādbhūtaṃ jagatsthāvarajaṅgamam /
prasīda bhagavansa tvaṃ roṣo na syādvaro mama //

sarve hi sṛṣṭā naśyanti tava deva kathañcana /
tasmānnivartatāṃ tejastvayyevedaṃ pralīyatām //

upāyamanyaṃ sampaśya prajānāṃ hitakāmyayā /
yatheme prāṇinaḥ sarve nirvarteraṃstathā kuru //

abhāvaṃ neha gaccheyurutsannajananāḥ prajāḥ / bhavatā hi niyukto'haṃ prānāṃ pālane vibhā /
dayā te na samutpannā prajāsu vibudheśvara //

mā vinaśyejjagannātha jagatsthāvarajaṅgamam /
prasādābhimukhaṃ devaṃ tasmādevaṃ bravīmyaham //
nārada uvāca /

śrutvā hi vacanaṃ devaḥ prajānāṃ hitakāraṇe /
tejaḥ sandhārayāmāsa punarevāntarātmani //

tato'gnimupasaṃhṛtya bhagavām̐llokasatkṛtaḥ /
pravṛttaṃ ca nivṛttaṃ ca kalpayāmāsa vai prabhuḥ //

upasaṃharatastasya tamagniṃ roṣajaṃ tathā /
prādurbabhūva viśvebhyo gobhyonārī mahātmanaḥ //

kṛṣṇaraktā tathā piṅgā raktajihvāsyalocanā /
kuṇḍalābhyāṃ ca rājendra taptābhyāṃ taptabhūṣaṇā //

sā niḥsṛtya tathā khebhyo dakṣiṇāṃ diśamāśritā /
smayamānā ca sā'vekṣya devau viśveśvarāvubhau //

tāṃ tu tatra tadā devīṃ brahmā lokapitāmahaḥ / uktavānmadhuraṃ vākyaṃ sāntvayitvā punaḥ punaḥ /
mṛtyo iti mahīpāla jahi cemāḥ prajā iti //

tvaṃ hi saṃhārabuddhyā'tha prādurbhūtā ruṣo mama /
tasmātsaṃhara sarvāstvaṃ prajāḥ sajaḍapaṇḍitāḥ //

aviśeṣeṇa caiva tvaṃ prajāḥ saṃhara bhāmini /
mama tvaṃ hi niyogena tataḥ śreyo hyavāpsyāsi //
nārada uvāca /

evamuktā tu sā tena mṛtyuḥ kamalalocanā /
prārudadbhṛśasaṃvignā prāpatannaśrubindavaḥ //

pāṇibhyāṃ pratijagrāha tānyaśrūṇi pitāmahaḥ /
sarvabhūtahitārthāya tāṃ cāpyanunayattadā //