Mahabharata · Chapter 7.4

tasya lālapyamānasya kuruvṛddhaḥ pitāmahaḥ /
deśakālocitaṃ vākyamabravītprītamānasaḥ //
bhīṣma uvāca /

samudra iva sindhūnāṃ jyotiṣāmiva bhāskaraḥ /
satyasya ca yathā santo bījānāmiva corvarā //

parjanya iva bhūtānāṃ pratiṣṭhā suhṛdāṃ bhavān /
bāndhavāstvā'nujīvantu svāduvṛkṣamivāṇ़ḍajāḥ //

mānahā bhava śatrūṇāṃ mitrāṇāṃ nandivardhanaḥ /
kauravāṇāṃ bhava gatiryathā viṣṇurdivaukasām //

svabāhubalavīryeṇa dhārtarāṣṭrapriyaiṣiṇā /
karṇa rājapuraṃ gatvā kāmbhojā nirjitāstvayā //

girivrajagatāścāpi nagnajitpramukhā nṛpāḥ /
ambaṣṭhāśca videhāśca gāndhārāśca jitāstvayā //

himavaddurganilayāḥ kirātā raṇakarkaśāḥ /
duryodhanasya vaśagāstvayā karṇa purā kṛtāḥ //

utkalā mekalāḥ pauṇḍrāḥ kaliṅgāndhrāśca saṃyuge / niṣādāśca trigartāśca bāhlīkāśca jitāstvayā

tatratatra ca sangrāme duryodhanahitaiṣiṇā /
bahavaśca jitāḥ karṇa tvayā vīrā mahaujasā //

yathā duryodhanasyātaḥ sajñātikulabāndhavaḥ /
tathā tvamapi sarveṣāṃ kauravāṇāṃ gatirbhava //

śiveśanābhivadāmi tvāṃ gaccha yudhyasva śatrubhiḥ /
anuśāsya kurūnsarvāndhatsva duryodhane jayam //

bhavānpautrasamo'smākaṃ yathā duryodhanastathā /
tavāpi dharmataḥ sarve yathā tasya vayaṃ tathā //

yaunātsambandhakālloke viśiṣṭaṃ saṅgataṃ satām /
sadbhiḥ saṅgamamicchanti tasmātprājñāḥ parairapi //

sa satyasaṅgaro bhūtvā mamedamiti niścitaḥ /
kurūṇāṃ pālaya balaṃ yathā duryodhanastathā //

yathā ca kuravo yuddhe yodhayanti sma pāṇḍavān /
tathā karṇa tvayā kāryaṃ duryodhanahitaiṣiṇā //

niśamya vacanaṃ tasya caraṇāvabhivādya ca /
yayau vaikartanaḥ karṇastūrṇamāyodhanaṃ prati //

so'bhivīkṣya naraughāṇāṃ sthānamapratimaṃ mahat /
vyūḍhapraharaṇoraskaṃ sainyaṃ tatsamabṛṃhayat //

hṛṣitāḥ kuravaḥ sarve duryodhanapurogamāḥ /
upāgataṃ mahābāhuṃ sarvānīkapuraḥsaram //

karṇaṃ dṛṣṭvā mahātmānaṃ yuddhāya samupasthitam / kṣveḍitāsphoṭitaravaiḥ siṃhanādaravairapi /
dhanuḥśabdaiśca vividhaiḥ kuravaḥ samapūjayan //