Mahabharata · Chapter 7.46

yathā vadasi me sūta ekasya bahubhiḥ saha /
saṅgrāmaṃ tumulaṃ ghoraṃ jayaṃ caiva mahātmanaḥ //

aśraddheyamivāścaryaṃ saubhadrasyātha vikramam /
kintu nātyadbhutaṃ teṣāṃ yeṣāṃ dharmo vyapāśrayaḥ //

duryodhane ca vimukhe rājaputraśate hate /
saubhadre pratipattiṃ kāṃ pratyapadyanta māmakāḥ //
sañjaya uvāca /

saṃśuṣkāsyāścalannetrāḥ prasvinnā romaharṣaṇāḥ /
pālayanakṛtotsāhā nirutsāhā dviṣa़jjaye //

hatānbhrātṝnpitṝnputrānsuhṛtsambandhibāndhavān /
utsṛjyotsṛjya sañjagmustvarayanto hayadvipān //

tānprabhagnāṃstathā dṛṣṭvā droṇo drauṇirbṛhadbalaḥ /
kṛpo duryodhanaḥ karṇaḥ kṛtavarmātha saubalaḥ //

abhyadhāvansusaṅkruddhāḥ saubhadramaparājitam / te tu pautreṇa te rājanprāyaśo vimukhīkṛtāḥ /
saubhadreṇa mahārāja śakrapratimatejasā //

ekastu sukhasaṃvṛddho bālyāddarpācca nirbhayaḥ /
iṣvastravinmahātejā lakṣmaṇo'rjunimabhyayāt //

tamanvagevāsya pitā putragṛddhī nyavartata /
anuduryodhanaṃ cānye nyavartanta mahārathāḥ //

taṃ te'bhiṣiṣicurbāṇairmeghā girimivāmbubhiḥ /
sa tu tānpramamāthaiko viṣvagvāto yathāmbudān //

pautraṃ tava ca durdharṣaṃ lakṣmaṇaṃ priyadarśanam /
pituḥ samīpe tiṣṭhantaṃ śūramudyatakārmukam //

atyantasukhasaṃvṛddhaṃ dhaneśvarasutopamam / āsasāda raṇe kārṣṇirmatto mattamiva dvipam /
siṃhaśābo vane śaśvatpuṇḍarīkaśiśuṃ yathā //

lakṣmaṇena tu saṅgamya saubhadraḥ paravīrahā /
śaraiḥ suniśitaistīkṣṇairbāhvorurasi cārpayat //

saṅkruddhau vai mahārāja daṇḍāhata ivoragaḥ /
pautrastava mahārāja tava pautramabhāṣata //

sudṛṣṭaḥ kriyatāṃ loko hyamuṃ lokaṃ gamiṣyasi /
paśyatāṃ bāndhavānāṃ tvāṃ nayāmi yamasādanam //

evamuktvā tato bhallaṃ saubhadraḥ paravīrahā /
udbabarha mahābāhurnirmuktoragasannibham //

sa tasya bhujanirmukto lakṣmaṇasya sudarśanam /
sunasaṃ subhru keśāntaṃ śiro'hārṣītsakuṇḍalam //

pautrastu tava durdharṣaṃ lakṣmaṇaṃ priyadarśanam /
pituḥ samīpe tiṣṭhantaṃ prāhiṇodyamasādanam //

atyantasukhasaṃvṛddhaṃ dhaneśvarasutopamam /
lakṣmaṇāṃ nihataṃ dṛṣṭvā hāhetyuccukruśurjanāḥ //

tato duryodhanaḥ kruddhaḥ priye putre nipātite /
hatainamiti cukrośa kṣatriyānkṣatriyarṣabhaḥ //

tato droṇaḥ kṛpaḥ karṇo droṇaputro bṛhadbalaḥ /
kṛtavarmā ca hārdikyaḥ ṣaḍrathāḥ paryavārayan //

tāṃstu viddhā śitairbāṇairvimukhīkṛtya cārjuniḥ /
vegenābhyapatatkruddhaḥ saindhavasya mahadbalam //

āvavrustasya panthānaṃ gajānīkena daṃśitāḥ / kaliṅgāśca niṣādāśca krāthaputraśca vīryavān /
tatprasaktamivātyarthaṃ yuddhamāsīdviśāmpate //

tatastatkuñjarānīkaṃ vyadhamaddhṛṣṭamārjuniḥ /
yathā vāyurnityagatirjaladāñśataśo'mbare //

tataḥ kruddhāḥ śaravrātai rājānaḥ samavārayan / athetare sannivṛttāḥ punardroṇamukhā rathāḥ /
paramāstrāṇi dhunvānāḥ saubhadramabhidudruvuḥ //

tānnivāryārjunirbāṇaiḥ krāthaputramayodhayat /
śaraugheṇāprameyeṇa tvaramāṇo jighausayā //

sadhanurbāṇakeyūrau bāhū samukuṭaṃ śiraḥ /
sacchatradhvajayantāraṃ rathaṃ cāśvānnyapātayat //

kulaśīlaśrutibalaiḥ kīrtyā cāstrabalena ca /
yukte tasminhate vīrāḥ prāyaśo vimukhā'bhavan //