Mahabharata · Chapter 7.47

tathā praviṣṭaṃ taruṇaṃ saubhadramaparājitam /
kulānurūpaṃ kurvāṇaṃ saṅgrāmeṣvaparājitam //

ājāneyaiḥ subalibhiryāntamaśvaistrihāyanaiḥ /
plavamānamivākāśe ke śūrāḥ samavārayan //
sañjaya uvāca /

abhimanyuḥ praviśyaitāṃstāvakānniśitaiḥ śaraiḥ /
akarotpārthivānsarvānvimukhānpāṇḍunandanaḥ //

taṃ tu droṇaḥ kṛpaḥ karṇo drauṇiśca sabṛhadbalaḥ /
kṛtavarmā ca hārdikyaḥ ṣaḍrathāḥ paryavārayan //

dṛṣṭvā tu saindhave bhāramatimātraṃ samāhitam /
sainyaṃ tava mahārāja yudhiṣṭhiramupādravat //

saubhadramitare vīramabhyavarṣañśarāmbubhiḥ /
tālamātrāṇi cāpāni vikarṣanto mahābalāḥ //

tāṃstu sarvānmaheṣvāsānsarvavidyāsu niṣṭhitān /
vyadṛṣṭambhayadraṇe bāṇaiḥ saubhadraḥ paravīrahā //

droṇaṃ pañcāśatāvidhyadviṃśatyā ca bṛhadbalam /
aśītyā kṛtavarmāṇaṃ kṛpaṃ ṣaṣṭyā śilīmukhaiḥ //

rukmapuṅkhairmahāvegairākarṇasamacoditaiḥ /
avidhyaddaśabhirbāṇairaśvatthāmānamārjuniḥ //

karṇaṃ ca karṇinā karṇe pītena ca śitena ca /
phālgunirdviṣatāṃ madhye vivyādha parameṣuṇā //

pātayitvā kṛpasyāśvāṃstathobhau pārṣṇisārathī /
athainaṃ daśabhirbāṇaiḥ pratyavidhyatstanāntare //

tato bṛndārakaṃ vīraṃ kurūṇāṃ kīrtivardhanam /
putrāṇāṃ tava vīrāṇāṃ paśyatāmavadhīdbalī //

taṃ drauṇiḥ pañcaviṃśatyā kṣudrakāṇāṃ samārpayat /
varaṃvaramamitrāṇāmārujantamabhītavat //

sa tu bāṇaiḥ śitaistūrṇaṃ pratyavidhyata māriṣa /
paśyatāṃ dhārtarāṣṭrāṇāmaśvatthāmānamārjuniḥ //

ṣaṣṭyā śarāṇāṃ taṃ drauṇistigmadhāraiḥ sutejanaiḥ /
ugrairnākampayadviddhvā mainākamiva parvatam //

sa tu drauṇiṃ trisaptatyā hemapuṅghairajihmagaiḥ /
pratyavidhyanmahātejā balavānapakāriṇam //

tasmindroṇo bāṇaśataṃ putragṛddhī nyapātayat /
aśvatthāmā tathā'ṣṭau ca parīpsanpitaraṃ raṇe //

karṇo dvāviṃśatiṃ bhallānkṛtavarmā ca viṃśatim /
bṛhadbalastu pañcāśatkṛpaḥ śāradvato daśa //

tāṃstu pratyavadhītsarvāndaśabhirdaśabhiḥ śaraiḥ /
tairardyamānaḥ saubhadraḥ sarvato niśitaiḥ śaraiḥ //

taṃ kosalānāmadhipaḥ karṇinā'tāḍayaddhṛdi /
sa tasyāśvāndhvajaṃ cāpaṃ sūtaṃ cāpātayatkṣitau //

atha kosalarājastu virathaḥ khaṅgracarmadhṛt /
iyeṣa phālguneḥ kāyācchiro hartuṃ sakuṇḍalam //

sa kosalānāmadhipaṃ rājaputraṃ bṛhadbalam /
hṛdi vivyādha vāṇena sa bhinnahṛdayo'patat //

babhañja ca sahasrāṇi daśa rājñāṃ mahātmanām /
sṛjatāmaśivā vācaḥ khaṅgakārmukadhāriṇām //

tathā bṛhadbalaṃ hatvā saubhadro vyacaradraṇe /
vyaṣṭambhayanmaheṣvāso yodhāṃstava śarāmbubhiḥ //