મહાભારત · અધ્યાય 7.43

યન્માં પૃચ્છસિ રાજેન્દ્ર સિન્ધુરાજસ્ય વિક્રમમ્ ।
શૃણુ તત્સર્વમાખ્યાસ્યે યથા પાણ્ડૂનયોધયત્ ॥

તમૂહુર્વાજિનો વશ્યાઃ સૈન્ધવાઃ સાધુવાહિનઃ ।
વિકુર્વાણા બૃહન્તોઽશ્વાઃ શ્વસનોપરંહસઃ ॥

ગન્ધર્વનગરાકારં વિધિવત્કલ્પિતં રથમ્ ।
તસ્યાભ્યશોભયત્કેતુર્વારાહો રાજતો મહાન્ ॥

શ્વેતશ્ચત્રપતાકાભિશ્ચામરવ્યજનેન ચ ।
સ બભૌ રાજલિઙ્ગૈસ્તૈસ્તારાપતિરિવામ્બરે ॥

મુક્તાવજ્રમણિસ્વર્ણૈર્ભૂષિતં તદયસ્મયમ્ ।
વરૂથં વિબભૌ તસ્ય જ્યોતિર્ભિઃ ખમિવાવૃતમ્ ॥

સ વિષ્ફાર્ય મહચ્ચાપં કિરન્નિષુગણાન્બહૂન ।
તત્કણ્ડં પૂરયામાસ યદાર્જુનિરદારયત્ ॥

સ સાત્યકિં ત્રિભિર્બાણૈરષ્ટભિશ્ચ વૃકોદરમ્ ।
ધૃષ્ટદ્યુમ્નં તથા ષષ્ટ્યા વિરાટં દશભિઃ શરૈઃ ॥

દ્રુપદં પઞ્ચભિસ્તીક્ષ્ણૈઃ સપ્તભિશ્ચ શિખણ્ડિનમ્ ।
કેકયાન્પઞ્ચવિંશત્યા દ્રૌપદેયાંસ્ત્રિભિસ્ત્રિભિઃ ॥

યુધિષ્ઠિરં તુ સપ્તત્યા તતઃ શેષાનપાનુદત્ ।
ઇષુજાલેન મહતા તદદ્ભુતમિવાભવત્ ॥

અથાસ્ય શિતપીતેન ભલ્લેનાદિશ્ય કાર્મુકમ્ ।
ચિચ્છેદ પ્રહસન્રાજા ધર્મપુત્રઃ પ્રતાપવાન્ ॥

અક્ષ્ણોર્નિમેષમાત્રેણ સોઽન્યદાદાય કાર્મુકમ્ ।
વિવ્યાધ દશભિઃ પાર્થં તાંશ્ચૈવાન્યાંસ્ત્રિભિસ્ત્રિભિઃ ॥

તત્તસ્ય લાઘવં જ્ઞાત્વા ભીમો ભલ્લૈસ્ત્રિભિસ્ત્રિભિઃ ।
ધનુર્ધ્વજં ચ ચ્છત્રં ચ ક્ષિતૌ ક્ષિપ્રમપાતયત્ ॥

સોઽન્યદાદાય બલવાન્સજ્જં કૃત્વા ચ કાર્મુકમ્ ।
ભીમસ્યાપાતયત્કેતું ધનુરશ્વાંશ્ચ મારિષ ॥

સ હતાશ્વાદવપ્લુત્ય ચ્છિન્નધન્વા રથોત્તમાત્ ।
સોત્યકેરાપ્લુતો યાનં ગિર્યગ્રમિવ કેસરી ॥

તતસ્ત્વદીયાઃ સંહૃષ્ટાઃ સાધુસાધ્વિતિ વાદિનઃ ।
સિન્ધુરાજસ્ય તત્કર્મ પ્રેક્ષ્યાશ્રદ્ધેયમદ્ભુતમ્ ॥

સઙ્ક્રુદ્ધાન્પાણ્ડવાનેકો યદ્દધારાસ્ત્રતેજસા ।
તત્તસ્ય કર્મ ભૂતાનિ સર્વાણ્યેવાભ્યપૂજયન્ ॥

સૌભદ્રેણ હતૈઃ પૂર્વં સોત્તરાયોધિભિર્દ્વિપૈઃ ।
પાણ્ડૂનાં દર્શિતઃ પન્થાઃ સૈન્ધવેન નિવારિતઃ ॥

યતમાનાસ્તુ તે વીરા માત્સ્યપાઞ્ચાલકેકયાઃ ।
પાણ્ડવાશ્ચાન્વપદ્યન્ત પ્રતિશેકુર્ન સૈન્ધવમ્ ॥

યો યો હિ યતતે ભેત્તું દ્રોણાનીકં તવાહિતઃ ।
તત્તમેવ વરં પ્રાપ્ય સૈન્ધવઃ પ્રત્યવારયત્ ॥