Mahabharata · Chapter 7.35

tadanīkamanādhṛṣṭaṃ bhāradvājena rakṣitam /
pārthāḥ samabhyavartanta bhīmasenapurogamāḥ //

sātyakiścekitānaśca dhṛṣṭadyumnaśca pārṣataḥ /
kuntibhojaśca vikrānto drupadaśca mahārathaḥ //

ārjuniḥ kṣatradharmā ca bṛhatkṣatraśca vīryavān /
cedipo dhṛṣṭaketuśca mādrīputrau ghaṭotkacaḥ //

yudhāmanyuśca vikrāntaḥ śikhaṇḍī cāparājitaḥ /
utaktamaujāśca durdharṣo virāṭaśca mahārathaḥ //

draupadeyāśca saṃrabdhāḥ śaiśupāliśca vīryavān /
kekayāśca mahāvīryāḥ sṛñjayāśca sahasraśaḥ //

ete cānye ca sagaṇāḥ kṛtāstrā yuddhadurmadāḥ /
samabhyadhāvansahasā bhāradvājaṃ yuyutsavaḥ //

samīpe vartamānāṃstānbhāradvājo'tivīryavān /
asambhrāntaḥ śaraugheṇa mahatā samavārayat //

mahaughaḥ salilasyeva girimāsādya durbhidam /
droṇaṃ te nābhyavartanta velāmiva jalāśayāḥ //

pīḍyamānāḥ śarai rājandroṇacāpaviniḥsṛtaiḥ /
na śekuḥ pramukhe sthātuṃ bhāradvājasya pāṇḍavāḥ //

tadadbhutamapaśyāma droṇasya bhujayorbalam /
yadenaṃ nābhyavartanta pāñcālāḥ sṛñjayaiḥ saha //

tamāyāntamabhikruddhaṃ droṇaṃ dṛṣṭvā yudhiṣṭhiraḥ /
bahudhā cintayāmāsa droṇasya prativāraṇam //

aśakyaṃ tu tamanyena droṇaṃ mattvā yudhiṣṭhiraḥ /
aviṣahyaṃ gura bhāraṃ saubhadre samavāsṛjat //

vāsudevādanavaraṃ phalgunāccāmitaujasam /
abravītparavīraghnamabhimanyumidaṃ vacaḥ //
yudhiṣṭhira uvāca /

etya no nārjuno garhedyathā tāta tathā kuru /
droṇānīkasya na vayaṃ vidmo bhedaṃ kathañcana //

tvaṃ vā'rjuno vā kṛṣṇo vā bhindyātpradyumna eva vā /
droṇānīkaṃ mahābāho pañcamo nopapadyate //

abhimanyo varaṃ tāta yāce tvāṃ dātumarhasi /
pitṝṇāṃ mātulānāṃ ca sainyānāṃ caiva sarvaśaḥ //

dhanañjayo hi nastāta garhayedetya saṃyugāt /
kṣipramastraṃ samādāya droṇānīkaṃ viśātaya //
abhimanyuruvāca /

droṇasya dṛḍhamatyugramanīkapravaraṃ yudhi /
pitṝṇāṃ jayamākāṅkṣannavagāhe'vilambitam //

upadiṣṭo hi me pitrā yogo'nīkaviśātane /
notsahe hi vinirgantumahaṃ kasyāñcidāpadi //
yudhiṣṭhira uvāca /

bhindhyanīkaṃ yudhāṃśceṣṭha dvāraṃ sañjanayasva naḥ /
vayaṃ tvā'nugamiṣyāmo yena tvaṃ tāta yāsyasi //

dhanañjayasamaṃ yuddhe tvāṃ vayaṃ tāta saṃyute /
praṇidhāyānuyāsyāmo rakṣantaḥ sarvatomukhāḥ //
bhīma uvāca /

ahaṃ tvā'nugamiṣyāmi dhṛṣṭadyumno'tha sātyakiḥ /
pāñcalāḥ kekayā mātsyāstathā sarve prabhadrakāḥ //

sakṛdbhinnaṃ tvayā vyūhaṃ tatra tatra punaḥ punaḥ /
vayaṃ pradhvaṃsayiṣyāmo nighnāmānā varānvarān //
abhimanyuruvāca /

ahametatpravekṣyāmi droṇānīkaṃ durāsadam /
pataṅga iva saṅkruddho jvalitaṃ jātavedasam //

tatkarmādya kariṣyāmi hitaṃ yadvaṃśayordvayoḥ /
mātulasya ca yatprītiṃ kariṣyati pituśca me //

śiśunaikena saṅgrame kālyamānāni saṅghaśaḥ /
drakṣyanti sarvabhūtāni dviṣatsainyāni vai mayā //

nāhaṃ pārthena jātaḥ syāṃ na ca jātaḥ subhadrayā /
yadi me saṃyuge kaścijjīvito nādya mucyate //

yadi caikarathenāhaṃ samagraṃ kṣatramaṇḍalam /
na karomyaṣṭadhā yuddhe na bhavāmyarjunātmajaḥ //
yudhiṣṭhira uvāca /

evaṃ te bhāṣamāṇasya balaṃ saubhadra vardhatām /
yatsamutsahase bhettuṃ droṇānīkaṃ durāsadam //

rakṣitaṃ puruṣavyāghrairmaheṣvāsairmahābalai /
sādhyarudramaruttulyairvasvagnyādityavikramaiḥ //
sañjaya uvāca /

tasya tadvacanaṃ śrutvā sa yantāramacodayat //

sumitrāśvānraṇe kṣipraṃ droṇānīkāya codaya //