Mahabharata · Chapter 7.32

pratighātaṃ tu sainyasya nāmṛṣyata vṛkodaraḥ /
so'bhyāhanadguruṃ ṣaṣṭyā karṇaṃ ca daśabhiḥ śaraiḥ //

tasya droṇaḥ śitairbāṇaistīkṣṇadhārairajihmagaiḥ /
jīvitāntamabhiprepsurmarmaṇyāśu jaghāna ha //

ānantaryamabhiprepsuḥ ṣaḍviṃśatyā śamārpayat /
karṇo dvādaśabhirbāṇairaśvatthāmā ca saptabhiḥ //

ṣaṅbhirduryodhano rājā tata enamathākirat /
bhīmaseno'pi tānsarvānpratyavidhyanmahābalaḥ //

droṇaṃ pañcāśateṣūṇāṃ karṇaṃ ca daśabhiḥ śaraiḥ /
daryodhanaṃ dvādaśabhirdauṇimaṣṭābhirāśugaiḥ //

ārāvaṃ tumulaṃ kurvannabhyavartata tānraṇe /
tasminsantyati prāmānmṛtyusādhāraṇīkṛte //

ajātaśatrustānyodhānbhīmaṃ trātetyacodayat /
te yayurbhīmasenasya samīpamamitaujasaḥ //

yuyudhānaprabhṛtayo mādrīputrau ca pāṇḍavau /
te sametya susaṃrabdhāḥ sahitāḥ puruṣarṣabhāḥ //

maheṣvāsavarairguptā droṇānīkaṃ bibhitsavaḥ /
samāpeturmahāvīryā bhīmaprabhṛtayo rathāḥ //

tānpratyagṛhṇādavyagro droṇo'pi rathināṃ varaḥ /
mahārathānatibalānvīrānsamarayodhinaḥ //

bāhyaṃ mṛtyubhayaṃ kṛtvā tāvakānpāṇḍavā yayuḥ /
sādinaḥ sādino'byaghnaṃstathaiva rathino rathān //

asiśaktyṛṣṭisaṅghātairyuddhamāsītparaśvathaiḥ /
prakṛṣṭamasiyuddhaṃ ca babhūva kaṭukodayam //

kuñjarāṇāṃ ca sampāte yuddhamāsītsudāruṇam /
apatatkuñjarādanyo hayādanyastvavākśirāḥ //

naro bāṇavinirbhinno rathādanyaśca māriṣa /
tatrānyasya ca samparde patitasya vivarmaṇaḥ //

śiraḥ pradhvaṃsayāmāsa vakṣasyākramya kuñjaraḥ /
aparāṃścāpare'mṛdranvāraṇāḥ patitānnarān //

viṣāṇaiścāvaniṃ gatvā vyabhindanrathino bahūn /
narāntraiḥ kecidapare viṣāṇālagnasaṃśrayaiḥ //

babhramuḥ samare nāgā mṛdrantaḥ śataśo narān /
kārṣṇāyasatanutrāṇānnarāśvarathakuñjarān //

patitānpothayāñcakrurdvipāḥ sthūlanalāniva /
gṛdhrapatrādhivāsāṃsi śayanāni nāradhipāḥ //

hīmantaḥ kālasamparkātsuduḥsvānyanuśerate /
hanti smātra pitā putraṃ rathenābhyetya saṃyuge //

putraśca pitaraṃ mohānnirmaryādamavartata /
ratho bhagno dhvajaśchinnaśchatramurvyoṃ nipātitam //

yugārdhaṃ cchinnamādāya pradudrāva tathā hayaḥ /
sāsirbāhurnipatitaḥ śiraśchinnaṃ sakuṇḍalam //

gajenākṣipya balinā rathaḥ sañcūrṇitaḥ kṣitau /
rathinā tāḍito nāgo nārācenāpatatkṣitau //

sārohaścāpatadvājī gejenābhyāhato bhṛśam /
nirmaryādaṃ mahadyuddhamavartata sudāruṇam //

hā tāta hā putra sakhe kvāsi tiṣṭha kva dhāvasi / praharāhara jahmenaṃ smitaśveḍitagarjitaiḥ /
ityevamuccairatyarthaṃ śrūyante vividhā giraḥ //

narasyāśvasya nāgsya samasañjata śoṇitam /
upāśāmyadrajo bhaumaṃ bhīrūnkaśmalamāviśat //

cakreṇa cakramāsādya vīro vīrasya saṃyuge /
atīteṣupathe kāle jahāra gadayā siraḥ //

asītkeśaparāmarśo muṣṭiyuddhaṃ ca dāruṇam /
nakhairdantaiśca sūrāṇāmadvīpe dvīpamicchatām //

tatrācchidyata śūrasya sakhaṅgo bāhurudyataḥ /
sadhunaścāparasyāpi saśaraḥ sāṅkuśastathā //

ākrośadanyamanyo'tra tathā'nyo vimukho'dravat /
anyaḥ prāptasya cānyasya śiraḥ kāyādapāharat //

saśabdamadravaccānyaḥ śabdādanyo'trasadbhṛśam /
svānanyo'tha parānanyo jaghāna niśitaiḥ śaraiḥ //

giriśṛṅgopamaścātra nārācena nipātitaḥ /
mātaṅgo nyapatadbhūmau nadīrodha ivoṣṇage //

tathaiva rathinaṃ nāgaḥ kṣarangiririvārujan /
abhyatiṣṭhatpadā bhūmau sahāśvaṃ sahasārathim //

śūrānpraharato dṛṣṭvā kṛtāśstrānrudhirokṣitān /
bahūnapyāviśanmoho bhīrūnhṛdayadurbalān //

sarvamāvignamabhavanna prājñāyata kiñcana /
sainyena rajasā dhvastaṃ nirmaryādamavartata //

tataḥ senāpatiḥ śīghramayaṃ krāla iti bruvan /
nityābhitvaritāneva tvarayāmāsa pāṇḍavān //

kurvantaḥ śāsanaṃ tasya pāṇḍavā bāhuśālinaḥ /
saro haṃsā ivāpeturghnanto droṇarathaṃ prati //

gṛhṇītādravatānyonyaṃ vibhītā vinikṛntata /
ityāsīttumulaḥ śabdo durdharṣasya rathaṃ prati //

tato droṇaḥ kṛpaḥ karṇo drauṇī rājā jayadrathaḥ /
vindānuvindāvāvantyau śalyaścaitānnyavārayan //

te tvāryadharmasaṃrabdhā durnivārā durāsadāḥ /
śarārtā na jahurdroṇaṃ pāñcālāḥ pāṇḍavai saha //

tato droṇo'tisankruddho visṛjañśataśaḥ śarān /
cedipāñcālapāṇḍūnāmakarotkadanaṃ mahat //

tasya jyātalanirghoṣaḥ śuśruve dikṣaṃ māriṣa /
vajrasaṃhrādasaṅkāśastrāsayanmānavānbahūn //

etasminnantare jiṣṇurjitvā saṃśaptakānbahūn /
abhyayāttatra yatrāsau droṇaḥ pāṇḍūnpramardati //

tāñśaraughānmahāvartāñśoṇitodānmahāhadān /
tīrṇaḥ saṃśaptakānhatvā pratyadṛśyata phalgunaḥ //

tasya kīrtimato lakṣma sūryapratimatejasaḥ /
dīpyamānamapaśyāma tejasā vānaradhvajam //

saṃśaptakasamudraṃ tamucchoṣyāstragabhastibhiḥ /
sa pāṇḍavayugāntārkaḥ kurūnapyabhyatītapat //

pradadāha kurūnsarvānarjunaḥ śastratejasā /
yugānte sarvabhūtāni dhūmaketurivotthitaḥ //

tena bāṇasahasraudhairgajāśvarathayodhinaḥ /
tāḍyamānāḥ kṣitiṃ jagmurmuktakeśāḥśarārditāḥ //

kecidārtasvanaṃ cakrurvineśurapare punaḥ /
pārthabāṇahatāḥ kecinnipeturvigatāsavaḥ //

teṣāmutpatitānkāṃścitpatitāṃśca parāṅmukhān /
na jaghānārjuno yodhānyodhavratamanusmaran //

te vikīrṇarathāścitrāḥ prāyaśaśca parāṅmukhaḥ /
kuravaḥ karṇakarṇeti hāheti ca vicukruśuḥ //

tamādhirathirākrandaṃ vijñāya śaraṇaiṣiṇām /
mā bhaiṣṭeti pratiśrutya yayāvabhimukho'rjunam //

sa bhāratarathaśreṣṭhaḥ sarvabhārataharṣaṇaḥ /
prāduścakre tadāgneyamastramastravidāṃ vāraḥ //

tasya dīptaśaraughasya dīptacāpadharasya ca / vāruṇena tadastreṇa vidhūyātha dhanañjayaḥ /
śaraughāñśarajālena vidudhāva dhanañjayaḥ //

tathaivādhirathistasya bāṇājjvalitatejasaḥ /
astramastreṇa saṃvārya prāṇadadvisṛjañśarān //

dhṛṣṭadyumnaśca bhīmaśca sātyakiśca mahārathaḥ /
vivyadhuḥ karṇamāsādya tribhistribhirajihmagaiḥ //

arjunāstraṃ tu rādheyaḥ saṃvārya śaravṛṣṭibhiḥ /
teṣāṃ trayāṇāṃ cāpāni ciccheda viśikhaistribhiḥ //

te nikṛttāyughāḥ śūrā nirviṣā bhujagā iva /
rathaśaktīḥ samutkṣipya bhṛśaṃ siṃhā ivānadan //

tā bhujāgrairmahāvegā nisṛṣṭā bhujagopamāḥ /
dīpyamānā mahāśaktyo jagmurādhirathiṃ prati //

tā nikṛtya śaravrātaistribhistribhirajihmagaiḥ /
nanāda balavānkarṇaḥ pārthāya visṛjañśarān //

arjunaścāpi rādheyaṃ viddhvā saptabhirāśugaiḥ /
karṇādavarajaṃ bāṇairjaghāna niśitaiḥ śaraiḥ //

tataḥ śatruñjayaṃ hatvā pārthaḥ ṣaṅbhirajihmagaiḥ /
jahāra sadyo bhallena vipāṭasya śiro rathāt //

paśyatāṃ dhārtarāṣṭrāṇāmekenaiva kirīṭinā /
pramukhe sūtaputrasya sodaryā nihatāstrayaḥ //

tato bhīmaḥ samutpatya svarathādvainateyavat /
varāsinā karṇapakṣāñjadhāna daśa pañca ca //

punastu rathamāsthāya dhanurādāya cāparam /
vivyādha daśabhiḥ karṇaṃ sūtamaśvāṃśca pañcabhiḥ //

dhṛṣṭadyumno'pyasivaraṃ carma cādāya bhāsvaram /
jaghāna candravarmāṇaṃ bṛhatkṣatraṃ ca naiṣadham //

tataḥ svarathamāsthāya pāñcālyo'nyacca kārmukam /
ādāya karṇaṃ vivyādha trisaptatyā nadanraṇe //

śaineyo'pyanyadādāya dhanurindusamadyutiḥ /
sūtaputraṃ catuḥṣaṣṭyā viddhvā siṃha ivānadat //

bhallābhyāṃ sādhu muktābhyāṃ chittvā karṇasya kārmukam /
punaḥ karṇaṃ tribhirbāṇairbāhvorurasi cārpayat //

tato duryodhano droṇo rājā caiva jayadrathaḥ /
nima़jjamānaṃ rādheyamujjahruḥ sātyakārṇavāt //

pattyaśvarathamātaṅgāstvadīyāḥ śataśo'pare /
karṇamevābhyadhāvanta trāsyamānāḥ prahāriṇaḥ //

dhṛṣṭadyumnaśca bhīmaśca saubhadro'rjuna eva ca /
nakulaḥ sahadevaśca sātyakiṃ jugupū raṇe //

evameṣa mahāraudraḥ kṣayārthaṃ sarvadhanvinām /
tāvakānāṃ pareṣāṃ ca tyaktvā prāṇānabhūdraṇaḥ //
padātirathanāgāśvā gajāśvarathapattibhiḥ / rathino nāgapattyaśvairatha pattīratha dvipaiḥ //

aśvairaśvā gajairnāgā rathino rathibhiḥ saha /
saṃyuktāḥ samadṛśyanta pattayaścāpi pattibhiḥ //
evaṃ sukalilaṃ yuddhamāsītkravyādaharṣaṇam / mahadbhistairabhītānāṃ yamarāṣṭravivardhanam //

tato hatā nararathavājikuñjarai ranekaśo dviparathapattivājinaḥ /
gajairgajā rathibhirudāyudhā rathā / hayairhayāḥ pattigaṇaiśca pattayaḥ //

rathairdvipā dviradavarairmahāhayā hayairnarā vararathibhiśca vājinaḥ /
nirastajihvādaśanekṣaṇāḥ kṣitau kṣayaṃ gatāḥ pramathitavarmabhūṣaṇāḥ //

tathā parairbahukaraṇairvarāyudhai- rhatā gatāḥ pratibhayadarśanāḥ kṣitim /
vipothitā hayagajapādatāḍitā bhṛśākulā rathamukhanemibhiḥ kṣatāḥ //

pramodane śvāpadapakṣirakṣasāṃ janakṣaye vartati tatra dāruṇe /
mahābalāste kupitāḥ parasparaṃ niṣūdayantaḥ pravicerurojasā //

tato bale bhṛśalulite parasparaṃ nirīkṣamāṇe rudhiraughasamplute /
divākare'stangirimāsthite śanai rubhe prayāte śibirāya bhārata //