Mahabharata · Chapter 7.33

pūrvamasmāsu bhagneṣu phalgugenāmitaujasā /
droṇe ca moghasaṅkalpe rakṣite ca yudhiṣṭhire //

sarve vidhvastakavacāstāvakā yudhi nirjitāḥ /
rajasvalā bhṛśodvignā vīkṣamāṇā diśo daśa //

avahāraṃ tataḥ kṛtvā bhāradvājasya sammate /
labdhalakṣaiḥ śarairbhinnā bhṛśāvahasitā raṇe //

ślāghamāneṣu bhūteṣu phalgunasyāmitānguṇān /
keśavasya ca sauhārde kīrtyamāne'rjunaṃ prati //

abhiśastā ivābhūvandhyānamūkatvamāsthitāḥ /
tataḥ prabhātasamaye droṇaṃ druyodhano'bravīt //

praṇayādabhimānācca dviṣadvṛddhyā ca durmanāḥ /
śṛṇvatāṃ sarvayodhānāṃ saṃrabdho vākyakovidaḥ //

nūnaṃ vayaṃ vadhyapakṣe bhavato dvijasattama /
tathāhi nāgrahīḥ prāptaṃ samīpe'dya yudhiṣṭhiram //

icchataste na mucyeta cakṣuḥprāpto raṇe ripuḥ /
jighṛkṣato rakṣyamāṇaḥ sāmarairapi pāṇḍavaiḥ //

varaṃ dattvā mama prītaḥ paścādvikṛtavānasi /
āśābhaṅgaṃ na kurvanti bhaktasyāryāḥ kathañcana //
sañjaya uvāca /

tato'prītastathoktaḥ sanbhāradvājo'bravīnnṛpam /
nārhase māṃ tathā jñātuṃ ghaṭamānaṃ tava priye //

sasurāsuragandharvāḥ sayakṣoragarākṣasāḥ /
nālaṃ lokā raṇe jetuṃ pālyamānaṃ kirīṭinā //

viśvasṛgyatra govindaḥ pṛtanānīstathā'rjunaḥ /
tatra kasya balaṃ krāmedanyatra tryambakātprabhoḥ //

satyaṃ tāta bravīmyadya naitajjātvanyathā bhavet /
adyaikaṃ pravaraṃ kañcitpātayiṣye mahāratham //

cakrabyūhaṃ vidhāsyāmi yo'bhedyastridaśairapi /
yogena kenacidrājannarjunastvapanīyatām //

na hyajñātamasādhyaṃ vā tasya saṅkhye'sti kiñcana /
tena hyupāttaṃ sakalaṃ sarvajñānamitastataḥ //

droṇena vyāhṛte tvevaṃ saṃśaptakagaṇāḥ punaḥ /
āhvayannarjunaṃ saṅkhye dakṣiṇāmabhito diśam //

tato'rjunasyātha paraiḥ sārdhaṃ samabhavadraṇaḥ / tādṛśo yādṛśo nānyaḥ śruto dṛṣṭopi vā kvacit /

tatra droṇena vihito vyūho rājanvyarocata /
caranmadhyandine sūryaḥ pratapanniva durdṛśaḥ //

taṃ cābhimanyurvacanātpiturjyeṣṭhasya bhārata /
bibheda durbhidaṃ saṅkhye cakravyūhamanekadhā //

sa kṛtvā duṣkaraṃ karma hatvā vīrānsahasraśaḥ /
rājaputraśataṃ hatvā kausalyaṃ ca bṛhadbalam //

mahārathaṃ śalyaputraṃ pautraṃ te lakṣmaṇaṃ tathā / ṣaṭ्su vīreṣu saṃsakto dauḥśāsanivaśaṃ gataḥ /
saubhadraḥ pṛthivīpāla jahau prāṇānparantapa //

vayaṃ paramasaṃhṛṣṭāḥ pāṇḍavāḥ śokakarśitāḥ /
saubhadre nihate rājannavahāramakurmahi //
janamejaya uvāca /

samarodyuktakarmāṇaḥ karmabhirvyañjitaśramāḥ /
sakṛṣṇāḥ pāṇḍavāḥ pañca devairapi durāsadāḥ //

śaśvatkarmānvayairbuddhyā prakṛtyā yaśasā śriyā /
na bhūto bhavitā vāpi kṛṣṇasya sadṛśaḥ pumān //

satyadharmatapodānairdvijapūjādibhirguṇaiḥ /
sadehastridivaṃ prāpto rājā kila yudhiṣṭhiraḥ //

yugānte cāntakaścaiva jāmadagnyaśca kīrtimān /
raṇastho bhīmasenaśca kathyante sadṛśāstrayaḥ //

pratijñākarmadakṣasya raṇe gāṇḍīvadhanvanaḥ /
upamāṃ nādhigacchāmi pārthasya sadṛśīṃ kṣitau //

guruvātsalyamatyantaṃ naibhṛtyaṃ vinayo damaḥ /
nakule tvābhirūpyaṃ ca śauryaṃ ca niyatāni ṣaṭ //

śrutamādhuryagāmbhīryasattvarūpaparākramaiḥ /
sadṛśo devayorvīraḥ sahadevaḥ kilāśvinoḥ //

ye ca kṛṣṇe guṇāḥ sphītāḥ pāṇḍaveṣu ca ye guṇāḥ /
abhimanyau kilaikasthā dṛśyante te guṇāḥ śubhāḥ //

yudhiṣṭhirasya śauryeṇa kṛṣṇasya caritena ca /
karmaṇā bhīmasenasya sadṛśaṃ bhīmakarmaṇaḥ //

dhanañjayasya rūpeṇa vikrameṇa śubhena ca /
vinaye sahadevasya sadṛśaṃ nakulasya ca //

abhimanyuṃ dvijaśreṣṭha saubhadramaparājitam /
śrotumicchāmi kārtsnyena kathamāyodhane hataḥ //
vaiśampāyana uvāca /

abhimanyuṃ hataṃ śrutvā dhṛtarāṣṭro janādhipaḥ /
vistareṇa mahārāja paryapṛcchatsa sañjayam //
dhṛtarāṣṭra uvāca /

putraṃ puruṣasiṃhasya sañjayāprāptayauvanam /
raṇe vinihataṃ śrutvā bhṛśaṃ me dīryate manaḥ //

dāruṇaḥ kṣatradharmo'yaṃ vihito dharmakartṛbhiḥ /
yatra rājyepsavaḥ śūrā bāle śastramapātayan //

bālamatyantasukhinaṃ vicarantamabhītavat /
kṛtāstrā bahavo jaghnurbrūhi gāvalgaṇe katham //

bibitsatā rathānīkaṃ saubhadreṇāmitaujasā /
vikrīḍitaṃ yathā saṅkhye tanmamācakṣva sañjaya //
sañjaya uvāca /

yanmāṃ pṛcchasi rājendra saubhadrasya nipātanam /
tatte kārtsnyena vakṣyāmi śṛṇu rājansamāhitaḥ //

vikrīḍitaṃ kumāreṇa yathānīkaṃ bibhitsatā /
ārugṇāśca yathā vīrā duḥsādhyāścāpi vipluve //

dāvāgnyabhiparītānāṃ bhūrigulmatṛṇadrume /
vanaukasāmivāraṇye tvadīyānāmabhūdbhayam //