Mahabharata · Chapter 7.28

yiyāsatastataḥ kṛṣṇaḥ pārthasyāśvānmanojavān /
sampraiṣīddhemasañchannāndroṇānīkāya santvaran //

taṃ prayāntaṃ kuruśreṣṭhaṃ svāṃstrātuṃ droṇatāpitān /
suśarmā bhrātṛbhiḥ sārdhaṃ yuddhārthī pṛṣṭhato'nvayāt //

tataḥ śvetahayaḥ kṛṣṇamabravīdajitañjayaḥ /
eṣa māṃ bhrātṛbhiḥ sārdhaṃ suśarmā'hvayate'cyuta //

dīryate cottareṇaiva tatsainyaṃ madhusūdana /
dvaidhībhūtaṃ mano me'dya kṛtaṃ saṃśaptakairidam //

kinnu saṃśaptakānhanmi svānrakṣāmyahitārditān /
iti me tvaṃ mataṃ vetsi tatra kiṃ sukṛtaṃ bhavet //

evamuktastu dāśārhaḥ syandanaṃ pratyavartayat /
yena trigartādhipatiḥ pāṇḍavaṃ samupāhvayat //

tato'rjunaḥ suśarmāṇaṃ viddhvā saptabhirāśugaiḥ /
dhvajaṃ dhanuścāsya tathā kṣurābhyāṃ samakṛntata //

trigartādhipateścāpi bhrātaraṃ ṣaṅbhirāśugaiḥ /
sāśvaṃ sasūtaṃ tvaritaḥ pārthaḥ praiṣīdyamakṣayam //

tato bhujagasaṅkāśāṃ suśarmā śaktimāyasīm /
cikṣepārjunamādiśya vāsudevāya tomaram //

śaktiṃ tribhiḥ śaraiśchittvā tomaraṃ tribhirarjunaḥ /
suśarmāṇaṃ śaravrātairmohayitvā nyavartayat //

taṃ vāsavamivāyāntaṃ bhūrivarṣaṃ śaraughiṇam /
rājaṃstāvakasainyānāṃ nograṃ kaścidavārayat //

tato dhanañjayo bāṇaiḥ sarvāneva mahārathān /
āyādvinighnankauravyāndahankakṣamivānalaḥ //

tasya vegamasahyaṃ taṃ kuntīputrasya dhīmataḥ /
nāśaknuvaṃste saṃsoḍhuṃ sparśamagneriva prajāḥ //

saṃveṣṭayannanīkāni śaravarṣeṇa pāṇḍavaḥ /
suparṇa iva nāgendraṃ prāyātprāgjyotiṣaṃ prati //

yattadānāmayajjiṣṇurbharatānāmapāpinām /
dhanuḥ kṣemakaraṃ saṅkhye dviṣatāmaśruvardhanam //

tadeva tava putrasya rājandurdyūtadevinaḥ /
kṛte kṣatravināśāya dhanurāyacchadarjunaḥ //

tathā vikṣobhyamāṇā sā pārthena tava vāhinī /
vyaśīryata mahārāja naurivāsādya parvatam //

tato daśasahasrāṇi nyavartanta dhanuṣmatām /
matiṃ kṛtvā raṇe krūrāṃ vīrā jayaparājaye //

vyapetahṛdayatrāsā āvavrustaṃ mahārathāḥ /
ārcchatpārtho guruṃ bhāraṃ sarvabhārasaho yudhi //

yathā nalavanaṃ kruddhaḥ prabhinnaḥ ṣaṣṭihāyanaḥ /
mṛdgīyāttadvadāyastaḥ pārtho'mṛdgāccamūṃ tava //

tasminpramathite sainye bhagadatto narādhipaḥ /
tena nāgena sahasā dhanañjayamupādravat //

taṃ rathena naravyāghraḥ pratyagṛhṇāddhanañjayaḥ /
sa sannipātastumulo babhūva naranāgayoḥ //

kalpitābhyāṃ yathāśāstraṃ rathena ca gajena ca /
saṅgrāme ceraturvīrau bhagadattadhanañjayau //

tato jīmūtasaṅkāśānnāgādindra iva prabhuḥ /
abhyavarṣaccharaugheṇa bhagadatto dhanañjayam //

sa cāpi śaravarṣaṃ taṃ śaravarṣeṇa vāsivaḥ /
aprāptameva ciccheda bhagadattasya vīryavān //

tataḥ prāgjyotiṣo rājā śaravarṣe nivārite /
saṃraktanayano roṣātpārthaṃ punaravākirat //

sa tathā śaravarṣeṇa pārthaṃ samabhihatya vai /
codayāmāsa taṃ nāgaṃ vadhāyācyutapārthayoḥ //

tamāpatantaṃ dviradaṃ dṛṣṭvā kruddhamivāntakam /
cakre'pasavyaṃ tvaritaḥ syandanena janārdanaḥ //

samprāptamapi neyeṣa parāvṛttaṃ mahādvipam /
sārohaṃ mṛtyusātkartuṃ smarandharmaṃ dhanañjayaḥ //

sa tu nāgo dviparathānhayāṃścāmṛdya māriṣa /
prāhiṇonmṛtyulokāya tataḥ kruddho dhanañjayaḥ //