Mahabharata · Chapter 7.27

yanmāṃ pārthasya saṅgrāme karmāṇi paripṛcchasi /
tṛcchṛṇuṣva mahābāho pārtho yadakarodraṇe //

rajo dṛṣṭvā samudbhūtaṃ śrutvā ca gajaniḥsvanam /
bhagadatte vikurvāṇe kaunteyaḥ kṛṣṇamabravīt //

yathā prāgjyotiṣo rājā gajena madhusūdana /
tvaramāṇo'bhiniṣkrānto dhruvaṃ tasyaiṣa niḥsvanaḥ //

indrādanavaraḥ saṅkhye gajayānaviśāradaḥ /
prathamo gajaghodhānāṃ pṛthivyāmiti me matiḥ //

sa cāpi dviradaśreṣṭhaḥ sadā'pratigajo yudhi /
sarvaśastrātigaḥ saṅkhye kṛtakarmā jitaklamaḥ //

sahaḥ sastranipātānāmagnisparśasya cānagha /
sa pāṇ़ḍavabalaṃ sarvamadyaiko nāśayiṣyati //

siṃhanādaṃ mahatkṛtvā dhanurbāṇaravaiḥ saha / vidrāvyamāṇaṃ sampaśya hatabhūyiṣṭhanāyakam /
dṛṣṭvā vinadya sahasā mama senāṃ pramṛdgati //

na cāvābhyāmṛte'nyo'sti śaktastaṃ pratibādhitum /
tvaramāṇastato yāhi yataḥ prāgjyotiṣādhipaḥ //

dṛptaṃ saṅkhye dvipabalādvayasā cāpi vismitam /
adyainaṃ preṣayiṣyāmi balahantuḥ priyātithim //

vacanādatha kṛṣṇastu prayayau savyasācinaḥ /
dīryate bhagadattena yatra pāṇḍavavāhinī //

taṃ prayāntaṃ tataḥ paścādāhvayanto mahārathāḥ /
saṃśaptakāḥ samārohansahasrāṇi caturdaśa //

daśaiva tu sahasrāṇi trigartānāṃ mahārathāḥ /
catvāri ca sahasrāṇi vāsudevasya cānugāḥ //

dīryamāṇāṃ camūṃ dṛṣṭvā bhagadattena māniṣa /
āhūyamānasya ca tairabhavaddhṛdayaṃ dvidhā //

kinnu śreyaskaraṃ karma bhavedadyetyacintayat /
iha vā vinivarteyaṃ gaccheyaṃ vā yudhiṣṭhiram //

tasya buddhyā vicāryaivamarjunasya kurūdvaha /
abhavadbhūyasī buddhiḥ saṃśaptakavadhe sthirā //

sa sannivṛttaḥ sahasā kapipravaraketanaḥ /
eko rathasahasrāṇi nihantuṃ vāsavī raṇe //

sā hi duryodhanasyāsīnmatiḥ karṇasya cobhayoḥ /
arjunasya vadhopāye yā vai dvaidhamakalpayat //

sa tu dolāyamāno'būddvaidhībhāvena pāṇḍavaḥ /
vadhena tu narāgryāṇāmakarottāṃ mṛṣā tadā //

tataḥ śatasahasrāṇi śarāṇāṃ nataparvaṇām /
asṛjannarjune rājansaṃśaptakamahārathāḥ //

naiva kuntīsutaḥ pārtho naiva kṛṣṇo janārdanaḥ /
na hayā na ratho rājandṛśyante sma śaraiścitāḥ //

tadā mohamanuprāptaḥ siṣvide hi janārdanaḥ /
tatastānprāyaśaḥ pārtho brahmāstreṇa nijaghnivān //

śataśaḥ pāṇayaśchinnāḥ seṣujyātalakārmukāḥ /
ketavo vājinaḥ sūtā rathinaścāpatankṣitau //

drumācalāgrāmbudharaiḥ samakāyāḥ sukalpitāḥ /
hatārohāḥ kṣitau peturdvipāḥ pārthaśarāhatāḥ //

vipraviddhakuthā nāgāśchinnabhāṇḍāḥ parāsavaḥ /
sārohāstu raṇe peturmathitā mārgaṇairbhṛśam //

sarṣṭiprāsāsinakharāḥ samudgaraparaśvathāḥ /
vicchinnā bāhavaḥ peturnṛṇāṃ bhallaiḥ kirīṭinā //

bālādityāmbujendūnāṃ tulyarūpāṇi māriṣa /
sañcchinnānyarjunaśaraiḥ śirāṃsyurvī prapedire //

jajvālālaṅkṛtā senā patribhiḥ prāṇibhojanaiḥ /
nānārūpaistadā'mitrānkruddhenighnati phalgune //

kṣobhayantaṃ tadā senāṃ dviradaṃ nalinīmiva /
dhanañjayaṃ bhūtagaṇāḥ sādhusādhvityapūjayan //

dṛṣṭvā tatkarma pārthasya vāsavasyeva mādhavaḥ /
vismayaṃ paramaṃ gatvā prāñjalistamuvāca ha //

karmaitatpārtha śakreṇa yamena dhanadena ca /
duṣkaraṃ samare yatte kṛtamadyeti me matiḥ //

yugapaccaiva saṅgrāme śataśo'tha sahasraśaḥ /
patitā eva me dṛṣṭāḥ saṃśaptakamahārathāḥ //

saṃśaptakāṃstato hatvā bhūyiṣṭhā ye vyavasthitāḥ /
bhagadattāya yāhīti kṛṣṇaṃ pārtho'bhyanodayat //