Mahabharata · Chapter 7.25

mahadbhairavamāsīnnaḥ sannivṛtteṣu pāṇḍuṣu /
dṛṣṭvā droṇaṃ chādyamānaṃ tairbhāskaramivāmbudaiḥ //

taiścodbhūtaṃ rajastīvramavacakre camūṃ tava /
tato hatamamaṃsyāma droṇaṃ dṛṣṭipathe hate //

tāṃstu śūrānmaheṣvāsānkrūraṃ karma cikīrṣataḥ /
dṛṣṭvā duryodhanastūrṇaṃ svasainyaṃ samacūcudat //

yathāśakti yathotsāhaṃ yathāsatvaṃ narādhipāḥ /
vārayadhvaṃ yathāyogaṃ pāṇḍavānāmanīkinīm //

tato durmarṣaṇo bhīmamabhyagacchatsutastava /
ārāddṛṣṭvā kiranbāṇairicchandoṇasya jīvitam //

taṃ bāṇeravatastāra kruddho mṛtyurivāhave /
taṃ ca bhīmo'tudadbāṇaistadā'sīttumulaṃ mahat //

ta īśvarasamādiṣṭāḥ prājñāḥ śūrāḥ prahāriṇaḥ /
rājyaṃ mṛtyubhayaṃ tyaktvā pratyatiṣṭhanparānyudhi //

kṛtavarmā śineḥ pautraṃ droṇaṃ prepsuṃ viśāmpate /
paryavārayadāyāntaṃ śūraṃ samaraśobhinam //

taṃ śaineyaḥ śaravrātaiḥ kruddhaḥ kruddhamavārayat /
kṛtavarmā ca śaineyaṃ matto mattamiva dvipam //

saindhavaḥ kṣatravarmāṇamāyāntaṃ niśitaiḥ śaraiḥ /
ugradhanvā maheṣvāsaṃ yattato droṇādavārayat //

kṣatravarmā sindhupateśchittvā ketatanakārmuke /
nārācairdaśabhiḥ kruddhaḥ sarvamarmasvatāḍayat //

athānyaddhanurādāya saindhavaḥ kṛtahastavat /
vivyādha kṣatravarmāṇaṃ raṇe sarvāyasaiḥ śaraiḥ //

yuyutsuṃ pāṇḍavārthāya yatamānaṃ mahāratham /
subāhurbhārataṃ śūraṃ yatto droṇādavārayat //

subāhoḥ sadhanurbāṇāvasyataḥ parighopamau /
yuyutsuḥ śitapītābhyāṃ kṣurābhyāmacchinadbhujau //

rājānaṃ pāṇḍavaśreṣṭhaṃ dharmātmānaṃ yudhiṣṭhiram /
veleva sāgaraṃ kṣubdhaṃ madrarāṭ samavārayat //

taṃ dharmarājo bahubhirmarmabhidbhiravākirat /
madreśastaṃ catuḥṣaṣṭyā śarairviddhvā'nadadbhṛśam //

tasya nānadataḥ ketumuccakarta ca kārmukam /
kṣurābhyāṃ pāṇḍavo jyeṣṭhastata uccukruśurjanāḥ //

tathaiva rājā bāhlīko rājānaṃ drupadaṃ śaraiḥ /
ādravantaṃ sahānīkaḥ sahānīkaṃ nyavārayat //

tadyuddhamabhavaddhoraṃ vṛddhayoḥ sahasenayoḥ /
yathā mahāyūthapayordvipayoḥ samprabhinnayoḥ //

vindānuvindāvāvantyau virāṭaṃ matsyamārcchatām /
sahasainyau sahānīkaṃ yathendrāgnī purā balim //

tadutpiñjalakaṃ yuddhamāsīddevāsuropamam /
matsyānāṃ kekayaiḥ sārdhamabhītāśvarathadvipam //

nākuliṃ tu śatānīkaṃ bhūtakarmā sabhāpatiḥ /
asyantamiṣujālāni yāntaṃ droṇādavārayat //

tato nakuladāyādastribhirbhallaiḥ susaṃśitaiḥ /
cakre vibāhuśirasaṃ bhūtakarmāṇamāhave //

sutasomaṃ tu vikrāntamāyāntaṃ taṃ śaraughiṇam /
droṇāyābhimukhaṃ vīraṃ sālvo bāṇairavārayat //

sa tu bhīmarathaḥ sālvamāśugairāyasaiḥ śitaiḥ /
ṣaḍbhiḥ sāśvaniyantāramanayadyamasādanam //

śrutakīrtiṃ samāyāntaṃ mayūrasadṛśairhayaiḥ /
citraseno mahārāja tava pautraṃ nyavārayat //

tamārjuniḥ śaraiścakre pitṛvyaṃ jarjharacchavim /
śaraiśca draupadīputraṃ citrasenaḥ samāvṛṇot //

kirantaṃ śarajālāni prabhinnamiva kuñjaram /
śrutakarmāṇamāyāntaṃ dauśśāsaniravārayat //

tau pautrau tava durdharṣau parasparavadhaiṣiṇau /
pitṝṇāmarthasiddhyarthaṃ cakraturyuddhamuttamam //

tiṣṭhantamagre taṃ dṛṣṭvā prativindhyaṃ mahāhave /
drauṇirmānaṃ pituḥ kurvanmārgaṇaiḥ samavārayat //

taṃ kruddhaṃ prativivyādha prativindhyaḥ śitaiḥ śaraiḥ /
siṃhalāṅgūlalakṣmāṇaṃ piturarthe vyavasthitam //

pravapanniva bījāni bījakāle kṛṣīvalaḥ /
drauṇāyanirdraupadeyaṃ śaravarṣairavākirat //

yastu śūratamo rājannubhayoḥ senayormataḥ /
taṃ paṭaccarahantāraṃ lakṣmaṇaḥ samavārayat //

sa lakṣmaṇasyeṣvasanaṃ chittvā lakṣma ca bhārata /
lakṣmaṇe śarajālāni visṛjanbahvaśobhata //

tato'bhimanyuḥ karmāṇi kurvantaṃ citrayodhinam /
ārjuniḥ kṛtinaṃ śūraṃ lakṣmaṇaṃ samayodhayat //

sa samprahārastumulastayorāsīnmahātmanoḥ /
śrotṝṇāmīkṣitṝṇāṃ ca bhṛśaṃ prītivivardhanaḥ //

vikarṇastu mahāprājño yājñaseniṃ śikhaṇḍinam /
paryavārayadāyāntaṃ yuvānaṃ samare yuvā //

tatastamiṣujālena yājñaseniḥ samāvṛṇot /
vidhūya tadbāṇajālaṃ babhau tava suto balī //

aṅgado'bhimukhaṃ vīramuttamaujasamāhave /
droṇāyābhimukhaṃ yāntaṃ śaraugheṇa nyavārayat //

sa samprahārastumulastayoḥ puruṣasiṃhayoḥ /
sainikānāṃ ca sarveṣāṃ tayośca prītivardhanaḥ //

durmukhastu maheṣvāso vīraṃ purujitaṃ balī /
droṇāyābhimukhaṃ yāntaṃ vatsadantairavārayat //

sa durmukhaṃ bhruvormadhye nārācenābhyatāḍayat /
tasya taddhi babhau vaktraṃ sanālamiva paṅkajam //

karṇastu kekayānbhrātṝnpañca lohitakadhvajān /
droṇāyābhimukhaṃ yātāñśaravarṣairavārayat //

te cainaṃ bhṛśasantaptāḥ śaravarṣairavākiran /
sa ca tāṃśchādayāmāsa śarajālaiḥ punaḥ punaḥ //

naiva karṇo na te pañca dadṛśarbāṇasaṃvṛtāḥ /
sāśvasūtadhvajarathāḥ parasparaśarācitāḥ //

putrāste durjayaścaiva jayaśca vijayaśca ha /
nīlakāśyajayatsenāṃstrayastrīnpratyavārayan //

tadyuddhamabhavaddhoramīkṣitṛprītivardhanam /
siṃhavyāghratarakṣūṇāṃ yatharkṣamahiṣarṣabhaiḥ //

kṣemadhūrtibṛhantau tu bhrātarau sātvataṃ yudhi /
droṇāyābhimukhaṃ yāntaṃ śaraistīkṣṇaistatakṣatuḥ //

tayostasya ca tadyuddhamatyadbhutamivābhavat / siṃhasya dvipamukhyābhyāṃ prabhinnābhyāṃ yathā vane /

rājānaṃ tu tathāmbaṣṭhamekaṃ yuddhābhinandinam /
cedirājaḥ śarānasyankruddho droṇādavārayat //

tato'mbaṣṭho'sthibhedinyā nirabhidyacchalākayā /
sa tyaktvā saśaraṃ cāpaṃ rathādbhūmimupāgamat //

vārdhakṣemiṃ tu vārṣṇeyaṃ kṛpaḥ śāradvataḥ śaraiḥ /
akṣudraḥ kṣudrakairbāṇaiḥ kruddharūpamavārayat //

yudhyantau kṛpavārṣṇeyau ye'paśyaṃścitrayodhinau /
te yuddhāsaktamanaso nānyaṃ bubudhire kriyām //

saumadattistu rājānaṃ maṇimantamatandritam /
paryavārayadāyāntaṃ yaśo droṇasya varghayan //

sa saumadattestvaritaścitreṣvasanaketane /
punaḥ patākāṃ sūtaṃ cacchatraṃ cāpātayadrathāt //

athāplutya rathāttūrṇaṃ yūpaketuramitrahā /
sāśvasūtadhvajarathaṃ taṃ cakarta varāsinā //

rathaṃ ca svaṃ samāsthāya dhanurādāya cāparam /
svayaṃ yacchanhayānrājanvyadhamatpāṇḍavīṃ camūm //

pāṇḍyamindramivāyāntamasurānprati durjayam /
samarthaḥ sāyakaughena vṛṣaseno nyavārayat //

athājagāma haiḍimbo mahāmāyo mahābalaḥ /
pitṝṇāṃ hitamanvicchandahankauravavāhinīm //

gadāparighanistriṃśapaṭṭasāyoghanopalaiḥ /
kaḍaṅgarairbhuśuṇḍībhiḥ prāsaistomarasāyakaiḥ //

musalairmudgaraiścakrairnbhiṇḍipālaparaśvathaiḥ /
pāṃsuvātāgnisalilairbhasmaloṣṭhatṛṇadrumaiḥ //

ātudanprarujanbhañjannighnanvidrāvayankṣipan /
senāṃ vibhīṣayannāyāddoṇaprepsurghaṭotkacaḥ //

taṃ tu nānāpraharaṇairnānāyuddhaviśeṣaṇaiḥ /
rākṣasaṃ rākṣasaḥ kruddhaḥ samājaghne hyalambusaḥ //

tayostadabhavadyuddhaṃ rakṣogrāmaṇimukhyayoḥ /
tādṛgyādṛkpurāvṛttaṃ śambarāmararājayoḥ //

evaṃ dvandvaśatānyāsanrathavāraṇavājinām /
padātīnāṃ ca bhadraṃ te tava teṣāṃ ca saṅkule //

naitādṛśo dṛṣṭapūrvaḥ saṅgrāmo naiva ca śrutaḥ /
droṇasyābhāvabhāve tu prasaktānāṃ parasparam //

idaṃ ghoramidaṃ citramidaṃ raudramiti prabho /
tatra yuddhānyadṛśyanta pratatāni bahūni ca //