Mahabharata · Chapter 7.24

vyathayeyurime senāṃ devānāmapi sañjaya /
āhave ye nyavartanta vṛkodaramukhā nṛpāḥ //

samprayuktaḥ kilaivāyaṃ diṣṭairbhavati pūruṣaḥ /
tasminneva ca sarvārthāḥ pradṛśyante pṛthagvidhāḥ //

dīrghaṃ viproṣitaḥ kālamaraṇye jaṭilo'jinī /
ajñātaścaiva lokasya vijahāra yudhiṣṭhiraḥ //

sa eva mahatīṃ senāṃ samāvartayadāhave /
kimanyaddaivasaṃyogānmama putrābhavāya ca //

yukta eva hi bhāgyena dhruvamutpadyate naraḥ /
sa tathā'kṛṣyate tena na yathā svayamicchati //

dyūtavyasanamāsādya kleśito hi yudhiṣṭhiraḥ /
sa punarbhāgadheyena sahāyānupalabdhavān //

arthe me kekayā labdhāḥ kāśikā kosalāścaye /
cedīnāṃ cārdhamapare māme va samupāśritāḥ //

pṛthivī bhūyasī tāta mama pārthasya no tathā /
iti māmabravītsūta mando duryodhanaḥ purā //

tasya senāsamūhasya madhye droṇaḥ surakṣitaḥ /
nihataḥ pārṣatenājau kimanyadbhāgadheyataḥ //

madhye rājñāṃ mahābāhuṃ sadā yuddhābhinandinam /
sarvāstrapāragaṃ droṇaṃ kathaṃ mṛtyurupeyivān //

samanuprāptakṛcchro'haṃ mohaṃ paramamāgataḥ /
bhīṣmadroṇau hatau śrutvā nāhaṃ jīvitumutsahe //

yanmāṃ kṣattā'bravīttāta prapaśyanputragṛddhinam /
duryodhanena tatsarvaṃ prāptaṃ sūta mayā saha //

nṛśaṃsaṃ tu paraṃ tāta tyaktvā duryodhanaṃ yadi /
putraśeṣaṃ cikīrṣeyaṃ kṛtsnaṃ na maraṇaṃ vrajet //

yo hi dharmaṃ parityajya bhavatyarthaparo naraḥ /
so'smācca hīyate lokātkṣudrabhāvaṃ ca gacchati //

adya cāpyasya rāṣṭrasya kṛtocchedasya sañjaya /
avaśeṣaṃ na paśyāmi kakude mṛdite sati //

kathaṃ syādavaśeṣo hi dhuryayorabhyatītayoḥ /
yau nityamupajīvāmaḥ kṣamiṇau puruṣarṣabhau //

vyaktameva ca me śaṃsa yathā yuddhamavartata /
ke'yudhyanke vyapākurvanke kṣudrāḥ prādravanbhayāt //

dhanuñjayaṃ ca me śaṃsa yadyaccakre ratharṣabhaḥ /
tasmādbhayaṃ no bhūyiṣṭhaṃ bhrātṛvyācca vṛkodarāt //

yathā'sīcca nivṛtteṣu pāṇḍaveyeṣu sañjaya /
mama sainyāvaśeṣasya sannipātaḥ sudāruṇaḥ //

kathaṃ ca vo manastāta nivṛtteṣvabhavattadā /
māmakānāṃ ca ye śūrāḥ ke kāṃstatra nyavārayan //