મહાભારત · અધ્યાય 7.24

વ્યથયેયુરિમે સેનાં દેવાનામપિ સઞ્જય ।
આહવે યે ન્યવર્તન્ત વૃકોદરમુખા નૃપાઃ ॥

સમ્પ્રયુક્તઃ કિલૈવાયં દિષ્ટૈર્ભવતિ પૂરુષઃ ।
તસ્મિન્નેવ ચ સર્વાર્થાઃ પ્રદૃશ્યન્તે પૃથગ્વિધાઃ ॥

દીર્ઘં વિપ્રોષિતઃ કાલમરણ્યે જટિલોઽજિની ।
અજ્ઞાતશ્ચૈવ લોકસ્ય વિજહાર યુધિષ્ઠિરઃ ॥

સ એવ મહતીં સેનાં સમાવર્તયદાહવે ।
કિમન્યદ્દૈવસંયોગાન્મમ પુત્રાભવાય ચ ॥

યુક્ત એવ હિ ભાગ્યેન ધ્રુવમુત્પદ્યતે નરઃ ।
સ તથાઽકૃષ્યતે તેન ન યથા સ્વયમિચ્છતિ ॥

દ્યૂતવ્યસનમાસાદ્ય ક્લેશિતો હિ યુધિષ્ઠિરઃ ।
સ પુનર્ભાગધેયેન સહાયાનુપલબ્ધવાન્ ॥

અર્થે મે કેકયા લબ્ધાઃ કાશિકા કોસલાશ્ચયે ।
ચેદીનાં ચાર્ધમપરે મામે વ સમુપાશ્રિતાઃ ॥

પૃથિવી ભૂયસી તાત મમ પાર્થસ્ય નો તથા ।
ઇતિ મામબ્રવીત્સૂત મન્દો દુર્યોધનઃ પુરા ॥

તસ્ય સેનાસમૂહસ્ય મધ્યે દ્રોણઃ સુરક્ષિતઃ ।
નિહતઃ પાર્ષતેનાજૌ કિમન્યદ્ભાગધેયતઃ ॥

મધ્યે રાજ્ઞાં મહાબાહું સદા યુદ્ધાભિનન્દિનમ્ ।
સર્વાસ્ત્રપારગં દ્રોણં કથં મૃત્યુરુપેયિવાન્ ॥

સમનુપ્રાપ્તકૃચ્છ્રોઽહં મોહં પરમમાગતઃ ।
ભીષ્મદ્રોણૌ હતૌ શ્રુત્વા નાહં જીવિતુમુત્સહે ॥

યન્માં ક્ષત્તાઽબ્રવીત્તાત પ્રપશ્યન્પુત્રગૃદ્ધિનમ્ ।
દુર્યોધનેન તત્સર્વં પ્રાપ્તં સૂત મયા સહ ॥

નૃશંસં તુ પરં તાત ત્યક્ત્વા દુર્યોધનં યદિ ।
પુત્રશેષં ચિકીર્ષેયં કૃત્સ્નં ન મરણં વ્રજેત્ ॥

યો હિ ધર્મં પરિત્યજ્ય ભવત્યર્થપરો નરઃ ।
સોઽસ્માચ્ચ હીયતે લોકાત્ક્ષુદ્રભાવં ચ ગચ્છતિ ॥

અદ્ય ચાપ્યસ્ય રાષ્ટ્રસ્ય કૃતોચ્છેદસ્ય સઞ્જય ।
અવશેષં ન પશ્યામિ કકુદે મૃદિતે સતિ ॥

કથં સ્યાદવશેષો હિ ધુર્યયોરભ્યતીતયોઃ ।
યૌ નિત્યમુપજીવામઃ ક્ષમિણૌ પુરુષર્ષભૌ ॥

વ્યક્તમેવ ચ મે શંસ યથા યુદ્ધમવર્તત ।
કેઽયુધ્યન્કે વ્યપાકુર્વન્કે ક્ષુદ્રાઃ પ્રાદ્રવન્ભયાત્ ॥

ધનુઞ્જયં ચ મે શંસ યદ્યચ્ચક્રે રથર્ષભઃ ।
તસ્માદ્ભયં નો ભૂયિષ્ઠં ભ્રાતૃવ્યાચ્ચ વૃકોદરાત્ ॥

યથાઽસીચ્ચ નિવૃત્તેષુ પાણ્ડવેયેષુ સઞ્જય ।
મમ સૈન્યાવશેષસ્ય સન્નિપાતઃ સુદારુણઃ ॥

કથં ચ વો મનસ્તાત નિવૃત્તેષ્વભવત્તદા ।
મામકાનાં ચ યે શૂરાઃ કે કાંસ્તત્ર ન્યવારયન્ ॥