Mahabharata · Chapter 7.200

tataḥ sa kadanaṃ cakre ripūṇāṃ droṇanandanaḥ /
yugānte sarvabhūtānāṃ kālasṛṣṭa ivāntakaḥ //

dhvajadrumaṃ śastraśṛṅgaṃ hatanāgamahāśilam /
aśvakimpuruṣākīrṇaṃ śarāsanalatāvṛtam //

kravyādapakṣisaṅghuṣṭaṃ bhūtayakṣaṇākulam /
nihatya śātravānbhallaiḥ so'cinoddehaparvatam //

tato vegena mahatā vinadya sa nararṣabhaḥ /
pratijñāṃ śrāvayāmāsa punareva tavātmajam //

yadatra cchadmanā'cāryaṃ dharmakañcukamāsthitaḥ /
muñca śastramiti prāha kuntīputro yudhiṣṭhiraḥ //

tasmātsampaśyatastasya drāvayiṣyāni vāhinīm /
vidrāvyasarvānhantā'smi jālmaṃ pāñcālyameva tu //

sarvānetānhaniṣyāmi yadi yotsyanti māṃ raṇe /
satyaṃ te pratijānāmi parivartaya vāhinīm //

tacchrutvā tava putrastu vāhinīṃ paryavartayat /
siṃhanādena mahatā vyapohya sumahadbhayam //

tataḥ samāgamo rājankurupāṇḍavasenayoḥ /
punarevābhavattīvraḥ pūrṇasāgarayoriva //

saṃrabdhā hi sthirībhūtā droṇa putreṇa kauravāḥ /
udagrāḥ pāṇḍupāñcālā droṇasya nidhanena ca //

teṣāṃ paramahṛṣṭānāṃ jayamātmani paśyatām /
saṃrabdhānāṃ mahāvegaḥ prādurāsīdviśāmpate //

yathā śiloccaye śailaḥ sāgaraiḥ sāgaro yathā /
pratihanyeta rājendra tathā'sankurupāṇḍavāḥ //

cukṣubhe pṛthivī sarvā diśaśca pratisasvanuḥ / sambhrāntānyapi bhūtāni jalajānyapi māriṣa / te ca sarve tadā yodhāḥ samprahṛṣṭā yuyutsavaḥ //

tataḥ śaṅkhasahasrāṇi bherīṇāmayutāni ca /
avādayanta saṃhṛṣṭāḥ kurupāṇḍavasainikāḥ //

yathā nirmathyamānasya sāgarasya tu niḥsvanaḥ /
abhavattava sainyasya sumahānadbhutopamaḥ //

vartamāne tathā śabde raudre tasminbhayānake /
sampatatsu rathaugheṣu tava teṣāṃ ca bhārata //

prāduścakre tato drauṇirastraṃ nārāyaṇaṃ tadā /
abhisandhāya pāṇḍūnāṃ pāñcālānāṃ ca vāhinīṃ //

prādurāsaṃstato bāṇā dīptāgrāḥ khe sahasraśaḥ /
pāṇḍavānkṣapayiṣyanto dīptāsyaḥ pannagā iva //

te diśaḥ khaṃ ca sainyaṃ ca samāvṛṇvanmahāhave /
muhūrtādbhāskarasyeva loke rājangabhastayaḥ //

tathā'pare dyotamānā jyotīṃṣīvāmalāmbare /
prādurāsanmahārāja kārṣṇāyasamayā guḍāḥ //

catuścakrā dvicakrāśca śataghno bahulā gadāḥ /
cakrāṇi ca kṣurāntāni maṇḍalānīva bhāsvataḥ //

śastrākṛtibhirākīrṇamatīva puruṣarṣabha /
dṛṣṭvāntarikṣamāvignāḥ pāṇḍupāñcālasṛñjayāḥ //

yathāyathā hyayudhyanta pāṇḍavānāṃ mahārathāḥ /
tathātathā tadastraṃ vai vyavardhata janādhipa //

vadhyamānāstadā'streṇa tena nārāyaṇena vai /
dahyamānā'naleneva sarvato'bhyarditā raṇe //

yathā hi śiśirāpāye dahetkakṣaṃ hutāśanaḥ /
tathā tadastraṃ pāṇḍūnāṃ dadāha dhvajinīṃ prabho //

āpūryamāṇenāstreṇa sainye kṣīyati ca prabho /
jagāma paramaṃ trāsaṃ dharmaputro yudhiṣṭhiraḥ //

dravamāṇaṃ tu tatsainyaṃ dṛṣṭvā vigatacetanam /
madhyasthatāṃ ca pārthasya dharmaputro'bravīdidam //

dhṛṣṭadyumna palāyasva saha pāñcālasenayā /
sātyake tvaṃ ca gacchasva vṛṣṇyandhakavṛto mahān //

vāsudevo'pi dharmātmā kariṣyatyātmanaḥ kṣamam /
śreyo hyupadiśatyeṣa lokasya kimutātmanaḥ //

saṅgrāmastu na kartavyaḥ sarvasainyānbravīmi vaḥ /
ahaṃ hi saha sodaryaiḥ pravekṣye havyavāhanam //

bhīṣmadroṇārṇavaṃ tīrtvā saṅgrāme bhīrudustare /
vimajjiṣyāmi salile sagaṇo drauṇigoṣpade //

kāmaḥ sampadyatāmasya bībhatsorāśu māṃ prati /
kalyāṇavṛttirācāryo mayā yudhi nipātitaḥ //

yena bālaḥ sa saubhadro yuddhānāmaviśāradaḥ /
samarthairbahubhiḥ krūrairghātito nābhipālitaḥ //

yena vibruvatī praśnaṃ tathā kṛṣṇā sabhāṃ gatā /
upekṣitā saputreṇa dāsībhāvaṃ niyacchatī //

rakṣaṇe ca mahānyatnaḥ saindhavasya kṛto yudhi /
arjunasya vighātārthaṃ pratijñā yena rakṣitā //

vyūhadvāri vayaṃ caiva dhṛtā yena jigīṣavaḥ /
vāritaṃ ca mahatsainyaṃ praviśattadyathābalam //

jighāṃsurdhārtarāṣṭraśca śrānteṣvanyeṣu phalgunam /
kavacena tathā gupto rakṣārthaṃ saindhavasya ca //

yena brahmāstraviduṣā pāñcālāḥ satyajinmukhāḥ /
kurvāṇā majjaye yatnaṃ samūlā vinipātitāḥ //

grahaṇe ca paro yatnaḥ kṛtastena yathā mama /
viditaṃ sarvamevaitadbhavatāṃ sarvayodhinām //

yena pravrājyamānāśca rājyādvayamadharmataḥ /
nivāryamāṇenāsmābhiranugantuṃ tadeṣitāḥ //

vanavāsānnivṛttānāṃ samaye ca tathā kṛte /
snehaśca darśito nityaṃ pratyakṣaṃ vo mahārathāḥ //

yo'sāvatyantamasmāsu kurvāṇaḥ sauhṛdaṃ param /
hatastadarthe maraṇaṃ gamiṣyāmi sabāndhavaḥ //
sañjaya uvāca /

evaṃ bruvati kaunteye dāśārhastvaritastataḥ /
nivārya sainyaṃ bāhubhyāmidaṃ vacanamabravīt //

śīghraṃ nyasyata śastrāṇi vāhebhyaścāvarohata /
eṣa yogo'tra vihitaḥ pratighāte mahātmanaḥ //

dvipāśvasyandanebhyaśca kṣitiṃ sarve'varohata /
evametanna vo hanyādastraṃ bhūmau nirāyudhān //

yathāyathā hi yudhyante yodhā hyastramidaṃ prati /
tathātathā bhavantyete kauravā balavattarāḥ //

nikṣepsyanti ca śastrāṇi vāhanebhyo'varuhya ye / ye'ñjaliṃ kurvate vīra namasti ca vivāhanāḥ /
tānnaitadastraṃ saṅgrāme nihaniṣyati mānavān //

ye tvetatpratiyotsyanti manasā'pīha kecana /
nihaniṣyati tānsarvānrasātalagatānapi //

te vacastasya tacchrutvā vāsudevasya bhārata /
īṣuḥ sarve samutsraṣṭuṃ manobhiḥ karaṇena ca //

tata utsraṣṭukāmāṃstānastrāṇyālakṣya pāṇḍavaḥ /
bhīmaseno'bravīdrājannidaṃ saṃharṣayanvacaḥ //

na kathañcana śastrāṇi moktavyānīha kenacit /
ahamāvārayiṣyāmi droṇaputrāstramāśugaiḥ //

gadayā'pyanayā gurvyā hemavigrahayā raṇe /
kālavatprahariṣyāmi drauṇerastraṃ viśātayan //

na hi me vikrame tulyaḥ kaścidasti pumāniha /
yathaiva savitustulyaṃ jyotiranyanna vidyate //

paśyatemau hi me bāhū nāgarājakaropamau /
samarthau parvatasyāpi śaiśirasya nipātane //

nāgāyutasamaprāṇo hyahameko nareṣviha /
śakro yathā'pratidvandvo divi deveṣu viśrutaḥ //

adya paśyata me vīryaṃ bāhvoḥ pīnāṃsayoryudhi /
jvalamānasya dīptasya drauṇerastrasya vāraṇe //

yadi nārāyaṇāstrasya pratiyodvā na vidyate /
adyaitatpratiyotsyāmi paśyatsu kurupāṇḍupu //

arjunārjuna bībhatso na nyasyaṃ gāṇḍivaṃ tvayā /
śaśāṅkasyeva te paṅko nairmalyaṃ pātayiṣyati //
arjuna uvāca /

bhīma nārāyaṇāstre me goṣu ca brāhmaṇeṣu ca /
eteṣu gāṇḍivaṃ nyasyametaddhi vratamuttamam //

evamuktastato bhīmo droṇaputramarindamam /
abhyayānmeghaghoṣeṇa rathenādityavarcasā //

kampayanmedinīṃ sarvāṃ trāsayaṃśca camūṃ tava /
śaṅkhaśabdaṃ mahatkṛtvā bhujaśabdaṃ ca pāṇḍavaḥ //

tasya śaṅkhasvanaṃ śrutvā bāhuśabdaṃ ca tāvakāḥ /
samantātkoṣṭhakīkṛtya śaravrātairavākiran //

sa enamiṣujālena laghutvācchīghravikramaḥ /
nimeṣamātreṇāsādya kuntīputro'bhyavākirat //

tato drauṇiḥ prahasyainaṃ dravantamabhibhāṣya ca /
avākiratpradīptāgraiḥ śaraistairabhimantritaiḥ //

pannagairiva dīptāsyairvamadbhirjvalanaṃ raṇe /
avakīrṇo'bhavatpārthaḥ sphuliṅgairiva kāñcanaiḥ //

tasya rūpamabhūdrājanbhīmasenasya saṃyuge /
khadyotairāvṛtasyeva parvatasya dinakṣaye //

tadastraṃ droṇaputrasya tasminpratisamasyati /
avardhata mahārāja yathā'gniraniloddhataḥ //

vivardhamānamālakṣya tadastraṃ bhīmavikramam /
pāṇḍusainyamṛte bhīmaṃ sumahadbhayamāviśat //

tataḥ śastrāṇi te sarve samutsṛjya mahītale /
avārohanrathebhyaśca hastyaśvebhyaśca sarvaśaḥ //

teṣu nikṣiptaśastreṣu vāhanebhyaścyuteṣu ca /
tadastravīryaṃ vipulaṃ bhīmamūrdhanyathāpatat //

hāhākṛtāni bhūtāni pāṇḍavāśca viśeṣataḥ /
bhīmasenamapaśyanta tejasā saṃvṛtaṃ tathā //