Mahabharata · Chapter 7.196

chadmanā nihataṃ śrutvā pitaraṃ pāpakarmaṇā /
bāṣpeṇāpūryata drauṇī roṣeṇa ca nararṣabha //

tasya kruddhasya rājendra vapurdīptamadṛśyata /
antakasyeva bhūtāni jihīrṣoḥ kālaparyaye //

aśrūpurṇe tato netre vyapamṛjya punaḥ punaḥ /
uvāca kopānniḥśvasya duryodhanamidaṃ vacaḥ //

pitā mama yathā kṣudrairnyastaśastro nipātitaḥ / dharmadhvajavatā pāpaṃ kṛtaṃ tadviditaṃ mama /
anāryaṃ sunṛśaṃsaṃ ca dharmaputrasya me śrutam //

yuddheṣvapi pravṛttānāṃ dhruvaṃ jayaparājayau /
dvayametadbhavedrājanvadhastatra praśasyate //

nyāyavṛtto vadho yastu sanṅgrāme yudhyato bhavet /
na sa duḥkhāya bhavati tathā dṛṣṭo hi sa dvijaiḥ //

gataḥ sa vīralokāya pitā mama na saṃśayaḥ /
na śocyaḥ puruṣavyāghra yastadā nidhanaṃ gataḥ //

yattu dharmapravṛtaḥ sankeśagrahaṇamāptavān /
paśyatāṃ sarvasainyānāṃ tanme marmāṇi kṛntati //

mayi jīvati yattātaḥ keśagrahamavāptavān /
kathamanye kariṣyanti putrebhyaḥ putriṇaḥ spṛhām //

kāmātkrodhādavijñānādvarṣādbālyena vā punaḥ /
vidharmakāṇi kurvanti tathā paribhavanti ca //

tadidaṃ pārṣateneha mahadādharmikaṃ kṛtam /
avajñāya ca māṃ nūnaṃ nṛśaṃsena durātmanā //

tasyānubandhaṃ draṣṭā'sau dhṛṣṭadyumnaḥ sudāruṇam /
akāryaṃ paramaṃ kṛtvā mithyāvādī ca pāṇḍavaḥ //

yo hyasau chadmanā'cāryaṃ śastraṃ sannyāsayattadā /
tasyādya dharmarājasya bhūmiḥ pāsyati śoṇitam //

śape satyena kauravya iṣṭāpūrtena caiva ha /
ahatvā sarvapāñcālāñjīveyaṃ na kathañcana //

sarvopāyairyatiṣyāmi pāñcālānāmahaṃ vadhe /
dhṛṣṭadyumnaṃ ca samare hantā'haṃ pāpakāriṇam //

karmaṇā yena teneha mṛdunā dāruṇena ca /
pāñcālānāṃ vadhaṃ kṛtvā śāntiṃ labdhāsmi kaurava //

yadarthaṃ puruṣavyāghra putrānicchanti mānavāḥ /
pretya ceha ca samprāptāttrāyante mahato bhayāt //

pitrā tu mama sā'vasthā prāptā nirbandhunā yathā /
mayi śailapratīkāśe putre śiṣye ca jīvati //

dhiṅmamāstrāṇi divyāni dhigbāhū dhikparākramam /
yaṃ sma droṇaḥ sutaṃ prāpya keśagrahamavāptavān //

sa tathāhaṃ kariṣyāsi yathā bharatasattama /
paralokagatasyāpi bhaviṣyāmyanṛṇaḥ pituḥ //

āryeṇa hi na vaktavyā kadācitstutirātmanaḥ /
piturvadhamamṛṣyaṃstu vakṣyāmyadyeha pauruṣam //

adya paśyantu me vīryaṃ pāṇḍavāḥ sajanārdanāḥ /
mṛdgataḥ sarvasainyāni yugāntamiva kurvataḥ //

na hi devā na gandharvā nāsurā na ca rākṣasāḥ /
adya śaktā raṇe jetuṃ rathasthaṃ māṃ nararṣabhāḥ //

madanyo nāsti loke'sminnarjunādvā'stravitkvacit / ahaṃ hi jvalatāṃ madhye mayūkhānāmivāṃśumān /
prayoktā devasṛṣṭānāmastrāṇāṃ pṛtanāgataḥ //

bhṛśamiṣvasanādadya matprayuktā mahāhave /
darśayantaḥ śarā vīryaṃ pramathiṣyanti pāṇḍavān //

adya sarvā diśo rājandhārābhiriva saṅkulāḥ /
āvṛtāḥ patribhistīkṣṇairdraṣṭāro māmakairiha //

vikirañcharajālāni sarvato bhairavasvanān /
śatrūnnipātayiṣyāmi mahāvāta iva drumān //

na hi jānāti bībhatsustadastraṃ na janārdanaḥ /
na bhīmaseno na yamau na ca rājā yudhiṣṭhiraḥ //

na pārṣato durātmā'sau na śikhaṇḍī na sātyakiḥ /
yadidaṃ mayi kauravya sakalyaṃ sanivartanam //

nārāyaṇāya me pitrā praṇamya vidhipūrvakam /
upahāraḥ purā datto brahmarūpa upasthitaḥ //

taṃ svayaṃ pratigṛhyātha bhagavānsa varaṃ dadau /
vavre pitā me paramamastraṃ nārāyaṇaṃ tataḥ //

athainamabravīdrājanbhāgavāndevasattamaḥ /
bhavitā tvatsamo nānyaḥ kaścidyudhi naraḥ kvacit //

na tvidaṃ sahasā brahmanprayoktavyaṃ kathañcana /
na hyetadastramanyatra vadhācchatrornivartate //

na caitacchakyate jetuṃ ko na vadhyeta vai prabho /
avadhyamapi hanyādvi tasmānnaitatprayojayet //

atha saṅkhye rathasyaiva śastrāṇāṃ ca visarjanam /
prayācanaṃ ca śatrūṇāṃ gamanaṃ śaraṇasya ca //

ete praśamane yogā mahāstrasya parantapa /
sarvathā pīḍito hiṃsyādavadhyānpīḍayanraṇe //

tajjagrāha pitā mahyamabravīccaiva sa prabhuḥ / tvaṃ vadhiṣyasi sarvāṇi śastravarṣāṇyanekaśaḥ /
anenāstreṇa saṅgrāme tejasā ca jvaliṣyasi //

evamuktvā sa bhagavāndivamācakrame prabhuḥ /
etannārāyaṇādastraṃ tatprāptaṃ pitṛbandhunā //

tenāhaṃ pāṇḍavāṃścaiva pāñcālānmātsyakekayān /
vidrāvayiṣyāmi raṇe śacīpatirivāsurān //

yathāyathā'hamiccheyaṃ tathā bhūtvā śarā mama /
nipateyuḥ sapatneṣu vikramatsvapi bhārata //

yatheṣṭamaśmavarṣeṇa pravarṣiṣye raṇe sthitaḥ /
ayomukhaiśca vihagairdrāvayiṣye mahārathān //

paraśvathāṃśca niśitānutsrakṣye'hamasaṃśayam //

so'haṃ nārāyaṇāstreṇa mahatā śatrutāpanaḥ /
śatrūnvidhvaṃsayiṣyāmi kadarthīkṛtya pāṇḍavān //

mitrabrahmagurudrohī jālmakaḥ suvigarhitaḥ /
pāñcālāpaśadaścādya na me jīvanvimokṣyate //

tacchrutvā droṇaputrasya paryavartata vāhinī / tataḥ sarve mahāśaṅkhāndadhmuḥ puruṣasattamāḥ /
bherīścābhyahananhṛṣṭā ḍiṇḍibhāṃśca sahasraśaḥ //

tathā nanāda vasudhā khuranemiprapīḍitā /
sa śabdastumulaḥ khaṃ dyāṃ pṛthivīṃ ca vyanādayat //

taṃ śabdaṃ pāṇḍavāḥ śrutvā parjanyaninadopamam /
sametya rathināṃ śreṣṭhāḥ sahitāścāpyamantrayan //

tathoktvā droṇaputrastu vāryupaspṛśya bhārata /
prāduścakāra taddivyamastraṃ nārāyaṇaṃ tadā //