Mahabharata · Chapter 7.195
adharmeṇa hataṃ śrutvā dhṛṣṭadyumnena sañjaya /
brāhmaṇaṃ pitaraṃ vṛddhamaśvatthāmā kimabravīt //
mānavaṃ vāruṇāgneyaṃ brāhmamastraṃ ca vīryavān /
aindraṃ nārāyaṇaṃ caiva yasminnityaṃ pratiṣṭhitam //
tamadharmeṇa dharmiṣṭhaṃ dhṛṣṭadyumnena saṃyuge /
śrutvā nihatamācāryaṃ so'śvatthāmā kimabravīt //
yena rāmādavāpyeha dhanurvedaṃ mahātmanā /
proktānyastrāṇi divyāni putrāya guṇakāṅkṣiṇā //
ekameva hi loke'sminnātmato guṇavattaram /
icchanti puruṣāḥ putraṃ loke nānyaṃ kathañcana //
ācāryāṇāṃ bhavantyeva rahasyāni mahātmanām /
tāni putrāya vā dadyuḥ śiṣyāyānugatāya vā //
sa śiṣyaḥ prāpya tatsarvaṃ saviśeṣaṃ ca sañjaya /
śūraḥ śāradvatīputraḥ saṅkhye droṇādanantaraḥ //
rāmasya tu samaḥ śastre purandarasamo yudhi /
kārtavīryasamo vīrye bṛhaspatisamo matau //
mahīdharasamaḥ sthairye tejasā'gnisamo yuvā /
samudra iva gāmbhīrye krodhe cāśīviṣopamaḥ //
sa rathī prathamo loke dṛḍhadhanvā jitaklamaḥ /
śīghro'nila ivākrande carankruddha ivāntakaḥ //
asyatā yena saṅgrāme dharaṇyabhinipīḍitā / meghastanitanirghoṣaṃ kampate bhayavihvalāḥ /
yo na vyathati saṅgrame vīraḥ satyaparākramaḥ //
vedasnāto vratasnāto dhanurvede ca pāragaḥ /
mahodadhirivākṣobhyo rāmo dāśarathiryathā //
tamadharmeṇa dharmiṣṭhaṃ dhṛṣṭadyumnena saṃyuge /
śrutvā nihatamācāryamaśvatthāmā kimabravīt //
dhṛṣṭadyumnasya yo mṛtyuḥ sṛṣṭastena mahātmanā /
yathā droṇasya pāñcālyo yajñasenasuto'bhavat //
taṃ nṛśaṃsena pāpena krūreṇādīrghadarśinā /
śrutvā nihatamācāryamaśvatthāmā kimabravīt //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0