Mahabharata · Chapter 7.192

taṃ dṛṣṭvā paramodvignaṃ śokopahatacetasam /
pāñcālarājasya suto dhṛṣṭadyumnaḥ samādravat //

ya iṣṭvā manujendreṇa drupadena mahāmakhe /
labdho droṇavināśāya samiddhāddhavyavāhanāt //

sa dhanurjaitramādāya ghoraṃ jaladaniḥsvanam /
dṛḍhajyamajaraṃ divyaṃ śaraṃ cāśīviṣopamam //

sandadhe kārmuke tasmiṃstatastamanalopamam /
droṇaṃ jighāṃstuḥ pāñcālyo mahājvālamivānalam //

tasya rūpaṃ śarasyāsīddhanurjyāmaṇḍalāntare /
dyotato bhāskarasyeva ghanānte pariveṣiṇaḥ //

pārṣatena parāmṛṣṭaṃ jvalantamiva taddhanuḥ /
antakālamanuprāptaṃ menire vīkṣya sainikāḥ //

tamiṣuṃ saṃhataṃ tena bhāradvājaḥ pratāpavān /
dṛṣṭvā'manyata dehasya kālaparyāyamāgatam //

tataḥ prayatnamātiṣṭhadācāryastasya vārame /
na cāsyāstrāṇi rājendra pādurāsanmahātmanaḥ //

tasya tvahāni catvāri kṣapā caikā'syato gatā /
tasya cāhnastribhāgena kṣayaṃ jagmuḥ patatriṇaḥ //

sa śarakṣayamāsādya putraśokena cārditaḥ /
vividhānāṃ ca divyāmānamastrāṇāmaprasādataḥ //

utsraṣṭukāmaḥ śastrāṇi ṛṣivākyapracoditaḥ /
tejasā pūryamāṇaśca yuyudhe na yathā purā //

bhūyaścānyatsamādāya divyamāṅgirasaṃ dhanuḥ /
śarāṃśca brahmadaṇḍābhāndhṛṣṭadyumnamayodhayat //

tatastaṃ śaravarṣeṇa mahatā samavākirat /
vyaśātayacca saṅkruddho dhṛṣṭadyumnamamarṣaṇam //

śarāṃśca śatadhā tasya droṇaściccheda sāyakaiḥ /
dhvajaṃ dhanuśca niśitaiḥ sārathiṃ cāpyapātayat //

dhṛṣṭadyumnaḥ prahasyānyatpunarādāya kārmukam /
śitena cainaṃ bāṇena pratyavidhyatstanāntare //

so'tividdho maheṣvāso'sambhrānta iva saṃyuge /
bhallena śitadhāreṇa cicchedāsya punardhanuḥ //

yaccāsya bāṇavikṛtaṃ dhanūṃṣi ca viśāmpate /
sarvaṃ ciccheda durdharṣo gadāṃ khaṅgaṃ ca varjayan //

dhṛṣṭadyumnaṃ ca vivyādha navabhirniśitaiḥ śaraiḥ /
jīvitāntakaraiḥ kruddhaḥ śilādhautaiḥ parantapaḥ //

dhṛṣṭadyumno'tha tasyāśvānkharathāśvairmahārathaḥ /
vyāmiśrayadameyātmā brāhmamastramudīrayan //

te miśrā bahvaśobhanta javanā vātaraṃhasaḥ /
pārāvatasavarṇāśca śoṇāśca bharatarṣabha //

yathā savidyuto meghā nadanto jaladāgame /
tathā rejurmahārāja miśritā raṇamūrdhani //

īṣābandhaṃ cakrabandhaṃ rathabandhaṃ tathaiva ca /
prāṇāśayadameyātmā dhṛṣṭadyumnasya sa dvijaḥ //

sa cchinnadhanvā pāñcālyo nikṛttadhvajasārathiḥ /
uttamāmāpadaṃ prāpya gadāṃ vīraḥ parāmṛśat //

tāmasya viśikhaistīkṣṇaiḥ kṣipyamāṇāṃ mahārathaḥ /
nijaghānaḥ śarairdroṇaḥ kruddhaḥ satyaparākramaḥ //

tāṃ tu dṛṣṭvā naravyāghro droṇena nihatāṃ śaraiḥ /
vimalaṃ khaṅgamādatta śatacandraṃ ca bhānumat //

asaṃśayaṃ tathābhūtaḥ pāñcālyaḥ sādhvamanyata /
vadhamācāryamukhyasya prāptakālaṃ mahātmanaḥ //

tataḥ sa rathanīḍasthaṃ svarathasya rathepayā /
agacchadasimudyamya śatacandraṃ ca bhānumat //

cikīrṣurduṣkaraṃ karma dhṛṣṭadyumno mahārathaḥ /
iyeṣa vakṣo bhettuṃ sa bhāradvājasya saṃyuge //

so'tiṣṭhadyugamadhye vai yugasannahaneṣu ca /
jaghanārdheṣu cāśvānāṃ tatsainyāḥ samapūjayan //

tiṣṭhato yugapālīpu śoṇānapyadhitiṣṭhataḥ /
nāpaśyadantaraṃ droṇastadadbhutamivābhavat //

kṣipraṃ śyenasya carato yathaivāmiṣagṛddhinaḥ /
tadvadāsīdabhīsāro dromapārṣatayo raṇe //

tasya pārāvatānaśvānrathaśaktyā parābhinat /
sarvānekaikaśo droṇo raktānaśvānvivarjayan //

te hatā nyapatanbhūmau dhṛṣṭadyumnasya vājinaḥ /
śoṇāstu paryamucyanta rathabandhādviśāmpate //

tānhayānnihatāndṛṣṭvā dvijāgryeṇa sa pārṣataḥ /
nāmṛṣyata yudhāṃ śreṣṭho yājñasenirmahārathaḥ //

virathaḥ sa gṛhītvā tu khaṅgaṃ khaṅgabhṛtāṃ varaḥ /
droṇamabhyapatadrājanvainateya ivoragam //

tasya rūpaṃ babhau rājanbhāradvājaṃ jighāṃsataḥ /
yathā rūpaṃ purā viṣṇorhiraṇyakaśiporvadhe //

sa tadā vividhānmargānpravarāṃścaikaviṃśatim /
darśayāmāsa kauravya pārṣato vicaranraṇe //

bhrāntumuddhāntamāviddhamāplutaṃ prasṛtaṃ sṛtam /
parivṛttaṃ nivṛttaṃ ca khaṅgaṃ carma ca dhārayan //

sampātaṃ samudīrṇaṃ ca darśayāmāsa pārṣataḥ / bhārataṃ kauśikaṃ caiva sātvataṃ caiva śikṣayā /

darśayanvyacaradyuddhe droṇasyāntacikīrṣayā // caratastasya tānmargānvicitrānkhaṅgacarmiṇaḥ /
vyasmayanta raṇe yodhā devatāśca samāgatāḥ //

tataḥ śarasahasreṇa śatacandramapātayat /
carma khaṅgaṃ ca sambādhe dhṛṣṭadyumnasya sa dvijaḥ //

ye tu vaitastikā nāma śarā āsannayodhinaḥ /
nikṛṣṭayuddhe droṇasya nānyeṣāṃ santi te śarāḥ //

ṛte śāradvatātparthāddrauṇervaikartanāttathā /
pradyumnayuyudhānābhyāmabhimanyośca bhārata //

athāsyeṣu samādhatta dṛḍhaṃ paramasammatam /
antevāsinamācāryo jighāṃsuḥ putrasammitam //

taṃ śarairdaśabhistīkṣṇaiściccheda śinipuṅgavaḥ / paśyatastava putrasya karṇasya ca mahātmanaḥ /
grastamācāryamukhyena dhṛṣṭadyumnamamocayat //

carantaṃ rathamārgeṣu sātyakiṃ satyavikramam / droṇakarmāntaragataṃ kṛpasyāpi ca bhārata /
apaśyetāṃ mahātmānau viṣvaksenadhanañjayau //

apūjayetāṃ vārṣṇeyaṃ bruvāṇau sādhusādhviti /
divyānyastrāṇi sarveṣāṃ yudhi nighntamacyutam //

dhanañjayastataḥ kṛṣṇamabravītpaśya keśava /
ācāryarathamukhyānāṃ madhye krīḍanmadhūdvahaḥ //

ānandayati māṃ bhūyaḥ sātyakiḥ paravīrahā /
mādrīputrau ca bhīmaṃ ca rājānaṃ ca yudhiṣṭhiram //

yacchikṣayā'nuddhataḥ sanraṇe carati sātyakiḥ /
mahārathānupakrīḍanvṛṣṇīnāṃ kīrtivardhanaḥ //

tamete pratinandanti siddhāḥ sainyāśca vismitāḥ / ajayyaṃ samare dṛṣṭvā sādhusādhviti sātyakim /
yodhāścobhayataḥ sarve karmabhiḥ samapūjayan //