Mahabharata · Chapter 7.19

dṛṣṭā tu sannivṛttāṃstānsaṃśaptakagaṇānpunaḥ /
vāsudevaṃ mahātmānamarjunaḥ samabhāṣata //

codayāśvānhṛṣīkeśa saṃśaptakagaṇānprati /
naite hāsyanti saṅgrāmaṃ jīvanta iti me matiḥ //

paśya me'strabalaṃ ghoraṃ bāhvoriṣvasanasya ca /
adyaitānpātayiṣyāmi kruddho rudraḥ paśūniva //
sañjaya uvāca /

tataḥ kṛṣṇaḥ smitaṃ kṛtvā pratinandya śivena tam /
prāveśayata durdharṣo yatrayatraicchadarjunaḥ //

sa ratho bhrājate'tyarthamuhyamāno raṇe tadā /
uhyamānamivākāśe vimānaṃ pāṇḍurairhayaiḥ //

maṇḍalāni tataścakre gatapratyāgatāni ce /
yathā śakraratho rājanyuddhe devāsure purā //

atha nārāyaṇāḥ kruddhā vividhāyudhapāṇayaḥ /
chādayantaḥ śaravrātaiḥ parivavrurdhanañjayam //

adṛśyaṃ ca muhūrtena cakruste bharatarṣabha /
kṛṣṇena sahitaṃ yuddhe kuntīputraṃ dhanañjayam //

kruddhastu phalgunaḥ saṅkhye dviguṇīkṛtavikramaḥ /
gāṇḍīvaṃ dhanurāmṛjya tūrṇaṃ jagrāha saṃyuge //

baddhvā ca bhrukuṭiṃ vaktre krodhasya pratilakṣaṇam /
devadattaṃ mahāśaṅkhaṃ pūrayāmāsa pāṇḍavaḥ //

athāstramarisaṅghaghnaṃ tvāṣṭramabhyasyadarjunaḥ /
tato rūpasahasrāṇi prādurāsanpṛthakpṛthak //

arjunapratirūpaistairnānārūpairvimohitāḥ /
anyonyenārjunaṃ matvā svamātmānaṃ ca jaghnire //

ayamarjuno'yaṃ govinda imau pāṇḍavayādavau /
iti bruvāṇāḥ sammūḍhā jaghnuranyonyamāhave //

anyonyaṃ samare jaghnustāvakā bharatarṣabha /
mohitāḥ paramāstreṇa kṣayaṃ jagmuḥ parasparam //

rudhirokṣitagātrāste prekṣamāṇaḥ parasparam /
aśobhanta raṇe yodhāḥ puṣpitā iva kiṃśukāḥ //

rudhirotpīḍanāste tu rudhireṇa samukṣitāḥ /
candanasya raseneva vyabhrājanta raṇājire //

tataḥ prasahya bībhatsurvyākṣipadgāṇḍivaṃ dhanuḥ /
nyahanattāñcharaistīkṣṇaistamaḥ sūrya ivāṃśubhiḥ //

hatāvaśiṣṭāste bhūyaḥ parivārya dhanañjayam /
sāśvadhvajarathaṃ cakruradṛśyaṃ śaravṛṣṭibhiḥ //

tataḥ śarasahasrāṇi tairvimuktāni bhasmasāt /
kṛtvā tadastraṃ tānvīrānanayadyamasādanam //

atha prahasya bībhatsurlalitthānmālavānapi /
māvellakāṃstrigartāṃśca yaudheyāṃścārdayaccharaiḥ //

te hanyamānā vīreṇa kṣatriyāḥ kālacoditāḥ /
vyasṛjañcharajālāni pārthe nānāvidhāni ca //

na dhvajo nārjunastatra na ratho na ca keśavaḥ /
pratyadṛśyata ghoreṇa śaravarṣeṇa saṃvṛtaḥ //

tataste labdhalakṣatvādanyonyamabhicukruśuḥ /
hatau kṛṣṇāviti prītyā vāsāṃsyādudhuvustadā //

bherīmṛdaṅgaśaṅkhāṃśca dadhmurvīrāḥ sahasraśaḥ /
siṃhanādaravāṃścogrāṃścakrire tatra māriṣa //

tataḥ prasiṣvide kṛṣṇaḥ khinnaścārjunamabravīt /
kvāsi pārtha na paśyāmi kaccijjīvasi śatruhan //

tasya tadbhāṣitaṃ śrutvā tvaramāṇo dhanañjayaḥ /
vāyavyāstreṇa tairastāṃ śaravṛṣṭimapāharat //

tataḥ saṃśaptakavrātānsāśvadviparathāyudhān /
uvāha bhagavānvāyuḥ śuṣkaparmacayāniva //

uhyamānāstu te rājanbahvaśobhanta vāyunā /
praḍīnāḥ pakṣiṇaḥ kāle vṛkṣebhya iva māriṣa //

tāṃstathā vyākulīkṛtya tvaramāṇo dhanañjayaḥ /
jaghāna niśitairbāṇaiḥ sahasrāṇi śatāni ca //

śirāṃsi bhallairaharadbāhūnapi ca sāyudhān /
hastihastopamāṃścorūñśarairurvyāmapātayat //

pṛṣṭhacchinnānvicaraṇānvimastakadṛgaṅgulīn /
nānāṅgāvayavairhīnāṃścakārārīndhanañjayaḥ //

gandharvanagarākārānvidhivatkalpitānrathān /
śarairviśakalīkurvaṃścakre vyaśvarathadvipān //

muṇḍatālavanānīva tatratatra cakāśire /
chinnā rathadhvajavrātāḥ kecittatra kvacitkvacit //

sottarāyudhino nāgāḥ sapatākāṅkuśadhvajāḥ /
petuḥ śakrāśanihatā drumavanta ivācalāḥ //

cāmarāpīḍakavacāḥ srastāntranayanāstathā /
sārohāsturagāḥ petuḥ pārtabāṇahatāḥ kṣitau //

vipraviddhāsinārācāśchinnavarmarṣṭiśaktayaḥ /
pattayaścinnavarmāṇaḥ kṛpaṇāḥ śerate hatāḥ //

tairhatairhanyamānaiśca patadbhiḥ patitairapi /
bhramadbhirniṣṭanadbhiśca krūramāyodhanaṃ babhau //

rajaśca cāpyabhavaddurgā kabandhaśatasaṅkulā // tadbabhau raudrabībhatsaṃ bībhatsoryānamāhave /

ākrīḍamiva rudrasya ghnataḥ kālātyaye paśūn // kate vadhyamānāḥ pārthena vyākulāśvarathadvipāḥ /

tamevābhimukhāḥ kṣīṇāḥ śakrasyātithitāṃ gatāḥ // sā bhūmīrbharataśreṣṭha nihataistairmahārathaiḥ /

āstīrṇā sambabhau sarvā pretībhūtaiḥ samantataḥ // etasminnantare caiva pramatte savyasācini /

vyūḍhānīkastato droṇo yudhiṣṭhiramupādravat // taṃ pratyagṛhṇaṃstvaritā vyūḍhānīkāḥ prahāriṇaḥ /

yudhiṣṭhiraṃ parīpsantastadāsīttumulaṃ mahat //