Mahabharata · Chapter 7.18

tataḥ saṃśaptakā rājansame deśe vyavasthitāḥ /
vyūḍhānīkai rathaireva candrārdhākhyairmudā yutāḥ //

te kirīṭinamāyāntaṃ dṛṣṭvā harṣeṇa māriṣa / atīva samprahṛṣṭāste hyupalakṣya dhanañjayam /
udakrośannaravyāghrāḥ śabdena mahatā tadā //

sa diśaḥ pradiśaḥ sarvā nabhaścaiva samāvṛṇot /
āvṛtatvāca lokasya nāsīttatra pratisvanaḥ //

so'tīva samprahṛṣṭāṃstānupalabhya dhanañjayaḥ /
kiñcidabhyutsmayankṛṣṇamidaṃ vacanamabravīt //

devakīputra paśyemānmumūrṣūnadya saṃyuge /
bhrātṝṃstraigartakānetānroditavye praharṣitān //

athavā harṣakālo'yaṃ traigartānāmasaṃśayam / kunarairduravāpānhi lokānprāpsyanti saṃyuge /
mayā hatā hiṃ saṅgrāme lokānprāpsyanti puṣkalān evamuktvā mahābāhurhṛṣīkeśaṃ tato'rjunaḥ / āsasāda raṇe vyūḍhāṃ trigartānāmanīkinīm //

sa devadattamādāya śaṅkhaṃ hemapariṣkṛtam /
dadhmau vegena mahatā ghoṣeṇāpūrayandiśaḥ //

tena śabdena vitrastā saṃśaptakavarūthinī /
viceṣṭā'vasthitā saṅkhye hyaśmasāramayī yathā //

sā senā bharataśreṣṭha niśceṣṭā śuśubhe tadā /
citre paṭe yathā nyastā kuśalaiḥ śilpibhirnaraiḥ //

svanena tena sainyānāṃ divamāvṛṇvatā tadā / sasvanā pṛthivī sarvā tathaiva ca mahodadhiḥ /
svanena tena sainyānāṃ karṇāstu badhirīkṛtāḥ //

vāhāsteṣāṃ vivṛttākṣāḥ stabdhakarṇaśirodharāḥ / viṣṭabdhacaraṇā mūtraṃ rudhiraṃ ca prasusruvuḥ /
tato vyupāramacchabdaḥ prahṛṣṭāste tato'bhavan //

upalabhya tataḥ sañjñāmavasthāpya ca vāhinīm /
yugapatpāṇḍuputrāya cikṣipuḥ kaṅkapatriṇaḥ //

tānarjunaḥ sahasrāṇi daśapañcabhirāśugaiḥ /
anāgatāneva śaraiścicchedāśu parākramī //

tato‘rjunaṃ śitairbāṇairdaśabhirdaśabhiḥ punaḥ /
prāvidhyanta tataḥ pārthastānavidhyattribhistribhiḥ //

ekaikastu tataḥ pārthaṃ rājanvivyādha pañcabhiḥ /
sa ca tānprativivyādha dvābhyāṃ dvābhyāṃ parākramī //

bhūya eva tu saṅkruddhāstvarjunaṃ sahakeśavam /
āpūrayañśaraistīkṣṇaistaṭākamiva vṛṣṭibhiḥ //

tataḥ śarasahasrāṇi prāpatannarjunaṃ prati /
bhramarāṇāmiva vrātāḥ phullaṃ drumagaṇaṃ vane //

tataḥ subāhustriṃśadbhiradrisāramayaiḥ śaraiḥ /
avidhyadiṣubhirgāḍhaṃ kirīṭe savyasācinam //

taiḥ kirīṭi kirīṭasthairhemapuṅkhairajihmagaiḥ /
śātakumbhamayāpīḍo babhau yūpa ivocchritaḥ //

hastāvāpaṃ subāhostu bhallena yudhi pāṇḍavaḥ /
ciccheda taṃ caiva punaḥ śaravarṣairavākirat //

tataḥ suśarmā daśabhiḥ surathastu kirīṭinam /
sudharmā sudhanuścaiva subāhuśca samārpayat //

tāṃstu sarvānpṛthagbāṇairvānarapravaradhvajaḥ /
pratyavidhyaddhvajāṃścaiṣāṃ bhallaiściccheda sāyakān //

sudhanvano dhanuśchittvā hayāṃścāsyāvadhīccharaiḥ /
athāsya saśirastrāṇaṃ śiraḥ kāyādapātayat //

jahāra pārthaḥ sainyeṣu sahasre dve ca yodhinām /
tasminnipatite vīre trastāstasya padānugāḥ //

bhūyiṣṭhaṃ pratiruddhā ye hatairyodhairyaśasvinaḥ /
vyadravanta bhayādbhītā yatra dauryodhanaṃ balam //

tato jaghānaṃ saṅkruddho vāsavistāṃ mahācamūm /
śarajālairavicchinnaistamaḥ sūrya ivāṃśubhiḥ //

tato bhagne bale tasminvipralīne samantataḥ /
savyasācini saṅkrudve traigartānbhayamāviśat //

te vadhyamānāḥ pārthena śaraiḥ sannataparvabhiḥ /
amuhyaṃstatratatraiva trastā mṛgagaṇā iva //

tatastrigartarāṭ kruddhastānuvāca mahārathān /
alaṃ drutena vaḥ śūrā na bhayaṃ kartumarhatha //

śaptvā'tha śapathānghorānsarvasainyasya paśyataḥ / gatvā dauryodhanaṃ sainyaṃ kiṃ vai vakṣyatha mukhyaśaḥ /

nāvahāsyāḥ kathaṃ loke karmaṇā'nena saṃyuge /
bhavema sahitāḥ sarve nivartadhvaṃ yathābalam //

evamuktāstu te rājannudakrośanmuhurmuhuḥ /
śaṅkhāṃśca dadhmire vīrā harṣayantaḥ parasparam //

tataste sannyavartantaṃ saṃśaptakagaṇāḥ punaḥ /
nārāyaṇāśca gopālā mṛtyuṃ kṛtvā'nivartanam //