Mahabharata · Chapter 7.17

te sene śibiraṃ gatvā nyaviśetāṃ viśāmpate /
yathābhāgaṃ yathānyāyaṃ yathāgulmaṃ ca sarvaśaḥ //

kṛtvā'vahāraṃ sainyānāṃ droṇaḥ paramadurmanāḥ /
duryodhanamabhiprekṣya savrīḍamidamabravīt //

uktametanmayā pūrvaṃ na tiṣṭhati dhanjaye /
śakyo grahītuṃ saṅgrāme devairapi yudhiṣṭhiraḥ //

iti tadvaḥ prayatatāṃ kṛtaṃ pārthena saṃyuge /
mā viśaṅkīrvaco mahyamajeyau kṛṣṇapāṇḍavau //

apanīte tu yogena kenacicchvetavāhane /
tata eṣyati te rājanvaśameṣa yudhiṣṭhiraḥ //

kaścidāhūya taṃ saṅkhye deśamanyaṃ prakarṣatu /
tamajitvā na kaunteyo nivarteta kathañcana //

etasminnantare śūnyedharmarājamahaṃ nṛpa /
grahīṣyāmi camūṃ bhittvā dhṛṣṭadyumnasya paśyataḥ //

arjunena parityakto na cettrāsātpalāyate /
māmupāyāntamālokya gṛhītaṃ viddhi pāṇḍavam //

evaṃ te'haṃ mahārāja dharmaputraṃ yudhiṣṭhiram /
samāneṣyāmi sagaṇaṃ vaśamadya na saṃśayaḥ //

yadi tiṣṭhati saṅgrāme muhūrtamapi pāṇḍavaḥ /
athāpayāti saṅgrāmādvijayāttadviśiṣyate //
sañjaya uvāca /

droṇasya tadvacaḥ śrutvā trigartādhipatistadā /
bhrātṛbhiḥ sahito rājannidaṃ vacanamabravīt //

vayaṃ vinikṛtā rājansadā gāṇḍīvadhanvanā /
anāgaḥsvapi cāgastatkṛtamasmāsu tena vai //

te vayaṃ smaramāṇāstānvinikārānpṛthagvidhān /
krodhāgninā dahyamānā hyaśemahi sadā niśi //

sa no diṣṭyā'strasampannaścakṣurviṣayamāgataḥ /
kartāraḥ smarayaṃ karma yaccikīrṣāma hṛdgatam //

bhavataśca priyaṃ yatsyādasmākaṃ ca yaśaskaram /
vayamenaṃ haniṣyāmo nikṛṣyāyodhanādbahiḥ //

adyāstvanarjunā bhūmiratrigartā'vā punaḥ /
satyaṃ te pratijānīmo naitanmithyā bhaviṣyati //

evaṃ satyarathaścoktvā satyavarmā ca bhārata /
satyavrataśca satyeṣuḥ satyakarmā tathaiva ca //

sahitā bhrātaraḥ pañca rathānāmayutena ca /
nyavartanta mahārāja kṛtvā śapathamāhave //

mālavāstuṇḍikerāśca rathānāmayutaistribhiḥ /
suśarmā ca naravyāghrastrigartaḥ prasthalādhipaḥ //

māvellakairlalitthaiśca sahito madrakairapi /
rathānāmayutenaiva so'gamaddhātṛbhiḥ saha //

nānājanapadebhyaśca rathānāmayutaṃ punaḥ /
samutthitaṃ viśiṣṭānāṃ śapathārthamupāgamat //

tato jvalanamānarcya hutvā sarve pṛthakpṛthak /
jagṛhuḥ kuśacīrāṇi citrāṇi kavacāni ca //

te ca baddhatanutrāṇā ghṛtāktāḥ kuśacīriṇaḥ /
maurvīmekhalino vīrāḥ sahasraśatadakṣiṇāḥ //

yajvānaḥ putriṇo lokyāḥ kṛtakṛtyāstanutyajaḥ /
yokṣyamāṇāstadā'tmānaṃ yaśasā vijayena ca //

brahmacaryuśrutimukhaiḥ kratubhiścāptadakṣiṇaiḥ /
prāpyām̐llokānsuyuddhena kṣiprameva yiyāsavaḥ //

brāhmamāṃstarpayitvā ca niṣkāndatvā pṛthakpṛthak /
gāśca vāsāṃsi ca punaḥ samābhāṣya parasparam //

dvijamukhyaiḥ samuditaiḥ kṛtasvastyayanāśiṣaḥ /
muditāśca prahṛṣṭāśca jalaṃ saṃspṛśya nirmalam //

prajvālya kṛṣṇavartmānamupāgamya raṇavratam /
tasminnagnau tadā cakruḥ pratijñāṃ dṛḍhaniścayāḥ //

śṛṇvatāṃ sarvabhūtānāmuccairvāco babhāṣire / sarve dhanañjayavadhe pratijñāṃ cāpi cakrire /

ye vai lokāścāvratināṃ ye caiva brahmaghātinām /
madyapasya ca ye lokā gurudāraratasya ca //

brahmasvahāriṇaścaiva rājapiṇḍāpahāriṇaḥ /
śaraṇāgataṃ ca tyajato yācamānaṃ tathā ghnataḥ //

agāradāhināṃ caiva ye ca gāṃ nighnatāmapi /
apakāriṇāṃ ca ye lokā ye ca brahmadviṣāmapi //

svabhāryāmṛtukāleṣu mohādvai nābhigacchatām /
śrāddhamaithunikānāṃ ca ye cāpyātmāpahāriṇām //

nyāsāpahāriṇāṃ ye ca śrutaṃ nāśayatāṃ ca ye /
klībane yudhyamānānāṃ ye ca nīcānusāriṇām //

nāstikānāṃ ca ye lokā ye'gnimātṛpitṛtyajām /
tānāpnuyāmahe lokānye ca pāpakṛtāmapi //

yadyahatvā vayaṃ yuddhe nivartema dhanañjayam /
tena cābhyarditāstrāsādbhavemahi parāṅmukhāḥ //

yadi tvasukaraṃ loke karma kuryāma saṃyuge /
iṣṭām̐llokānprāpnuyāmo vayamadya na saṃśayaḥ //

evamuktvā tadā rājaṃste'bhyavartanta saṃyuge /
āhvayanto'rjunaṃ vīrāḥ pitṛjuṣṭāṃ diśaṃ prati //

āhūtastairnaravyāghraiḥ pārthaḥ parapurañcayaḥ /
dharmarājamidaṃ vākyamapadāntaramabravīt //

āhūto na nivarteyamiti me vratamāhitam /
saṃśaptakāśca māṃ rājannāhvayanti mahāmṛdhe //

eṣa ca bhrātṛbhiḥ sārdhaṃ suśarmā'hvayate raṇe /
vadhāya sagaṇasyāsya māmanujñātumarhasi //

naitacchaknomi saṃsoḍhumāhvānaṃ puruṣarṣabha /
satyaṃ te pratijānāmi hatānviddhi parānyudhi //
yudhiṣṭhira uvāca /

śrutaṃ te tattvatastāta yaddroṇasya cikīrṣitam /
yathā tadanṛtaṃ tasya bhavetattvaṃ samācara //

droṇo hi balavāñśūraḥ kṛtāstraśca jitaśramaḥ /
pratijñātaṃ ca tenaitadgrahaṇaṃ me mahāratha //
arjuna uvāca /

ayaṃ vai satyajidrājannadya tvāṃ rakṣitā yudhi /
dhriyamāṇe ca pāñcālye nācāryaḥ kāmamāpsyati //

hate tu puruṣavyāghre raṇe satyajiti prabho /
sarvairapi sametairvā na sthātavyaṃ kathañcana //
sañjaya uvāca /

anujñātastato rājñā pariṣvaktaśca phalgunaḥ /
premṇā dṛṣṭaśca bahudhā hyāśiṣaścāsya yojitāḥ //

vihāyainaṃ tataḥ pārthastrigartānpratyayādbalī /
kṣudhitaḥ kṣudvighātārthaṃ siṃho mṛgagaṇāniva //

tato dauryodhanaṃ sainyaṃ mudā paramayā yutam /
ṛte'rjunaṃ bhṛśaṃ kruddhaṃ dharmarājasya nigrahe //

tato'nyonyena te sainye samājagmaturojasā /
gaṅgāsarayvau vegena prāvṛṣīvolbaṇodake //