Mahabharata · Chapter 7.175

dṛṣṭvā ghaṭotkacaṃ rājansūtaputrarathaṃ prati / āyāntaṃ tu tathāyuktaṃ jighāṃsuṃ karṇamāhave /
abravīttatra putraste duḥśāsanamidaṃ vacaḥ //

etadrakṣo raṇe tūrṇaṃ dṛṣṭvā karṇasya vikramam /
abhiyāti drutaṃ karṇaṃ tadvāraya mahāratham //

vṛtaḥ sainyena mahatā yāhi yatra mahābalaḥ /
karṇo vaikartano yuddhe rākṣasena yuyutsati //

rakṣa karṇaṃ raṇe yatto vṛtaḥ sainyena mānada /
mā karṇaṃ rākṣaso ghoraḥ pramādānnāśayiṣyati //

etasminnantare rājañjaṭāsurasuto balī /
duryodhanamupāgamya prāha praharatāṃ varaḥ //

duryodhana tavāmitrānprakhyātānyuddhadurmadān /
pāṇḍavānhantumicchāmi tvayā'jñaptaḥ sahānugān //

jaṭāsuro mama pitā rakṣasāṃ grāmaṇīḥ purā /
prayujya karma rakṣoghnaṃ kṣudraiḥ pārthairnipātitaḥ //

tasyāpacitimicchāmi śatruśoṇitapūjayā /
śatrumāṃsaiśca rājendra māmanujñātumarhasi //

tamabravīttato rājā prīyamāṇaḥ punaḥpunaḥ /
droṇakarmādibhiḥ sārdhaṃ paryāpto'haṃ dviṣadvadhe //

tvaṃ tu gaccha mayā'jñapto jahi yuddhe ghaṭotkacam /
rākṣasaṃ krūrakarmāṇaṃ rakṣomānuṣasambhavam //

pāṇḍavānāṃ hitaṃ nityaṃ hastyaśvarathaghātinam /
vaihāyasagataṃ yuddhe preṣayeryamasādanam //

tathetyuktvā mahākāyaḥ samāhūya ghaṭotkacam /
jāṭāsurirbhaimaseniṃ nānāśastrairavākirat //

alambalaṃ ca karṇaṃ ca kurusainyaṃ ca dustaram /
haiḍimbiḥ pramamāthaiko mahābātombudāniva //

tato māyābalaṃ dṛṣṭvā rakṣastūrṇamalambalaḥ /
ghaṭotkacaṃ śaravrātairnānāliṅgaiḥ samārpayat //

viddhā ca bahubhirbāṇairbhaimaseniṃ mahābalaḥ /
vyadrāvayaccharavrātaiḥ pāṇḍavānāmanīkinīm //

tena vidrāvyamāṇāni pāṇḍusainyāni bhārata /
niśīthe viprakīryante vātanunnā ghanā iva //

ghaṭotkacaśarairnunnā tathaiva tava vāhinī /
niśīthe prādravadrājannutsṛjyolkāḥ sahasraśaḥ //

alambalastataḥ kruddho bhaimaseniṃ mahāmṛdhe /
ājaghne daśabhirbāṇaistotrairiva mahādvipam //

tixśastasya saṃvāhaṃ sūtaṃ sarvāyudhāni ca /
ghaṭotkacaḥ praciccheda praṇadaṃścātidāruṇam //

tataḥ karṇaṃ śaravrātaiḥ kurūnanyānsahasraśaḥ /
alambalaṃ cābhyavarṣanmegho merumivācalam //

tataḥ sañcukṣubhe sainyaṃ kurūṇāṃ rākṣasārditam /
uparyupari cānyonyaṃ caturaṅgaṃ mamarda ha //

jāṭāsurirmahārāja viratho hatasārathiḥ /
ghaṭotkacaṃ raṇe kruddho muṣṭinā'bhyahanaddṛḍham //

muṣṭinā'bhyāhatastena pracacāla ghaṭotkacaḥ /
kṣitikampe yathā śailaḥ savṛkṣastṛṇagulmavān //

tataḥ sa parighābhena dviṭ्saṅghaghnena bāhunā /
jāṭāsuriṃ bhaimaseniravadhīnmuṣṭinā bhṛśam //

taṃ pramathya tataḥ kruddhastūrṇaṃ haiḍimbirākṣipat /
dorbhyāmindradhvajābhābhyāṃ niṣpipeṣa ca bhūtale //

jāṭāsurirmokṣayitvā ātmānaṃ ca ghaṭotkacāt /
punarutthāya vegena ghaṭotkacamupādrāvat //

alambalo'pi vikṣipya samutkṣipya ca rākṣasam /
ghaṭotkacaṃ raṇe roṣānniṣpipeṣa ca bhūtale //

tayo samabhavadyuddhaṃ garjatoratikāyayoḥ /
ghaṭotkacālambalayostumulaṃ romaharṣaṇam //

viśeṣayantāvanyonyaṃ māyābhiratimāyinau /
yuyudhāte mahāvīryāvindravairocanāviva //

pāvakāmbunidhī bhūtvā punargaruḍatakṣakau /
punarmeghamahābattau punarvajramahācalau //

punaḥ kuñjaraśārdūlau punaḥ svarbhānubhāskarau / evaṃ māyāśatasṛjāvanyonyavadhakāṅkṣiṇau /
bhṛśaṃ citramayudhyetāmalambalaghaṭotkacau //

parighaiśca gadābhiśca prāsamudrarapaṭṭasaiḥ /
musalaiḥ parvatāgraiśca tāvanyonyaṃ vijaghnatuḥ //

hayābhyāṃ ca gajābhyāṃ ca rathābhyāṃ ca padātibhiḥ /
yuyudhāte mahāmāyau rākṣasapravarau yudhi //

tato ghaṭotkaco rājannalambalavadhepsayā /
utpatāta bhṛśaṃ kruddhaḥ śyenavannipapāta ca //

gṛhītvā ca mahākāyaṃ rākṣasendramalambalam /
udyamya nyavadhīdbhūmau mayaṃ viṣṇurivāhave //

tato ghaṭotkacaḥ khaṅgamudvṛtyādbhutadarśanam /
raudrasya kāyādvi śiro bhīmaṃ vikṛtadarśanam //

sphuratastasya samare nadataścātibhairavam /
nicakarta mahārāja śatromitavikramaḥ //

śirastaccāpi saṅgṛhya keśeṣu rudhirokṣitam /
yayau ghaṭotkacastūrṇaṃ duryodhanarathaṃ prati //

droṇakarṇakṛpānyodhānatītya sumahābalaḥ /
abhyetya ca mahābāhuḥ smayamānaḥ sa rākṣasaḥ //

śiro rathe'sya nikṣipya vikṛtānanamūrdhajam /
prāṇadadbhairavaṃ nādaṃ prāvṛṣīva valāhakaḥ //

abravīcca tato rājanduryodhanamidaṃ vacaḥ //

eṣa te nihato bandhustvayā dṛṣṭo'sya vikramaḥ /
punardraṣṭāsi karṇasya niṣṭhāmetāṃ tathā'tmanaḥ //

svadharmamarthaṃ kāmaṃ ca tritayaṃ yo'bhivāñchati / riktapāṇirna paśyeta rājānaṃ brāhmaṇaṃ striyam /
tiṣṭhasva tāvatsuprīto yāvatkarṇaṃ vadhāmyaham //
sañjaya uvāca /

evamuktvā tataḥ prāyātkarṇaṃ prati nareśvaraḥ /
kirañcharagaṇāṃstīkṣṇānruṣito raṇamūrdhani //

tataḥ samabhavadyuddhaṃ ghorarūpaṃ bhayānakam /
vismāpanaṃ mahārāja nararākṣasayormṛdhe //