Mahabharata · Chapter 7.174

tataḥ karṇo raṇe dṛṣṭvā pārṣataṃ paravīrahā /
ājaghānarosi śarairdaśabhirmarmabhedibhiḥ //

prativivyādha taṃ tūrṇaṃ dhṛṣṭadyumnopi māriṣa /
daśabhiḥ sāyakairhṛṣṭastiṣṭhatiṣṭheti cābravīt //

tāvanyonyaṃ śaraiḥ saṅkhye sañchādya sumahārathaiḥ /
punaḥ pūrṇāyatotsṛṣṭairvivyadhāte parasparam //

tataḥ pāñcālamukhyasya dhṛṣṭadyumnasya saṃyuge /
sārathiṃ caturaścāśvānkarṇo vivyādha sāyakaiḥ //

kārmukapravaraṃ cāpi praciccheda śitaiḥ śaraiḥ /
sārathiṃ cāsya bhallena rathanīḍādapātayat //

dhṛṣṭadyumnastu viratho hatāśvo hatasārathiḥ /
gṛhītvā parighaṃ ghoraṃ karṇasyāśvānapīḍayat //

viddhaśca bahubhistena śarairāśīviṣopamaiḥ /
tato yudhiṣṭhirānīkaṃ paddhyāmevānvapadyata //

āruroha rathaṃ cāpi sahadevasya māriṣa /
prayātukāmaḥ karṇāya vārito dharmasūnunā //

karṇastu sumahātejāḥ siṃhanādavimiśritam /
dhanuḥśabdaṃ mahaccakre dadhmau tāreṇa cāmbujam //

dṛṣṭvā vinirjitaṃ yuddhe pārṣataṃ te mahārathāḥ /
amarṣavaśamāpannāḥ pāñcālāḥ sahasomakāḥ //

sūtaputravadhārthāya śastrāṇyādāya sarvaśaḥ /
prayayuḥ karṇamuddiśya mṛtyuṃ kṛtvā nivartanam //

karṇasyāpi rathe vāhānanyānsūto'bhyayojayat /
śaṅkhavarṇānmahāvegānsaindhavānsādhuvāhinaḥ //

labdhalakṣastu rādheyaḥ pañcālānāṃ mahārathān /
abhyapīḍayadāyastaḥ śarairmegha ivācalam //

sā pīḍyamānā karṇena pāñcālānāṃ mahācamūḥ /
samprādravatsusantrastā siṃhenevārditā mṛgī //

patitāsturagebhyaśca gajebhyaśca mahītale /
rathebhyaśca narāstūrṇamadṛśyanta tatastataḥ //

dhāvamānasya yodhasya kṣurapraiḥ sa mahāmṛdhe /
bāhū ciccheda vai karṇaḥ śiraścaiva sakuṇḍalam //

ūrū ciccheda cānyasya gajasthasya viśāmpate /
vājipṛṣṭhagatasyāpi bhūmiṣṭhasya ca māriṣa //

nājñāsiṣurdhāvamānā bahavaśca mahārathāḥ /
sañchinnānyātmagātrāṇi vāhanāni ca saṃyuge //

te vadhyamānāḥ samare pāñcālāḥ sṛñjayaiḥ saha /
tṛṇapraspandanāccāpi sūtaputraṃ sma menire //

api svaṃ samare yodhaṃ dhāvamānaṃ vicetasam /
karṇamevābhyamanyanta tato bhītā dravanti te //

tānyanīkāni bhagnāni dravamāṇāni bhārata /
abhyadravaddrutaṃ karṇaḥ pṛṣṭhato vikirañcharān //

avekṣamāṇāstvanyonyaṃ susammūḍhā vicetasaḥ /
nāśaknuvannavasthātuṃ kālyamānā mahātmanā //

karṇenābhyāhatā rājanpāñcālāḥ parameṣubhiḥ /
droṇena ca diśaḥ sarvā vīkṣamāṇāḥ pradudruvuḥ //

tato yudhiṣṭhiro rājā svasainyaṃ prekṣya vidrutam /
apayāne manaḥ kṛtvā phalgunaṃ vākyamabravīt //

paśya karṇaṃ maheṣvāsaṃ dhanuṣpāṇimavasthitam /
niśīthe dāruṇe kāle tapantamiva bhāskaram //

karṇasāyakanunnānāṃ krośatāmeṣa niḥsvanaḥ /
aniśaṃ śrūyate pārtha tvadbandhūnāmanāthavat //

yathā visṛjataścāsya sandadhānasya cāśugān /
paśyāmi nāntaraṃ pārtha kṣapayiṣyati no dhruvam //

yadatrānantaraṃ kāryaṃ prāptakāla ca paśyasi /
karṇasya vadhasaṃyuktaṃ tatkuruṣva dhanañjaya //

evamukto mahārāja pārthaḥ kṛṣṇamathābravīt /
bhītaḥ kuntīsuto rājā rādheyasyādya vikramāt //

evaṃ gate prāptakālaṃ karṇānīke punaḥ punaḥ /
bhavānvyavasyatu kṣipraṃ dravate hi varūthinī //

droṇasāyakanunnānāṃ bhagnānāṃ madhusūdana /
karṇena trāsyamānānāmavasthānaṃ na vidyate //

paśyāmi ca tathā karṇaṃ vicarantamabhītavat /
dravamāṇānrathodārānkirantaṃ niśitaiḥ śaraiḥ //

nainaṃ śakṣyāmi saṃsoḍhuṃ carantaṃ raṇamūrdhani /
pratyakṣaṃ vṛṣṇiśārdūla pādasparśamivoragaḥ //

sa savāṃstatra yātvāśu yatra karṇo mahārathaḥ /
ahamenaṃ haniṣyāmi māṃ vaiṣa madhusūdana //
śrīvāsudeva uvāca /

paśyāmi karṇaṃ kaunteya devarājamivāhave /
vicarantaṃ naravyāghramatimānuṣavikramam //

naitasyānyo'sti saṅgrāme pratyudyātā dhanañjaya /
ṛte tvāṃ puruṣavyāghra rākṣasādvā ghaṭotkacāt //

na tu tāvadahaṃ manye prāptakālaṃ tavānagha /
samāgamaṃ mahābāho sūtaputreṇa saṃyuge //

dīpyamānā maholkeva tiṣṭhatyasya hi vāsavī /
tvadarthaṃ hi mahābāho sūtaputreṇa saṃyuge //

rakṣyate śaktireṣā hi raudrāṃ rūpaṃ bibharti ca /
ghaṭotkacastu rādheyaṃ pratyudyātu mahābalaḥ //

sa hi bhīmena balinā jātaḥ suraparākramaḥ /
tasminnastrāṇi divyāni rākṣasānyāsurāṇi ca //

satataṃ cānurakto vo hitaiṣī ca ghaṭotkacaḥ /
vijeṣyati raṇe karṇamiti me nātra saṃśayaḥ //
sañjaya uvāca /

evamukto mahābāhuḥ pārthaḥ puṣkaralocanaḥ /
ājuhāvātha tadrakṣastaccāsītprāduraprataḥ //

kavacī saśaraḥ khaṅgī sadhanvā ca viśāmpate / abhivādya tataḥ kṛṣṇaṃ pāṇḍavaṃ ca dhanañjayam /
abravīcca tadā kṛṣṇamayamasmyanuśādhi mām //

tatastaṃ meghasaṅkāśaṃ dīptāsyaṃ dīptakuṇḍalam /
abhyabhāṣata haiḍimbiṃ dāśārhaḥ prahasanniva //
vāsudeva uvāca /

ghaṭotkaca vijānīhi yattvāṃ vakṣyāmi putraka / prāpto vikramakālo'yaṃ tava nānyasya kasyācit /
sa tvaṃ nimajjatāṃ yuddhe bandhūnāṃ bāndhavo bhava //

yāvanti ca tavāstrāṇi santi māyāśca rākṣasīḥ /
adyaiva samayasteṣāṃ māyānāṃ caiva rākṣasa //

paśya karṇena haiḍimbe pāṇḍavānāmanīkinīm /
kālyamānāṃ raṇe tāta siṃhanevetarānmṛgān //

eṣa karṇo maheṣvāso matimāndṛḍhavikramaḥ /
pāṇvānāmanīkeṣu nihanti kṣatriyarṣabhān //

kirantaḥ śaravarṣāṇi mahānti dṛḍhadhanvinaḥ /
na śaknuvantyavasthātuṃ pīḍyamānāḥ śarārciṣā //

niśīthe sūtaputreṇa śaravarṣeṇa pīḍitāḥ /
ete dravanti pāñcālāḥ siṃhenevārditā mṛśāḥ //

etasyaivaṃ pravṛddhasya sūtaputrasya saṃyuge /
niṣeddhā vidyate nānyastvāmṛte bhīmavikrama //

sa tvaṃ kuru mahābāho karma yuktamihātmanaḥ /
mātulānāṃ pitṝṇāṃ ca tesajo'strabalasya ca //

etadarthe hi haiḍimbe putrānicchanti mānavāḥ /
kathaṃ nastārayedduḥkhātsa tvaṃ tāraya bāndhavān //

icchanti pitaraḥ putrānsvārthahetorghaṭotkaca /
hahalokātpare loke tārayiṣyanti ye hitāḥ //

tava hyatra balaṃ bhīmaṃ māyāśca tava dustarāḥ /
saṅkrāme yudhyamānasya satataṃ bhīmanandana //

pāṇḍavānāṃ prabhagnānāṃ karṇena niśi sāyakaiḥ /
majjatāṃ dhārtarāṣṭreṣu bhava pāraṃ parantapa //

rātrau hi rākṣasā bhūyo bhavantyamitavikramāḥ /
balavantaḥ sudurdharṣāḥ śūrā vikrāntacāriṇaḥ //

jahi karṇaṃ hameṣvāsaṃ niśīthe māyayā raṇe /
pārthā droṇaṃ vadhiṣyanti dhṛṣṭadyumnapurogamāḥ //
sañjaya uvāca /

keśavasya vacaḥ śrutvā bībhatsurapi rākṣasam /
abhyabhāṣata kauravya ghaṭotkacamarindamam //

ghaṭotkaca bhavāṃścaiva dīrghabāhuśca sātyakiḥ /
matau me sarvasainyeṣu bhīmasenaśca pāṇḍavaḥ //

tadbhavānyātu karṇena dvairathaṃ yudhyatāṃ niśi /
sātyakiḥ pṛṣṭhagopaste bhaviṣyati mahārathaḥ //

jahi karṇaṃ raṇe śūraṃ sātvatena sahāyavān /
yathendrastārakaṃ pūrvaṃ skandena saha jaghnivān //
ghaṭotkaca uvāca /

evameva mahābāho yathā vadasi māṃ prabho /
tvayā niyukto gacchāmi karṇasya badhakāṅkṣayā //

alamevāsmi karṇāya droṇāyālaṃ ca bhārata /
anyeṣāṃ kṣatriyāṇāṃ ca kṛtāstrāṇāṃ mahātmanām //

adya dāsyāmi saṅgrāmaṃ sūtaputrāya taṃ niśi /
yaṃ janāḥ sampravakṣyanti yāvadbhūmirdhariṣyati //

na cātra śūrānmokṣyāmi na bhītānna kṛtāñjalīn /
sarvāneva vadhiṣyāmi rākṣasaṃ dharmamāsthitaḥ //
sañjaya uvāca /

evamuktvā mahābāhurhaiḍimbiḥ paravīrahā /
abhyayāttumule karṇaṃ tava sainyaṃ vibhīṣayan //

tamāpatantaṃ saṅkruddhaṃ dīptāsyaṃ dīptamūrdhajam /
prahasanpuruṣavyāghraḥ pratijagrāha sūtajaḥ //

tayoḥ samabhavadyuddhaṃ karṇarākṣasayorniśi /
garjato rājaśārdūla śakraprahlādayoriva //