Mahabharata · Chapter 7.173

vidrutaṃ svabalaṃ dṛṣṭvā vadhyamānaṃ mahātmabhiḥ /
krodhena mahatā'viṣṭaḥ putrastava viśāmpate //

abhyetya sahasā karṇaṃ droṇaṃ ca jayatāṃ varam /
amarṣavaśamāpanno vākyajño vākyamabravīt //

bhavaddhbhāmiha saṅgrāmaḥ kruddhābhyāṃ sampravartitaḥ /
āhave nihataṃ dṛṣṭvā saindhavaṃ savyasācinā //

nihanyamānāṃ pāṇ़ḍūnāṃ balena mama vāhinīm /
bhūtvā tadvijaye śaktāvaśaktāviva paśyataḥ //

yadyahaṃ bhavatostyājyo na vācyo'smi tadaiva hi /
āvāṃ pāṇḍusutānsaṅkhye jeṣyāva iti mānadau //

tadaivāhaṃ vacaḥ śrutvā bhavaddhyāmanusampatam /
nākariṣyamidaṃ pārthairvairaṃ yodhavināśanam //

yadi nāhaṃ parityājyo bhavadbhyāṃ puruṣarṣabhau //
yudhyatāmanurūpeṇa vikrameṇa suvikramau //

vākpratodena tau vīrau praṇunnau tanayena te /
prāvartayetāṃ saṅgrāmaṃ ghaṭṭitāviva pannagau //

tatastau rathināṃ śreṣṭhau sarvalokadhanurdharau /
śaineyapramukhānpārthānabhidudruvat raṇe //

tathaiva sahitāḥ pārthāḥ sarvasainyena saṃvṛtāḥ /
abhyavartanta tau vīrau nardamānau muhurmuhuḥ //

atha droṇo maheṣvāso daśabhiḥ śinipuṅgavam /
avidhyattvaritaṃ kruddhaḥ sarvaśastrabhṛtāṃ varaḥ //

karṇaśca daśabhirbāṇaiḥ putraśca tava saptabhiḥ / daśabhirvṛṣasenaśca saubalaścāpi saptabhiḥ /
ete kaurava saṅkrande śaineyaṃ paryavākiran //

dṛṣṭvā ca samare droṇaṃ nighnantaṃ pāṇḍavīṃ camūm /
vivyadhuḥ somakāstūrṇaṃ samantāccharavṛṣṭibhiḥ //

tatra droṇo'haratprāṇānkṣatriyāṇāṃ viśāmpate /
raśmibhirbhāskaro rājaṃstamāṃsīva samantataḥ //

droṇena vadhyamānānāṃ pāñcālānāṃ viśāmpate /
śuśruve tumulaḥ śabdaḥ krośatāmitaretaram //

putrānanye pitṝnanye bhrātṝnanye ca mātulān / bhāgineyānvayasyāṃśca tathā sambandhibāndhavān /
utsṛjyotsṛjya gacchanti tvaritā jīvitepsavaḥ //

apare mohitā mohāttamevābhimukhā yayuḥ /
pāṇḍavānāṃ raṇe yodhāḥ paralokaṃ gatāḥ pare //

sā tathā pāṇ़vī senā pīḍyamānā mahātmanā /
niśi samprādravadrājannutsṛjyolkāḥ sahasraśaḥ //

paśyato bhīmasenasya vijayasyācyutasya ca /
yayamordharmaputrasya pārṣatasya ca paśyataḥ //

tamasā saṃvṛte loke na prājñāyata kiñcana /
kauravāṇāṃ prakāśena dṛśyante vidrutāḥ pare //

dravamāṇaṃ tu tatsainyaṃ droṇakarṇau mahārathau /
jaghnatuḥ pṛṣṭhato rājankirantau sāyakānbahūn //

pāñcāleṣu prabhagneṣu kṣīyamāṇeṣu sarvataḥ /
janārdano dīnamānāḥ pratyabhāṣata phalgunam //

droṇakarṇau maheṣvāsāvetau pārṣatasātyakī /
pāñcālāṃścaiva sahitau jaghnatuḥ sāyakairbhṛśam //

etayoḥ śaravarṣeṇa prabhagnā no mahārathāḥ /
vāryamāṇāpi kaunteya pṛtanā nāvatiṣṭhate //

tāṃ tu vidravatīṃ dṛṣṭvā ūcatuḥ keśavārjunau /
mā vidravata vitrastā bhayaṃ tyajata pāṇḍavāḥ //

tāvāvāṃ sarvasainyaiśca vyūhaiḥ samyagudāyudhaiḥ /
droṇaṃ ca sūtaputraṃ ca prayatāvaḥ prabādhitum //

etau hi balinau śūrau kṛtāstrau jitakāśinau /
upekṣitau balaṃ tūrṇaṃ nāśayetāṃ niśāmimām //

sañjaya uvāca / tayoḥ saṃvadatorevaṃ bhīmakarmā mahābalaḥ /

āyādvṛkodaraḥ śīghraṃ punarāvartya vāhinīm // vṛkodaramathāyāntaṃ dṛṣṭvā tatra janārdanaḥ /

punarevābravīdrājanharṣayanniva pāṇḍavam // eṣa bhīmo raṇaślāghī vṛtaḥ somakapāṇḍavaiḥ /

abhyavartata vegena droṇakarṇau mahārathau // etena sahito yuddhya pāñcālaiśca mahārathaiḥ /

āśvāsanārthaṃ sainyānāṃ sarveṣāṃ pāṇ़ḍunandana // tatastau puruṣavyāghrāvubhau mādhavapāṇḍavau /

droṇakarṇau samāsādya dhiṣṭhitau raṇamūrdhani //
sañjaya uvāca /
tatastatpunarāvṛttaṃ yudhiṣṭhirabalaṃ mahat / tato droṇaśca karṇaśca parānmamṛdaturyudhi //

sa samprahārastumulo niśi pratyabhavanmahān /
yathā sāgarayo rājaṃścandrodayaviruddhayoḥ //

tata utsṛjya pāṇibhyāṃ pradīpāṃstava vāhinī /
yuyudhe pāṇḍavaiḥ sārdhamunmattavadasaṅkulā //

rajasā tamasā caiva saṃvṛte bhṛśadāruṇe /
kevalaṃ nāmagotreṇa prāyudhyanta jayaiṣiṇaḥ //

aśrūyanta hi nāmāni śrāvyamāṇāni pārthivaiḥ /
praharadbhirmahārāja svayaṃvara ivāhave //

niḥśabdamāsītsahasā punaḥ śabdo mahānabhūt /
kruddhānāṃ yudhyamānānāṃ jīyatāṃ jayatāmapi //

yatrayatra sma dṛśyante pradīpāḥ kurusattama /
tatratatra sma śūrāste nipatanti pataṅgavat //

tathā saṃyudhyamānānāṃ vigāḍhā'sīnmahāniśā /
pāṇḍavānāṃ ca rājendra kauravāṇāṃ ca sarvaśaḥ //