Mahabharata · Chapter 7.172

tataste prādravansarve tvaritā yuddhadurmadāḥ /
amṛṣyamāṇāḥ saṃrabdhā yuyudhānarathaṃ prati //

te rathaiḥ kalpitai rājanhemarūpyavibhūṣitaiḥ /
sādibhiśca gajaiścaiva parivavruḥ samantataḥ //

athainaṃ koṣṭhakīkṛtya sarvataste mahārathāḥ /
siṃhanādāṃstataścakrustarjayanti sma sātyakim //

te'bhyavarṣañcharaistīkṣṇaiḥ sātyakiṃ satyavikramam /
tvaramāṇā mahāvīrā mādhavasya vadhaiṣiṇaḥ //

tāndṛṣṭvā patatastūrṇaṃ śaineyaḥ paravīrahā /
pratyagṛhṇānmahābāhuḥ pramuñcanviśikhānbahūn //

tatra vīro maheṣvāsaḥ sātyakiryuddhadurmadaḥ /
nicakarta śirāṃsyugraiḥ śaraiḥ sannataparvabhiḥ //

hastihastānhayagrīvā bāhūnapi ca sāyudhān /
kṣurapraiḥ śātayāmāsa tāvakānāṃ sa mādhavaḥ //

patitaiścāmaraiścaiva śvetacchatraiśca bhārata /
babhūva dharaṇī pūrṇā nakṣatrairdyauriva prabho //

eteṣāṃ yuyudhānena yudhyatāṃ yudhi bhārata /
babhūva tumulaḥ śabdaḥ pretānāṃ krandatāmiva //

tena śabdena mahatā pūritā'bhūdvasundharā /
rātriḥ samabhavaccaiva tīvrarūpā bhayāvahā //

dīryamāṇaṃ balaṃ dṛṣṭvā yuyudhānaśarāhatam /
śrutvā ca vipulaṃ nādaṃ niśīthe romaharṣaṇe //

sutastavābravīdrājansārathiṃrathināṃ varaḥ /
yatraiṣa śabdastatrāśvāṃścodayeti punaḥpunaḥ //

tena sañcodyamānastu tatastāṃsturagottamān /
sūtaḥ sañcodayāmāsa yuyudhānarathaṃ prati //

tato duryodhanaḥ kruddho dṛḍhadhanvā jitaklamaḥ /
śīghrahastaścitrayodhī yuyudhānamupādravat //

tataḥ pūrṇāyatotsṛṣṭaiḥ śaraiḥ śoṇitabhojanaiḥ /
duryodhanaṃ dvādaśabhirmādhavaḥ pratyavidhyata //

duryodhanastena tathā pūrvamevārditaḥ śaraiḥ /
śaineyaṃ daśabhirbāṇaiḥ pratyavidhyadamarṣitaḥ //

tataḥ samabhavadyuddhaṃ tumulaṃ bharatarṣabha /
pāñcālānāṃ ca sarveṣāṃ bharatānāṃ ca dāruṇam //

śaineyastu raṇe kruddhastava putraṃ mahāratham /
sāyakānāmaśītyā tu vivyādhorasi bhārata //

tato'sya vāhānsamare śarairninye yamakṣayam /
sārathiṃ ca rathāttūrṇaṃ pātayāmāsa patriṇā //

hatāśve tu rathe'tiṣṭhanputrastava viśāmpate /
mumoca niśitānbāṇāñśaineyasya rathaṃ prati //

śarānpañchasatāṃstasmai śaineyaḥ kṛtahastavat /
ciccheda samare rājanpreṣitāṃstanayena te //

athāpareṇa bhallena muṣṭideśe mahaddhanuḥ /
ciccheda tarasā yuddhe tava putrasya mādhava //

viratho vidhanuṣkaśca sarvalokeśvaraḥ prabhuḥ /
āruroha rathaṃ tūrṇaṃ bhāsvaraṃ kṛtavarmaṇaḥ //

duryodhane parāvṛtte śaineyastava vāhinīm /
drāvayāmāsa viśikhairniśāmadhye viśāmpate //

śakuniścārjunaṃ rājanparivārya samantataḥ / rathairanekasāhasrairgajaiścāpi sahasraśaḥ /
tathā hayasahasraiśca nānāśastrairavākirat //

te mahāstrāṇi sarvāṇi vikiranto'rjunaṃ prati /
arjunaṃ yodhayanti sma kṣatriyāḥ kālacoditāḥ //

tānyarjunaḥ sahasrāṇi rathavāraṇavājinām /
pratyavārayadāyastaḥ prakurvanvipulaṃ kṣayam //

tatastu samare śūraḥ śakuniḥ saubalastadā /
vivyādha niśitairbāṇairarjunaṃ prahasanniva //

punaścaiva śatenāsya saṃrurodha mahāratham //

tamarjunastu viṃśatyā vivyādha yudhi bhārata /
athetarānmaheṣvāsāṃstribhistribhiravidhyata //

nivārya tānbāṇagaṇairyudhi rājandhanañjayaḥ /
jaghāna tāvakānyodhānvajrapāṇirivāsurān //

bhujaiśchinnairmahīpāla hastihastopamairmṛdhe /
samākīrṇā mahī bhāti pañcāsyairiva pannagaiḥ //

śirobhiḥ sakirīṭaiśca sunasaiścārukuṇḍalaiḥ /
sandaṣṭauṣṭhapuṭaiḥ kruddhaistathaivodvṛttalocanaiḥ //

niṣkacūḍāmaṇidharaiḥ kṣatriyāṇāṃ piyaṃvadaiḥ /
paṅkajairiva vinyastaiḥ parvatairvibabhau mahī //

kṛtvā tatkarma bībhatsurugramugraparākramaḥ /
vivyādha śakuniṃ bhūyaḥ pañcabhirnataparvabhiḥ //

atāḍayadulūkaṃ ca tribhireva tathā śaraiḥ /
ulūkaṃ punarājaghne tribhireva mahāyaśāḥ //

sa tu tena samāviddha krodhāddviguṇavikramaḥ /
śarairanekasāhasraiḥ so'rjunaṃ pratyavidhyata //

tamulūkastathā viddhā vāsudevamatāḍayat /
nanāda ca mahānādaṃ pūrayanniva medinīm //

arjunaḥ śakuneścāpaṃ sāyakairacchinadraṇe /
ninye ca caturo vāhānyamasya sadanaṃ prati //

tato rathādavaplutya saubalo bharatarṣabha /
ulūkasya rathaṃ tūrṇamāruroha viśāmpate //

tāvekarathamārūḍhau pitāputrau mahārathau /
pārthaṃ siṣicaturbāṇairgiriṃ meghāvivāmbubhiḥ //

tau tu viddhā mahārāja pāṇḍavo niśitaiḥ śaraiḥ /
vidrāvayaṃstava camūṃ śataśo vyadhamaccharaiḥ //

anilena yathā'bhrāṇi vicchinnāni samantataḥ /
vicchinnāni tathā rājanbalānyāsanviśāmpate //

tadbalaṃ bharataśceṣṭha vadhyamānaṃ tadā niśi /
pradudrāva diśaḥ sarvā vīkṣamāṇaṃ bhayārditam //

utsṛjya vāhānsamare codayantastathā'pare /
sambhrāntāḥ paryadhāvanta tasmiṃstamasi dāruṇe //

vijitya samare yodhāṃstāvakānbharatarṣabha /
dadhmaturmuditau śaṅkhau vāsudevadhanañjayau //

dhṛṣṭadyumno mahārāja droṇaṃ viddhā tribhiḥ śaraiḥ /
ciccheda dhanuṣastūrṇaṃ jyāṃ śareṇa śitena ha //

tannidhāya dhanurbhūmau droṇaḥ kṣatriyamardanaḥ /
ādade'nyaddhanuḥ śūro vegavatsāravattaram //

dhṛṣṭadyumnaṃ tato droṇo viddhā saptabhirāśugaiḥ /
sārathiṃ pañcabhirbāṇai rājanvivyādha saṃyuge //

taṃ nivārya śaraistūrṇaṃ dhṛṣṭadyumno mahārathaḥ /
vyadhamatkauravīṃ senāmāsurīṃ maghavāniva //

vadhyamāne bale tasmiṃstava putrasya māriṣa /
prāvartata nadī ghorāṃ śoṇitaughataraṅgiṇī //

ubhayoḥ senayormadhye narādhadvipavāhinī /
tathā vaitaraṇī rājanyatarājupuraṃ prati //

drāvayitvā tu tatsainyaṃ dhṛṣṭadyumnaḥ pratāpavān /
abhyarājata tejasvī śakro devagaṇeṣviva //

atha dadhmurmahāśaṅkhāndhṛṣṭadyumnaśikhaṇḍinau /
yamau ca yuyudhānaśca pāṇḍakya vṛkodaraḥ //

jitvā rathasahasrāṇi tāvakānāṃ mahārathāḥ /
siṃhanādaravāṃścakruḥ pāṇ़ḍavā jitakāśinaḥ //

paśyatastava putrasya karṇasya ca raṇotkaṭāḥ /
tathā droṇasya śūrasya drauṇeścaiva viśāmpate //