Mahabharata · Chapter 7.16

tadbalaṃ sumahaddīrṇaṃ tvadīyaṃ prekṣya vīryavān /
dadhāraiko raṇe pāṇḍūnvṛṣaseno'stramāyayā //

śarā daśa diśo muktā vṛṣasenena saṃyuge /
viceruste vinirbhidya naravājirathadvipān //

tasya dīptā mahābāṇā viviśceruḥ sahasraśaḥ /
bhānoriva mahārāja gharmakāle marīcayaḥ //

tenārditā mahārāja rathinaḥ sādinastathā /
nipetururvyāṃ sahasā vātabhagnā iva drumāḥ //

hayaughāṃśca rathaughāṃśca gajaughāṃśca mahārathaḥ /
apātayadraṇe rājañśataśo'tha sahasraśaḥ //

dṛṣṭvā tamekaṃ samare vicarantamabhītavat /
sahitāḥ sarvarājānaḥ parivavruḥ samantataḥ //

nākulistu śatānīko vṛṣasenaṃ samabhyayāt /
vivyādha cainaṃ daśabhirnārācairmarmabhedibhiḥ //

tasya karṇātmajaścāpaṃ chittvā ketumapātayat /
taṃ bhrātaraṃ parīpsanto draupadeyāḥ samabhyayuḥ //

karṇātmajaṃ śaravrātairadṛśyaṃ cakrurañjasā /
tānnadanto'bhyadhāvanta droṇaputramukhā rathāḥ //

chādayanto mahārāja draupadeyānmahārathān /
śarairnānāvidhaistūrṇaṃ parvatāñjaladā iva //

tānpāṇḍavāḥ pratyagṛhṇaṃstvaritāḥ putragṛddhinaḥ /
pāñcālāḥ kekayā matsyāḥ sṛñjayāścodyatāyudhāḥ //

tadyuddhamabhavaddhoraṃ sumahadromaharṣaṇam /
tvadīyaiḥ pāṇḍuputrāṇāṃ devānāmiva dānavaiḥ //

evaṃ yuyudhire vīrāḥ saṃrabdhāḥ kurupāṇḍavāḥ /
parasparamudīkṣantaḥ parasparakṛtāgasaḥ //

teṣāṃ dadṛśire kopādvapūmṣyamitatejasām /
yuyutsūnāmivākāśe patattrivarabhoginām //

bhīmakarṇakṛpadroṇadrauṇipārṣatasātyakaiḥ /
babhāse sa raṇoddeśaḥ kālasūryairivoditaiḥ //

prajānāṃ sankṣaye ghore yathā sūryodayo bhavet /
śūrāṇāmudayastadvadāsītpuruṣasattama //

tadāsīttumulaṃ yuddhaṃ nighnatāmitaretaram /
mahābalānāṃ balibhirdānavānāṃ yathā suraiḥ //

tato yudhiṣṭhirānīkamuddhūtārṇavaniḥsvanam /
tvadīyamavadhītsainyaṃ sampradrutamahāratham //

tatprabhagnaṃ balaṃ dṛṣṭvā śatrubhirbhṛśamarditam /
alaṃ drutena vaḥ śūrā iti droṇo'bhyabhāṣata //

bhāradvājamamarṣaśca vikramaśca samāviśat / samuddhṛtya niṣaṅgācca dhanurjyāmavamṛjya ca /
mahāśaradhanuṣpāṇiryantāramidamabravīt //

sārathe yāhi yatraiṣa pāṇḍareṇa virājatā /
dhriyamāṇena ccheṇa rājā tiṣṭhati dharmarāṭ //

tadetaddīryate sainyaṃ dhārtarāṣṭramanekadhā /
etatsaṃstambhayiṣyāmi prativārya yudhiṣṭhiram //

na hi māmabhivarṣantaṃ saṃyuge tāta pāṇḍavāḥ /
mātsyapāñcālarājānaḥ sarve ca sahasomakāḥ //

arjuno matprasādāddhi mahāstrāṇi samāptavān /
na māmutsahate tāta na bhīmo na ca sātyakiḥ //

matprasādāddhi bībhatsuḥ parameṣvāsatāṃ gataḥ /
mamaivāstraṃ vijānāti dhṛṣṭadyumno'pi pārṣataḥ //

nāyaṃ saṃrakṣituṃ kālaḥ prāṇāṃstāta jayaiṣiṇā /
yāhi sargaṃ puraskṛtya yaśase ca jayāya ca //
sañjaya uvāca /

evaṃ sañcodito yantā droṇamabhyavahattataḥ //

tadā'śvahṛdayenāśvānabhimantryāśu harṣayan /
rathena savarūthena bhāsvareṇa virājatā //

taṃ karūśāśca mātsyāśca cedayaśca sasātvatāḥ /
pāṇḍavāśca sapāñcālāḥ sahitāḥ paryavārayan //

tataḥ śoṇahayaḥ kruddhaścaturdanta iva dvipaḥ /
praviśya pāṇḍavānīkaṃ yudhiṣṭhiramupādravat //

tamāvidhyacchitairbāṇaiḥ kaṅkapatrairyudhiṣṭhiraḥ /
tasya droṇo dhanuśchitvā taṃ drutaṃ samupādravat //

cakrarakṣaḥ kumārastu pāñcālānāṃ yaśaskaraḥ /
dadhāra droṇamāyāntaṃ veleva saritāṃ patim //

droṇaṃ nivāritaṃ dṛṣṭvā kumāreṇa dvijarṣabham /
siṃhanādaravo hyāsītsādhusādhviti bhāṣitam //

kumārastu tato droṇaṃ sāyakena mahāhave /
vivyādhorasi saṅkruddhaḥ siṃhavacca nadanmuhuḥ //

saṃvārya ca raṇe droṇaṃ kumārastu mahābalaḥ /
śarairanekasāhasraiḥ kṛtahasto jitaśramaḥ //

taṃ śūramāryavratinaṃ mantrāstreṣu kṛtaścamam /
cakrarakṣataṃ parāmṛdrātkumāraṃ dvijapuṅgavaḥ //

sa madhyaṃ prāpya sainyānāṃ sarvāḥ pravicarandiśaḥ /
tava sainyasya goptāsīdbhāradvājo dvijarṣabhaḥ //

śikhaṇḍinaṃ dvādaśabhirviṃśatyā cottamaujasam /
nakulaṃ pañcabhirviddhvā sahadevaṃ ca saptabhiḥ //

yudhiṣṭhiraṃ dvādaśabhirdraupadeyāṃstribhistribhiḥ /
sātyakiṃ pañcabhirviddhvā matsyaṃ ca daśabhiḥ śaraiḥ //

vyakṣobhayadraṇe yodhānyathāmukhyamabhidravan /
abhyavartataṃ samprepsuḥ kuntīputraṃ yudhiṣṭhiram //

yugandharastato rājanbhāradvājaṃ mahāratham /
vārayāmāsa saṅkrudvaṃ vātoddhatamivārṇavam //

yudhiṣṭhiraṃ sa viddhvā tu śaraiḥ sannataparvabhiḥ /
yugandharaṃ tu bhallane rathanīḍādapātayat //

taṃ vijitya mahātejā bhāradvājo mahāmanāḥ /
abhyavartata samprepsuḥ kuntīputraṃ yudhiṣṭhiram //

tato virāṭadrupadau kekayāḥ sātyakiḥ śibiḥ /
vyāghradattaśca pāñcalyaḥ siṃhasenaśca vīryavān //

ete cānye ca bahavaḥ parīpsanto yudhiṣṭhiram /
āvavrustasya panthānaṃ kirantaḥ sāyakānbahūn //

vyāghradattastu pāñcālyo droṇaṃ vivyādha mārgaṇaiḥ /
pañcāśatā śitai rājaṃstata uccukruśurjanāḥ //

tvaritaṃ siṃhasenastu droṇaṃ viddhvā mahāratham /
prāhasatsahasā hṛṣṭastrāsayanvai mahārathān //

tato viṣphārya nayane dhanurjyāmavamṛjya ca /
talaśabdaṃ mahatkṛtvā droṇastaṃ samupādravat //

tatastu siṃhasenasya śiraḥ kāyātsakuṇḍalam /
vyāghradattasya cākramya bhallābhyāmāharadbalī //

tānpramṛjya śaravrātaiḥ pāṇḍavānāṃ mahārathān /
yudhiṣṭhirarathābhyāśe tasthau mṛtyurivāntakaḥ //

tato'bhavanmahāśabdo rājanyaudhiṣṭhire bale /
hṛto rājeti yodhānāṃ samīpasthe yatavrate //

abruvansainikāstatra dṛṣṭvā droṇasya vikramam /
adya rājā dhārtarāṣṭraḥ kṛtārtho vai bhaviṣyati //

asminmahūrte droṇastu pāṇḍavaṃ gṛhya harṣitaḥ /
āgamiṣyati no nūnaṃ dhārtarāṣṭrasya saṃyuge //

evaṃ sañjalpatāṃ teṣāṃ tāvakānāṃ mahārathaḥ /
āyājjavena kaunteyo rathaghoṣeṇa nādayan //

śoṇitodāṃ rathāvartāṃ kṛtvā viśasane nadīm /
śūrāsthicayasaṅkīrṇāṃ pretakūlāpahāriṇīm //

tāṃ śaraughamahāphenāṃ prāsamatsyasamākulām /
nadīmuttīrya vegena kurūnvidrāvya pāṇḍavaḥ //

tataḥ kirīṭi sahasā droṇānīkamupādravat /
chādayanniṣujālena mahatā mohayanniva //

śīghramabhyasyato bāṇānsandadhānasya cāniśam /
nāntaraṃ dadṛśe kaścitkaunteyasya yaśasvinaḥ //

na diśo nāntarikṣaṃ ca na dyaurnaiva ca medinī /
adṛśyanta mahārāja bāṇabhūtā ivābhavan //

nādṛśyata tadā rājaṃstatra kiñcana saṃyuge /
bāṇāndhakāre mahati kṛte gāṇḍīvadhanvanā //

sūrye cāstamanuprāpte tamasā cābhisaṃvṛte / nājñāyata tadā śatrurna suhṛnna ca kaścana /

tato'vahāraṃ cakruste droṇaduryodhanādayaḥ /
tānviditvā punastrastā na yuddhamanasaḥ parān //

svānyanīkāni bībhatsuḥ śanakairavahārayat /
tato'bhituṣṭuvuḥ pārthaṃ prahṛṣṭāḥ pāṇḍusṛñjayāḥ //

pāñcālāśca manojñābhirvāgbhiḥ sūryamivarṣayaḥ /
eṃ svaśibiraṃ prāyājjitvā śatrūndhanañjayaḥ //

pṛṣṭhataḥ sarvasainyānāṃ mudito vai sakeśavaḥ // masāragalvarkamuvarṇarūpairvajrapravālasphaṭikaiśca mukhyaiḥ /

citre rathe pāṇḍusuto babhāse nakṣatracitre viyatīva candraḥ //