Mahabharata · Chapter 7.168

sahadevamathāyāntaṃ droṇapreptuṃ viśāmpate /
karṇo vaikartano yuddhe vārayāmāsa bhārata //

sahadevastu rādheyaṃ viddhvā navabhirāśugaiḥ /
punarvivyādha daśabhirviśikhairnataparvabhiḥ //

taṃ karṇaḥ prativivyādha śatena nataparvaṇām /
sajyaṃ cāsya dhanuḥ śīghraṃ ciccheda laghuhastavat //

tato'nyaddhanurādāya mādrīputraḥ pratāpavāna /
karṇaṃ vivyādha viṃśatyā tadadbhutamivābhavat //

tasya karṇo hayānhatvā śaraiḥ sannataparvabhiḥ /
sārathiṃ cāsya bhallena drutaṃ ninye yamakṣayam //

virathaḥ sahadevastu khaṅgaṃ carma samādade /
tadapyasya śaraiḥ karṇo vyadhamatprahasanniva //

atha gurvīṃ mahāghorāṃ hemacitrāṃ mahāgadām /
preṣayāmāsa saṅkruddho vaikartanarathaṃ prati //

tāmāpatantīṃ sahasā sahadevapracoditām /
vyaṣṭambhayaccharaiḥ karṇo bhūmau caināmapātayat //

gadāṃ vinihatāṃ dṛṣṭvā sahadevastvarānvitaḥ /
śaktiṃ cikṣepa karṇāya tāmapyasyācchinaccharaiḥ //

sasambhramaṃ tatastūrṇamavaplutya rathottamāt /
sahadevo mahārāja dṛṣṭvā karṇaṃ vyavasthitam //

rathacakraṃ pragṛhyājau mumocādhirathaṃ prati / tadāpatadvai sahasā kālacakramivodyatam /
śarairanekasāhasrairācchinatsūtanandanaḥ //

tasmiṃstu nihate cakre sūtajena mahātmanā /
īṣādaṇḍakayokrāṃśca yugāni vividhāni ca //

hastyaṅgāni tathāśvāṃśca mṛtāṃśca puruṣānbahūn /
cikṣepa karṇamuddiśya karṇastānvyadhamaccharaiḥ //

sa nirāyudhamātmānaṃ jñātvā mādravatīsutaḥ /
vāryamāṇastu viśikhaiḥ sahadevo raṇaṃ jahau //

tamabhidrutya rādheyo muhūrtādbharatarṣabha /
abravītprahasanvākyaṃ sahadevaṃ viśāmpate //

mā yudhyasva raṇe'dhīra viśiṣṭai rathibhiḥ saha /

sadṛśairyudhya mādreya vaco me mā viśaṅkithāḥ //
athainaṃ dhanuṣogreṇa tudanbhūyo'bravīdvacaḥ //

eṣo'rjuno raṇe tūrṇaṃ yudhyate kurubhiḥ saha /
tatra gacchasva mādreya gṛhaṃ vā yadi manyase //

evamuktvā tu taṃ karṇo rathena rathināṃ varaḥ /
prāyātpāñcālapāṇḍūnāṃ sainyāni pradahanniva //

vadhaṃ prāptaṃ tu mādreyaṃ nāvadhītsamare'rihā /
kuntyāḥsmṛtvā vaco rājansatyasandho mahāyaśāḥ //

sahadevastato rājanvimanāḥ śarapīḍitaḥ /
karṇavākśarataptaśca jīvitānniravidyata //

āruroha rathaṃ cāpi pāñcālyasya mahātmanaḥ /
janamejayasya samare tvarāyukto mahārathaḥ //

virāṭaṃ sahasenaṃ tu droṇārthe drutamāgatam /
madrarājaḥ śaraugheṇa cchādayāmāsa dhanvinam //

tayoḥ samabhavadyuddhaṃ samare dṛḍhadhanvinoḥ /
yādṛśaṃ hyabhavadrājañjambhavāsavayoḥ purā //

madrarājo mahārāja virāṭaṃ vāhinīpatim /
ājaghne tvaritastūrṇaṃ śatena nataparvaṇām //

prativivyādha taṃ rājannavabhirniśitai śaraiḥ /
punaścainaṃ trisaptatyā bhūyaścaiva śatena tu //

tasya madrādhipo hatvā caturo rathavājinaḥ /
sūtaṃ dhvajaṃ ca samare śarābhyāṃ sannyapātayat //

hatāśvāttuṃ rathāttūrṇamavaplutya mahārathaḥ /
tasthau viṣphārayaṃścāpaṃ vimuñcaṃśca śitāñcharān //

śatānīkastato dṛṣṭvā bhrātaraṃ hatavāhanam /
rathenābhyapatattūrṇaṃ sarvalokasya paśyataḥ //

śatānīkamathāyāntaṃ madrārājo mahāmṛdhe /
viśikhairbahubhirviddhvā tato ninye yamakṣayam //

tasmiṃstu nihate vīre virāṭo rathasattamaḥ /
āruroha rathaṃ tūrṇaṃ tameva dhvajamālinam //

tato viṣphārya nayane krodhāddviguṇavikramaḥ /
madrarājarathaṃ tūrṇaṃ chādayāmāsa patribhiḥ //

tato madrādhipaḥ kruddhaḥ śareṇānataparvaṇā /
ājaghānorasi dṛḍhaṃ virāṭaṃ vāhinīpatim //

so'tividdho mahārāja rathopastha upāviśat / kaśmalaṃ cāviśattīvraṃ virāṭo bharatarṣabha /
sārathistamapovāha samare śaravikṣatam //

tataḥ sā mahatī senā prādravanniśi bhārata /
vadhyamānā śaraśataiḥ śalyenāhavaśobhinā //

tāṃ dṛṣṭvā vidrutāṃ senāṃ vāsudevadhanañjayau /
prayātau tatra rājendra yatra śalyo vyavasthitaḥ //

tau tu pratyudyayau rājanrākṣasendro hyalāyudhaḥ /
aṣṭacakrasamāyuktamāsthāya pravaraṃ ratham //

turaṅgamamukhairyuktaṃ piśācairghoradarśanaiḥ / lohitārdrapatākaṃ taṃ raktamālyavibhūṣitam /
kārṣṇāyasamayaṃ ghoramṛkṣacarmasamāvṛtam //

raudreṇa citrapakṣeṇa vivṛtākṣeṇa kūjatā / dhvajenocchritadaṇḍena gṛdhrarājena rājatā /
sa babhau rākṣaso rājanbhinnāñjanacayopamaḥ //

rurodhārjunamāyāntaṃ prabhañjanamivādrirāṭ /
kiranbāṇagaṇānrājañśataśo'rjunamūrdhani //

atitīvraṃ mahādyuddhaṃ nararākṣasayostadā / draṣṭṝṇāṃ prītijananaṃ sarveṣāṃ tatra bhārata /
gṛdhrakākabalolūkakaṅkagomāyuharṣaṇam //

tamarjunaḥ śatenaiva patriṇāṃ samatāḍayat /
navabhiśca śitairbāṇairdhvajaṃ ciccheda bhārata //

sārathiṃ ca tribhirbāṇaistribhireva triveṇukam /
dhanurekena ciccheda caturbhiścaturo hayān //

punaḥ sajyaṃ kṛtaṃ cāpaṃ tadapyasya dvidhā'cchinat /
virathasyodyataṃ khaṅgaṃ śareṇāsya dvidhā'karot //

athainaṃ niśitairbāṇaiścaturbhirbharatarṣabha /
pārtho'vidhyadrākṣasendraṃ sa vidvaḥ prādravadbhayāt //

taṃ vijityārjunastūrṇaṃ droṇāntikamupāyayau /
kiṟañśaragaṇānrājannaravāraṇavājiṣu //

vadhyamānā mahārāja pāṇḍavena yaśasvinā /
sainikā nyapatannurvyāṃ vātanunnā iva drumāḥ //

teṣu tūtsādyamāneṣu phalgunena mahātmanā /
samprādravadbalaṃ sarvaṃ putrāṇāṃ te viśāmpate //