Mahabharata · Chapter 7.167

bhūristu samare rājañśaineyaṃ rathināṃ varam /
āpatantamapāsedhatprayāṇādiva kuñjaram //

athainaṃ sātyakiḥ kruddhaḥ pañcabhirniśitaiḥ śaraiḥ /
vivyādha hṛdaye tasya prāsravattasya śoṇitam //

tathaiva kauravo yuddhe śaineyaṃ yuddhadurmadam /
daśibhirniśitaistīkṣṇairavidhyata bhujāntare //

tāvanyonyaṃ mahārāja tatakṣāte śarairbhṛśam /
krodhasaṃraktanayanau krodhādviṣphārya kārmuke //

tayorāsīnmahārāja śastravṛṣṭiḥ sudāruṇā /
kruddhayoḥ sāyakamucoryamāntakanikāśayoḥ //

tāvanyonyaṃ śaraiḥ rājansañchādya samavasthitau /
muhūrtaṃ caiva tadyuddhaṃ samarūpamivābhāvat //

tataḥ kruddho mahārāja śaineyaḥ prahasanniva /
dhanuściccheda samare kauravyasya mahātmanaḥ //

athainaṃ chinnadhanvānaṃ navabhirniśitaiḥ śaraiḥ /
vivyādha hṛdaye tūrṇaṃ tiṣṭhatiṣṭheti cābravīt //

so'tividdho balavatā śatruṇā śatrutāpanaḥ /
dhanuranyatsamādāya sātvataṃ pratyavidhyata //

sa viddhvā sātvataṃ bāṇaistribhireva viśāmpate /
dhanuściccheda bhallena sutīkṣṇena hasanniva //

chinnadhanvā mahārāja sātyakiḥ krodhamūrcchitaḥ /
prajahāra mahāvegāṃ śaktiṃ tasya mahorasi //

sa tu śaktyā vibhinnāṅgo nipapāta rathottamāt /
lohitāṅga ivākāśāddīptaraśmiryadṛcchayā //

taṃ tu dṛṣṭvā hataṃ śūramaśvatthāmā mahārathaḥ /
abhyadhāvata vegena śaineyaṃ prati saṃyuge //

tiṣṭhatiṣṭheti cābhāṣya śaineyaṃ sa narādhipa /
abhyavarṣaccharaugheṇa meruṃ vṛṣṭyā yathāmbudaḥ //

tamāpatantaṃ saṃrabdhaṃ śaineyasya rathaṃ prati /
ghaṭotkaco'bravīdrājannāhaṃ muktvā mahārathaḥ //

tiṣṭhatiṣṭha na me jīvandroṇaputra gamiṣyasi /
eṣa tvāṃ nihaniṣyāmi mahiṣaṃ mṛgarāḍiva //

yuddhaśraddhāmahaṃ te'dya vineṣyāmi raṇājire / ityuktvā krodhatāmrākṣo rākṣasaḥ paravīrahā /
droṇimabhyadravatkruddho gajendramiva kesarī //

rathākṣamātrairiṣubhirabhyavarṣaddhaṭotkacaḥ /
rathināmṛṣabhaṃ drauṇiṃ dhārābhiriva toyadaḥ //

śaravṛṣṭiṃ tu tāṃ prāptāṃ śarairāśīviṣopamaiḥ /
śātayāmāsa samare tarasā drauṇirutsmayan //

tataḥ śaraśataistīkṣṇairmarmabhedibhirāśugaiḥ /
samācinodrākṣasendraṃ ghaṭotkacamarindamam //

sa śarairācitastena rākṣaso raṇamūrdhani /
vyakāśata mahārāja śvāvicchalalato yathā //

tataḥ krodhasamāviṣṭo bhaimaseniḥ pratāpavān /
śarairavacakartograirdrauṇiṃ vajrāśaniprabhaiḥ //

kṣuraprairardhacandraiśca nārācaiḥ saśilīmukhaiḥ /
varāhakarṇairnālīkairvikarṇaiścābhyavīvṛṣat //

tāṃ śastravṛṣṭimatulāṃ vajrāśanisamasvanām /
patantīmupari kruddho drauṇiravyathitendriyaḥ //

suduḥsahāṃ śarairghorairdivyāstrapratimantritaiḥ /
vyadhamatsumahātejā mahābhrāṇīva mārutaḥ //

tato'ntarikṣe bāṇānāṃ saṅgrāmo'nya ivābhavat /
ghorarūpo mahārāja yodhānāṃ harṣavardhanaḥ //

tato'strasandharṣakṛtairvisphuliṅgaiḥ samantataḥ /
vamau niśāmukhe vyoma khadyotairiva saṃvṛtam //

sa mārgaṇagaṇairdrauṇirdiśaḥ pracchādya sarvataḥ / priyārthaṃ tava putrāṇāṃ rākṣasaṃ samavākirat //

tataḥ pravavṛte yuddhaṃ drauṇirākṣasayormṛdhe /
vigāḍhe rajanīmadhye śakraprahlādayoriva //

tato ghaṭotkaco bāṇairdaśabhirdrauṇimāhave /
jaghānorasi saṅkruddhaḥ kālajvalanasannibhaiḥ //

sa tairabhyāyatairviddho rākṣasena mahābalaḥ /
cacāla samare drauṇirvātanunna iva drumaḥ //

sa mohaṃ samare prāpto dhvajayaṣṭiṃ samāśritaḥ //

tato hāhākṛtaṃ sainyaṃ tava sarvaṃ janādhipa /
hataṃ sma menire sarve droṇasūnuṃ janādhipāḥ //

taṃ tu dṛṣṭvā tathāvasthamaśvatthāmānamāhave /
pāñcālāḥ sṛñjayāścaiva siṃhanādaṃ pracakrire //

pratilabhya tataḥ sañjñāmaśvatthāmā mahābalaḥ /
dhanuḥ prapīḍya vāmena kareṇāmitrakarśanaḥ //

mumocākarṇapūrṇena dhanuṣā śaramuttamam /
yamadaṇ़ḍopamaṃ ghoramuddiśyāśu ghaṭotkacam //

sa bhittvā hṛdayaṃ tasya rākṣasasya śarottamaḥ /
viveśa vasudhāmugraḥ sapuṅkhaḥ pṛthivīpate //

so'tividdho mahārāja rathopastha upāviśat /
rākṣasendraḥ pubalavāndrauṇinā raṇaśālinā //

dṛṣṭvā vimūḍhaṃ haiḍimbaṃ sārathistu raṇājirāt /
drauṇeḥ sakāśātsambhrāntastvapaninyetvarānvitaḥ //

tathā tu samare viddhvā rākṣasendraṃ ghaṭotkacam /
nanāda sumahānādaṃ droṇaputro mahārathaḥ //

pūjitastava putraiśca sarvayodhaiśca bhārata /
vapuṣā'tiprajajvāla madhyāhna iva bhāskaraḥ //

bhīmasenaṃ tu yudhyantaṃ bhāradvājarathaṃ prati /
svayaṃ duryodhano rājā pratyavidhyacchitaiḥ śaraiḥ //

taṃ bhīmaseno daśabhiḥ śarairvivyādha māriṣa /
duryodhano'pi viṃśatyā śarāṇāṃ pratyavidhyata //

tau sāyakairavacchinnāvadṛśyetāṃ raṇājire /
meghajālasamācchannau nabhasīvendubhāskarau //

atha duryodhano rājā bhīmaṃ vivyādha patribhiḥ /
pañcabhirbharataśreṣṭha tiṣṭhatiṣṭheti cābravīt //

tasya bhīmo dhanuśchittvā dhvajaṃ ca daśabhiḥ śaraiḥ /
vivyādha kauravaśreṣṭhaṃ navatyā nataparvaṇām //

tato duryodhanaḥ kruddho bhanuranyanmahattaram / gṛhītvā bharataśreṣṭho bhīmasenaṃ śitaiḥ śaraiḥ /
apīḍayadraṇamukhe paśyatāṃ sarvadhanvinām //

tānnihatya śarānbhīmo duryodhanadhanuścyutān /
kauravaṃ pañcaviṃśatyā kṣudrakāṇāṃ samārpayat //

duryodhanastu saṅkruddho bhīmasenasya māriṣa /
kṣurapreṇa dhanuśchittvā daśabhiḥ pratyavidhyata //

athānyaddhanurādāya bhīmaseno mahābalaḥ /
vivyādha nṛpatiṃ tūrṇaṃ saptabhirniśitaiḥ śaraiḥ //

tadapyasya dhanuḥ kṣipraṃ ciccheda laghuhastavat /
dvitīyaṃ ca tṛtīyaṃ ca caturthaṃ pañcamaṃ tathā //

āttamāttaṃ mahārāja bhīmasya dhanurācchinat /
tava putro mahārāja jitakāśī madotkaṭaḥ //

sa tathā bhidyamāneṣu kārmukeṣu punaḥ punaḥ /
śaktiṃ cikṣepa samare sarvapāraśavīṃ śubhām //

mṛtyoriva svasāraṃ hi dīptāṃ vahniśikhāmiva /
sīmantamiva kurvantīṃ nabhaso'gnisamaprabhām //

aprāptāmeva tāṃ śaktiṃ tridhā ciccheda kauravaḥ /
paśyataḥ sarvalokasya bhīmasya ca mahātmanaḥ //

tato bhīmo mahārāja gadāṃ gurvīṃ mahāprabhām /
cikṣepāvidhya vegena duryodhanarathaṃ prati //

tataḥ sā sahasā vāhāṃstava putrasya saṃyuge /
sārathiṃ ca gadā gurvī mamardāsya rathaṃ punaḥ //

putrastu tava rājendra bhīmādbhītaḥ praṇaśya ca /
āruroha rathaṃ cānyaṃ nandakasya mahātmanaḥ //

tato bhīmo hataṃ matvā tava putraṃ mahāratham /
siṃhanādaṃ mahaccakre tarjayanniśi kauravān //

tāvakāḥ sainikāścāpi menire nihataṃ nṛpam /
tato'ticukruśuḥ sarve te hāheti samantataḥ //

teṣāṃ tu ninadaṃ śrutvā trastānāṃ sarvayodhinām /
bhīmasenasya nādaṃ ca śrutvā rājanmahātmanaḥ //

tato yudhiṣṭhiro rājā hataṃ matvā suyodhanam /
abhyavartata vegena yatra pārtho vṛkodaraḥ //

pāñcalāḥ kekayā mātsyāḥ sṛñjayāśca viśāmpate /
sarvodyogenābhijagmudroṇameva yuyutsayā //

tatrāsītsumahadyuddhaṃ droṇasyātha paraiḥ saha /
ghore tamasi magnānāṃ nighnatāmitaretaram //