Mahabharata · Chapter 7.166

vartamāne tadā raudre rātriyuddhe viśāmpate /
sarvabhūtakṣayakare dharmaputro yudhiṣṭhiraḥ //

abravītpāṇḍavāṃścaiva pāñcālāṃścaiva somakān /
abhidravata saṃyāta droṇameva jighāṃsayā //

rājñaste vacanādrājanpāñcālāḥ sṛñjayāstathā /
droṇamevābhyavartanta nadanto bhairavānravān //

tānvayaṃ pratigarjantaḥ pratyudyātāḥ sma harṣitāḥ /
yathāśakti yathotsāhaṃ yathāsatvaṃ ca saṃyuge //

kṛtavarmā tu hārdikyo yudhiṣṭhiramupādravat /
droṇaṃ prati samāyāntaṃ matto mattamiva dvipam //

śaineyaṃ śaravarṣāṇi vikirantaṃ samantataḥ /
abhyayātkauravo rājanbhūriḥ saṅgrāmamūrdhani //

sahadevamathāyāntaṃ droṇaprepsuṃ mahāratham /
karṇo vaikartano rājanvārayāmāsa pāṇ़ḍavam //

bhīmasenamathāyāntaṃ vyāditāsyāmivāntakam /
svayaṃ duryodhano rājā pratīpaṃ mṛtyumāvrajat //

nakulaṃ ca yudhāṃ śreṣṭhaṃ sarvayuddhaviśāradam /
śakuniḥ saubalo rājanvārayāmāsa satvaraḥ //

śikhaṇḍinamathāyāntaṃ rathena rathināṃ varam /
kṛpaḥ śāradvato rājanvārayāmāsa saṃyuge //

prativindhyamathāyāntaṃ mayūrasadṛśairhayaiḥ /
duḥśāsano mahārāja yatto yattamavārayat //

bhaimasenimathāyāntaṃ māyāśataviśāradam /
aśvatthāmā mahārāja rākṣasaṃ pratyaṣedhayat //

drupadaṃ vṛṣasenastu sasainyaṃ sapadānugam /
vārayāmāsa samare droṇaprepsuṃ mahāratham //

virāṭaṃ drutamāyāntaṃ droṇasya nidhanaṃ prati /
madrarājaḥ susaṅkruddho vārayāmāsa bhārata //

śatānīkamathāyāntaṃ nākuliṃ rabhasaṃ raṇe /
citraseno rurodhāśu śarairdroṇaparīpsayā //

arjunaṃ ca yudhāṃśreṣṭhaṃ prādravantaṃ mahāratham /
alāyudho mahārāja rākṣasendro nyavārayat //

tathā droṇaṃ maheṣvāsaṃ nighnantaṃ śātravānraṇe /
dhṛṣṭadyumno'tha pāñcālyo hṛṣṭarūpamavārayat //

tathā'nyānpāṇḍuputrāṇāṃ samāyātānmahārathān /
tāvakā rathino rājanvārayāmāsurojasā //

gajārohā gajaistūrṇaṃ sannipatya mahāmṛdhe /
yodhayantaḥ sma dṛśyante śataśo'tha sahasraśaḥ //

niśīthe turagā rājandrāvayantaḥ parasparam /
samadṛśyanta vegena pakṣavanto yathā'drayaḥ //

sādinaḥ sādibhiḥ sārdhaṃ prāsaśaktyṛṣṭipāṇayaḥ /
samāgacchanmahārāja vinadantaḥ pṛthakpṛthak //

narāstu bahavastatra samājagmuḥ parasparam /
gādābhirmusalaiścaiva nānāśastraiśca saṃyuge //

kṛtavarmā tu hārdikyo dharmaputraṃ yudhiṣṭhiram /
vārayāmāsa saṅkruddho velevodvṛttamarṇavam //

yudhiṣṭhirastu hārdikyaṃ vidvvā pañcabhirāśugaiḥ /
punarvivyādha viṃśatyā tiṣṭhatiṣṭheti cābravīt //

kṛtavarmā tu saṅkruddho dharmaputrasya māriṣa /
dhanuściccheda bhallena taṃ ca vivyādha saptabhiḥ //

athānyaddhanurādāya dharmaputro mahārathaḥ /
hārdikyaṃ daśabhirbāṇairbāhvorurasi cārpayat //

mādhavastu raṇe viddho dharmaputreṇa māriṣa /
prākampata ca roṣeṇa saptabhiścārdayaccharaiḥ //

tasya pārtho dhanuśchittvā hastāvāpaṃ nikṛtya ca /
prāhiṇonniśitānbāṇānpañca rājañchilāśitān //

te tasya kavacaṃ bhittvā hemacitraṃ mahādhanam /
prāviśandharaṇīṃ bhittvā valmīkamiva pannagāḥ //

akṣṇornimeṣamātreṇa so'nyadādāya kārmukam /
vivyādha pāṇḍavaṃ ṣaṣṭyā sūtaṃ ca navabhiḥ śaraiḥ //

tasya śaktimameyātmā pāṇḍavo bhujagopamām /
cikṣepa bharaśreṣṭha rathe nyasya mahaddhanuḥ //

sā hemacitrā mahatī pāṇḍaveyena preritā /
nirbhidya dakṣiṇaṃ bāhuṃ prāviśaddharaṇītalam //

etasminneva kāle tu gṛhya pārthaḥ punardhanuḥ /
hārdikyaṃ chādayāmāsa śaraiḥ sannataparvabhiḥ //

tatastu samare śūro vṛṣṇīnāṃ pravaro rathī /
vyaścasūtarathaṃ cakre nimeṣārdhādyudhiṣṭhiram //

tatastu pāṇḍavo jyeṣṭhaḥ khaṅgaṃ carma samādade /
tadasya niśitairbāṇairvyadhamanmādhavo raṇe //

tomaraṃ tu tato gṛhya svarṇadaṇḍaṃ durāsadam /
praiṣayatsamare tūrṇaṃ hārdikyasya yudhiṣṭhiraḥ //

tamāpatantaṃ sahasā dharmarājabhujacyutam /
dvidhā ciccheda hārdikyaḥ kṛtahastaḥ smayanniva //

tataḥ śaraśatenājau dharmaputramavākirat /
kavacaṃ cāsya saṅkruddhaḥ śaraistīkṣṇairadārayat //

hārdikyaśarasañchannaṃ kavacaṃ tanmahādhanam /
vyaśīryata raṇe rājaṃstārājālamivāmbarāt //

sa cchinnadhanvā virathaḥ śīrṇavarmā śarārditaḥ /
apāyāsīdraṇāttūrṇaṃ dharmaputro yudhiṣṭhiraḥ //

kṛtavarmā tu nirjitya dharmātmānaṃ yudhiṣṭhiram /
punardroṇasya jugupe cakrameva mahātmanaḥ //