મહાભારત · અધ્યાય 7.162

તતો યુધિષ્ઠિરશ્ચૈવ ભીમસેનશ્ચ પાણ્ડવઃ ।
દ્રોણપુત્રં મહારાજ સમન્તાત્પર્યવારયન્ ॥

તતો દુર્યોધનો રાજા ભારદ્વાજેન સંવૃતઃ । અભ્યયાત્પાણ્ડવાન્સઙ્ખ્યે તતો યુદ્ધમવર્તત ।
ઘોરરૂપં મહારાજ ભીરૂણાં ભયવર્ધનમ્ ॥

અમ્બષ્ઠાન્માલવાન્વઙ્ગાઞ્છિબીંસ્ત્રૈગર્તકાનપિ ।
પ્રાહિણોન્મૃત્યુલોકાય ગણાન્ક્રુદ્ધો વૃકોદરઃ ॥

અભીષાહાઞ્છૂરસેનાન્ક્ષત્રિયાન્યુદ્ધદુર્મદાન્ ।
નિકૃત્ત્ય પૃથિવીં ચક્રે ભીમઃ શોણિતકર્દમામ્ ॥

યૌધેયાનદ્રિજાન્રાજન્મદ્રકાન્માલવાનપિ ।
પ્રાહિણોન્મૃત્યુલોકાય કિરીટી નિશિતૈઃ શરૈઃ ॥

પ્રગાઢમઞ્ચોગતિભિર્નારાચૈરભિતાડિતાઃ ।
નિપેતુર્દ્વિરદા ભૂમૌ દ્વિશૃઙ્ગા ઇવ પર્વતાઃ ॥

નિકૃત્તૈર્હસ્તિહસ્તૈશ્ચ ચેષ્ટમાનૈરિતસ્તતઃ ।
રરાજ વસુધાઽકીર્ણા વિસર્પદ્ભિરિવોરગૈઃ ॥

ક્ષિપ્તૈઃ કનકચિત્રૈશ્ચ નૃપચ્છત્રૈઃ ક્ષિતિર્બભૌ ।
દ્યૌરિવાદિત્યચન્દ્રાદ્યૈર્ગ્રહૈઃ કીર્ણા યુગક્ષયે ॥

હત પ્રહરતાભીતા વિધ્યત વ્યવકૃન્તત ।
ઇત્યાસીત્તુમુલઃ શબ્દઃ શોણાશ્વસ્ય રથં પ્રતિ ॥

દ્રોણસ્તુ પરમક્રુદ્ધો વાયવ્યાસ્ત્રેણ સંયુગે ।
વ્યધમત્તાન્મહવાયુર્મેઘાનિવ દુરત્યયઃ ॥

તે હન્યમાના દ્રોણેન પાઞ્ચાલાઃ પ્રાદ્રવન્ભયાત્ ।
પશ્યતો ભીમસેનસ્ય પાર્થસ્ય ચ મહાત્મનઃ ॥

તતઃ કિરીટિ ભીમશ્ચ સહસા સન્ન્યવર્તતામ્ ।
મહતા રથવંશેન પરિગૃહ્ય બલં મહત્ ॥

બીભત્સુર્દક્ષિણં વાર્શ્વમુત્તરં તુ વૃકોદરઃ ।
ભારદ્વાજં શરૌઘાભ્યાં મહદ્ભામભ્યવર્ષતામ્ ॥

તૌ તથા સૃઞ્જયાશ્ચૈવ પાઞ્ચાલાશ્ચ મહૌજસઃ ।
અન્વગચ્છન્મહારાજ માત્સ્યૈશ્ચ સહ સોમકૈઃ ॥

તથૈવ તવ પુત્રસ્ય રથોદારાઃ પ્રહારિણઃ ।
મહત્યા સેનયા રાજઞ્જગ્મુર્દ્રોણરથં પ્રતિ ॥

તતઃ સા ભારતી સેના હન્યમાના કિરીટિના ।
તમસા નિદ્રયા ચૈવ પુનરેવ વ્યદીર્યત ॥

દ્રોણેન વાર્યમાણાસ્તે સ્વયં તવ સુતેન ચ ।
નાશક્યન્ત મહારાજ યોધા વારયિતું તદા ॥

સા પાણ્ડુપુત્રસ્ય શરૈર્દીર્યમાણા મહાચમૂઃ ।
તમસા સંવૃતે લોકે વ્યદ્રવત્સર્વતોમુખી ॥

ઉત્સૃજ્ય શતશો વાહાંસ્તત્ર કેચિન્નરાધિપાઃ ।
પ્રાદ્રવન્ત મહારાજ ભયાવિષ્ટાઃ સમન્તતઃ ॥