Mahabharata · Chapter 7.153

tato duryodhano rājā droṇenaivaṃ pracoditaḥ / amarṣavaśamāpanno yuddhāyaiva mano dadhe /
abravīcca tadā karṇaṃ putro duryodhanastava //

paśya kṛṣṇasahāyena pāṇḍavena kirīṭinā /
ācāryavihitaṃ vyūhaṃ bhittvā devaiḥ sudurbhidam //

tava vyāyacchamānasya droṇasya ca mahātmanaḥ /
miṣatāṃ yodhamukhyānāṃ saindhavo vinipātitaḥ //

paśya rādheya pṛthvīśāḥ pṛthivyāṃ pravarā yudhi /
pārthenaikena nihatāḥ siṃhenevetare mṛgāḥ //

mama vyāyacchamānasya samare śatrusūdana /
alpāvaśeṣaṃ sainyaṃ me kṛtaṃ śakrātmajena ha //

kathaṃ vai yudhyamānasya droṇasya yudhi phalgunaḥ /
bhindyātsudurbhidaṃ vyūhaṃ yatamāno'pi saṃyuge //

pratijñāyā gataḥ pāraṃ hatvā saindhavamarjunaḥ //

paśya rādheya pṛthvīśānpṛthivyāṃ pātitānbahūn /
pārthena nihatānsaṅkhye mahendropamavikramān //

anicchataḥ kathaṃ vīra droṇasya yudhi pāṇḍavaḥ /
bhindyātsudurbhidaṃ vyṛhaṃ yatamānasya śupmiṇaḥ //

dayitaḥ phalguno nityamācāryasya mahātmanaḥ /
tato'sya dattavāndvāramayuddhenaiva śatruhan //

abhayaṃ sindhurājāya dattvā droṇaḥ parantapaḥ /
prādātkirīṭine dvāraṃ paśyannirguṇatāṃ mayi //

yadyadāsyadanujñāṃ vai pūrvameva gṛhānprati /
pramthātuṃ sindhurājasya na bhavejjīvitakṣayaḥ //

jayadratho jīvitārthī gacchamāno gṛhānprati /
mayā'nāryeṇa saṃruddho droṇātprāpyābhayaṃ raṇe //

rakṣāmi saindhavaṃ yuddhe nainaṃ prāpsyati phalgunaḥ /
mama sainyavināśāya ruddho vipreṇa saindhavaḥ //

tasya me mandabhāgyasya yatamānasya saṃyuge /
hatāni sarvasainyāni hato rājā jayadrathaḥ //

paśya yodhavarānkarṇa śataśo'tha sahasraśaḥ /
pārthanāmāṅkitairvāṇaiḥ sarve nītā yamakṣayam //

kathamekarathenājau bahūnāṃ naḥ prapaśyatām /
vipannaḥ saindhavo rājā yodhāścaiva sahasraśaḥ //

adya me bhrātaraḥ kṣīṇāścitrasenādayo raṇe /
bhāmasanaṃ samāsādya paśyatāṃ nodurātmanām //
karṇa uvāca /

ācāryaṃ mā vigarhasva śaktyā'sau yudhyate dvijaḥ /
yathābalaṃ yathotsāhaṃ tyaktvā jīvitamātmanaḥ //

yadyenaṃ samatikramya praviṣṭaḥ śvetavāhanaḥ /
nātra sūkṣmo'pi doṣaḥsyādācāryasya kathañcana //

kṛtī dakṣo yuvā śūraḥ kṛtāstro laghuvikramaḥ /
divyāstrayuktamāsthāya rathaṃ vānaralakṣaṇam //

kṛṣṇena ca gṛhītāśvamabhedyakacāvṛtaḥ /
gāṇḍīvamajaraṃ divyaṃ dhanurādāya vīryavān //

pravarṣanniśitānbāṇānbāhudraviṇadarpitaḥ /
yadarjuno'bhyayāddroṇamupapannaṃ hi tasya tat //

ācāryaḥ sthaviro rājañśīghrayāne tathā'kṣamaḥ /
bāhuvyāyāmaceṣṭāyāmaśaktastu narādhipa //

tenaivamabhyatikrāntaḥ śvetāśvaḥ kṛṣṇasārathiḥ /
tasya doṣaṃ na paśyāmi droṇasyānena hetunā //

ajayyānpāṇḍavānmanye droṇonāstravidā mṛdhe /
tathā hyenamatikramya praviṣṭaḥ śvetavāhanaḥ //

satataṃ ceṣṭamānānāṃ nikṛtyā vikrameṇa ca /
daivādiṣṭo'nyathābhāvo na manye vidyate kvacit //

yato no yudhyamānānāṃ paraṃ śaktyā suyodhana /
saindhavo nihato yuddhe daivamatra paraṃ smṛtam //

paraṃ yatnaṃ kurvatāṃ ca tvayā sārdhaṃ raṇājire /
hatvā'smākaṃ pauruṣaṃ vai daivaṃ paścātkaroti naḥ //

daivopasṛṣṭapuruṣo yatkarma kurute kvacit /
kṛtaṃ kṛtaṃ hi tattasyaṭa daivena vinipātyate //

yatkartavyaṃ manuṣyeṇa vyavasāyavatā sadā /
tatkāryamaviśaṅkena siddhirdaive pratiṣṭhitā //

nikṛtyā vañcitāḥ pārthā viṣayogaiśca bhārata /
dagdhā jatugṛhe cāpi dyūtena ca parājitāḥ //

rājanītiṃ samāśritya prahitāścaiva kānanam /
yatnena ca kṛtaṃ tattaddaivena vinipātitam //

yudhyasva yatnamāsthaya daivaṃ kṛtvā nirarthakam /
yatatastava teṣāṃ ca daivaṃ mārgeṇa yāsyati //

na teṣāṃ matipūrvaṃ hi sukṛtaṃ dṛśyate kvacit /
duṣkṛtaṃ tava vā vīra buddhyā hīnaṃ kurūdvaha //

daivaṃ pramāṇaṃ sarvasya sukṛtasyetarasya vā / ananyakarma daivaṃ hi jāgarti svapatāmapi /
tena yukto hi puruṣaḥ kāryākārye niyujyate //

bahūni tava sainyāni yodhāśca bahavastava /
na tathā pāṇḍuputrāṇāmevaṃ yuddhamavartata //

tairalpairbahavo yūyaṃ kṣayaṃ nītāḥ prahāriṇaḥ /
śaṅke daivasya tatkarma pauruṣaṃ yena nāśitam //
sañjaya uvāca /

evaṃ sambhāṣamāṇānāṃ bahu tattajjanādhipa /
pāṇḍavānāmanīkāni samadṛśyanta saṃyuge //

tataḥ pravavṛte yuddhaṃ vyatiṣaktarathadvipam /
tāvakānāṃ paraiḥ sārdhaṃ rājandurmantrite tava //