Mahabharata · Chapter 7.151

saindhave nihate rājanputrastava suyodhanaḥ /
[aśrupūrṇamukho dīno nirutsāho dviṣajjaye //

durmanā niḥśvasanduṣṭo bhagnadaṃṣṭra ivoragaḥ /
āgaskṛtsarvalokasya putraste'rtiṃ parāmagāt //

dṛṣṭvā tatkadanaṃ ghoraṃ svabalasya kṛtaṃ mahat /
jiṣṇunā bhīmasenena sātvatena ca saṃyuge //

sa vivarṇaḥ kṛśo dīno bāṣpaviplutalocanaḥ.] amanyatārjunasamo na yoddhā bhuvi vidyate //

na droṇo na ca rādheyo nāśvatthāmā kṛpo na ca /
pārthasya sammakhe sthātuṃ paryāptā iti māriṣa //

nirjitya hi raṇe pārthaḥ sarvānmama mahārathān /
avadhītsaindhavaṃ saṅkhye na ca kaścidavārayat् //

sarvathā hatamevedaṃ kauravāṇāṃ mahadbalam /
na hyasya vidyate trātā sākṣādapi purandaraḥ //

yamupāśritya saṅgrāme kṛtaḥ śastrasamudyamaḥ /
sa karṇo nirjitaḥ saṅkhye hataścaiva jayadrathaḥ //

paruṣāṇi sabhāmadhye proktavānyo hi pāṇḍavān /
sa karṇo nirjitaḥ saṅkhye saindhavaśca nipātitaḥ //

yasya vīryaṃ samāśritya śamaṃ yācantamacyutam /
tṛṇavattamahaṃ manye sa karṇo nirjito yudhi //

evaṃ klāntamanā rājannupāyādroṇamīkṣitum /
āgaskṛtsarvalokasya putraste bharatarṣabha //

tatastatsarvamācakhyau kurūṇāṃ vaiśasaṃ mahat /
parānvijayataścāpi dhārtarāṣṭrānnimajjataḥ //
duryodhana uvāca /

paśya mūrdhābhiṣiktānāmācārya kadanaṃ mahat /
kṛtvā pramukhataḥ śūraṃ bhīṣmaṃ mama pitāmaham //

taṃ nihatya pralubdho'yaṃ śikhaṇḍī pūrṇamānasaḥ /
pāñcālyaiḥ sahitaḥ sarvaiḥ senāgramabhivartate //

aparaścāpi durdharṣaḥ śiṣyaste savyasācinā /
akṣauhiṇīḥ sapta hatvā hato rājā jayadrathaḥ //

asmadvijayakāmānāṃ suhṛdāmupakāriṇām /
gantā'smi kathamānṛṇyaṃ gatānāṃ yamasādanam //

ye madarthaṃ parīpsante vasudhāṃ vasudhādhipāḥ /
te hitvā vasudhaiśvaryaṃ vasudhāmadhiśerate //

so'haṃ kāpuruṣaḥ ka-tvā mitrāṇāṃ kṣayamīdṛśam /
aśvamedhasahasreṇa pāvituṃ na samutsahe //

mama lubdhasya pāpasya tathā dharmāpacāyinaḥ /
vyāyāmena jigīṣantaḥ prāptā vaivasvatakṣayam //

kathaṃ patitavṛttasya pṛthivī suhṛdāṃ druhaḥ /
vivaraṃ nāśakaddātuṃ mama pārthivasaṃsadi //

yo'haṃ rudhirasiktāṅgaṃ rājñāṃ madhye pitāmaham /
śayānaṃ nāśakaṃ trātuṃ bhīṣmamāyodhane hatam //

taṃ māmanāryapuruṣaṃ mitradruhamadhārmikam /
kiṃ vakṣyati hi durdharṣaḥ sametya paralokajit //

jalasandhaṃ maheṣvāsaṃ paśya sātyakinā hatam /
madarthamudyataṃ śūraṃ prāṇāṃstyaktvā mahāratham //

kāmbhojaṃ nihataṃ dṛṣṭvā tathālambusameva ca /
anyānbahūṃśca suhṛdo jīvitārtho'dya ko mama //

vyāyacchanto hatāḥ śūrā madarthe ye parāṅmukhāḥ /
yatamānāḥ paraṃ śaktyā vijetumahitānmama //

teṣāṃ gatvā'hamānṛṇyamadya śaktyā parantapa /
tarpayiṣyāmi tāneva jalena yamunāmanu //

satyaṃ te pratijānāmi sarvaśastrabhṛtāṃ vara /
iṣṭāpūrtena ca śape vīryeṇa ca sutairapi //

nihatya tānrame sarvānpāñcālānpāṇḍavaiḥ saha / sāntiṃ labdhā'smi teṣāṃ vā raṇe gantā salokatām

so'haṃ tatra gamiṣyāmi yatra te puruṣarṣabhāḥ / hatā madarthe saṅgrāme yudhyamānāḥ kirīṭinā // 5-151-30 na hīdānīṃ sahāyā me parīpsantyanupaskṛtāḥ / śreyo hi pāṇḍūnmanyante na tathāsmānmahābhuja //

svayaṃ hi mṛtyurvihitaḥ satyasandhena saṃyuge /
bhavānupekṣāṃ kurute śiṣyatvādarjunasya hi //

ato vinihatāḥ sarve ye'smajjayacikīrṣavaḥ /
karṇameva tu paśyāmi sampratyasmajjayaiṣiṇam //

yo hi mitramavijñāya yāthātathyena mandadhīḥ /
mitrārthe yojayatyenaṃ tasya so'rtho'vasīdati //

tādṛgrūpaṃ kṛtamidaṃ mama kāryaṃ suhṛttamaiḥ /
mohāllubdhasya pāpasya jihmasya dhanamīhataḥ //

yau me yuddhasya kṛtyasya jihmācāraiḥ samīyatuḥ / hato jayadrathaścaiva saumadattiśca viryavān /
abhīṣāhāḥ śūrasenāḥ śibayo'tha vasātayaḥ //

so'hamadya gamiṣyāmi yatra te puruṣarṣabhāḥ /
hatā madarthe saṅgrāme yudhyamānāḥ kirīṭinā //

na hi me jīvitenārthastānṛte puruṣarṣabhān /
ācāryaḥ pāṇḍuputrāṇāmanujānātu no bhavān //