Mahabharata · Chapter 7.141

tamudyataṃ mahābāhuṃ duḥśāsanarathaṃ prati /
tvaritaṃ tvaraṇīyeṣu dhanañjayajayaiṣiṇam //

trigartānāṃ maheṣvāsāḥ suvarṇavikṛtadhvajāḥ /
senāsamudramāviṣṭamanantaṃ paryavārayan //

athainaṃ rathavaṃśena sarvataḥ sannivārya te /
avākirañcharavrātaiḥ kruddhāḥ paramadhanvinaḥ //

ajayadrājaputrāṃstānbhrājamānānmahāraṇe /
ekaḥ pañcāśataṃ śatrūnsātyakiḥ satyavikramaḥ //

samprāpya bhāratīmadhyaṃ talaghoṣasamākulam /
asiśaktigadāpūrṇamapluvaṃ sāgaraṃ yathā //

athainamanuvṛttāstu trigartāḥ sahitāḥ punaḥ / tīvreṇa rathavaṃśena mahatā paryavārayan /
vikarṣanto'timātrāṇi cāpāni bharatarṣabha //

tatrādbhutamapaśyāma śaineyacaritaṃ raṇe /
pratīcyāṃ diśi taṃ dṛṣṭvā prācyāṃ paśyāmi lāghavāt //

udīcīṃ dakṣiṇāṃ prācīṃ pratīcīṃ vidiśastathā /
punarmadhyagato vīra āhave yuddhadurmadaḥ //

ekaḥ paryacaranraṅge bahudhā sa mahābalaḥ /
nṛtyannivācaracchūro yathā rathaśataṃ tathā //

taddṛṣṭvā caritaṃ tasya siṃhavikrāntagāminaḥ /
trigartāḥ sannyavartanta santaptāḥ svajanaṃ prati //

tamanye śūrasenānāṃ śūrāḥ saṅkhye nyavārayan /
niyacchantaḥ śaravrātairmattaṃ dvipamivāṅkuśaiḥ //

tairvyavāharadāryātmā muhūrtādeva sātyakiḥ /
tataḥ kaliṅgairyuyudhe so'cintyabalavikramaḥ //

tāṃ ca senāmatikramya kaliṅgānāṃ duratyayām /
atha pārthaṃ mahābāhurdhanañjayamupāsadat //

taranniva jale śrānto yathā sthalamupeyivān /
taṃ dṛṣṭvā puruṣavyāghraṃ yuyudhānaḥ samāśvasat //

tamāyāntamabhiprekṣya keśavaḥ pārthamabravīt /
asāvāyāti śaineyastava pārtha padānugaḥ //

eṣa śiṣyaḥ sakhā caiva tava satyaparākramaḥ /
sarvānyodhāṃstṛṇīkṛtya vijigye puruṣarṣabhaḥ //

eṣa kauravayodhānāṃ kṛtvā ghoramupadravam /
tava prāṇaiḥ priyatamaḥ kirīṭinneti sātyakiḥ //

eṣa droṇaṃ tathā bhojaṃ kṛtavarmāṇameva ca /
kadarthīkṛtya viśikhaiḥ phalgunābhyeti sātyakiḥ //

dharmarājapriyānveṣī hatvā yodhānvarānvarān /
śūraścaiva kṛtāstraśca phalgunābhyeti sātyakiḥ //

kṛtvā suduṣkaraṃ karma sainyamadhye mahābalaḥ /
tava darśanamanvicchanpāṇḍavābhyeti sātyakiḥ //

bahūnekarathenājau yodhayitvā mahārathān /
ācāryapramukhānpārtha prayātyeṣa sa sātyakiḥ //

svabāhubalamāśritya vidārya ca varūthinīm /
preṣito dharmarājena pārthaiṣo'bhyeti sātyakiḥ //

priyaḥ śiṣyaśca te pārtha tvayā tulyaparākramaḥ /
vidrāvyaṃ mahatīṃ senāmeṣa hyāyāti sātyakiḥ //

yasya nāsti samo yodhaḥ kauraveṣu kathañcana /
so'yamāyāti kaunteya sātyakiryuddhadurmadaḥ //

kurusainyādvimukto vai siṃho madhyādgavāmiva /
nihatya bahulāḥ senāḥ pārthaiṣo'byeti sātyakiḥ //

eṣa rājasahasrāṇāṃ vaktraiḥ paṅkajasannibhaiḥ /
āstīrya vasudhāṃ pārtha kṣipramāyāti sātyakiḥ //

eṣa duryodhanaṃ jitvā bhrātṛbhiḥ sahitaṃ raṇe /
nihatya jalasandhaṃ ca kṣipramāyāti sātyakiḥ //

rudhiraughavatīṃ kṛtvā nadīṃ śoṇitakardamām /
tṛṇavadvyasya kauravyāneṣa hyāyāti sātyakiḥ //
sañjaya uvāca /

tataḥ prahṛṣṭaḥ kaunteyaḥ keśavaṃ vākyamabravīt /
na me priyaṃ mahābāho yanmāmabhyeti sātyakiḥ //

na hi jānāmi vṛttāntaṃ dharmarājasya keśava /
sātvatena vihīnaḥ sa yadi jīvati vā na vā //

etena hi mahābāho rakṣitavyaḥ sa pārthivaḥ /
tameṣa kathamutsṛjya mama kṛṣṇa padānugaḥ //

rājā droṇāya cotsṛṣṭaḥ saindhavaścānipātitaḥ /
pratyudyāti ca śaineyameṣa bhūriśravā raṇe //

so'yaṃ gurutaro bhāraḥ saindhavārthe samāhitaḥ /
jñātavyaśca hi me rājā rakṣitavyaśca sātyakiḥ //

jayadrathaśca hantavyo lambate ca divākaraḥ /
śrāntaścaiṣa mahābāhuralpaprāṇaśca sāmpratam //

pariśrāntā hayāścāsya hayayantā ca mādhava /
na ca bhūriśravāḥ śrāntaḥ sasahāyaśca keśava //

apīdānīṃ bhavedasya kṣemamasminsamāgame / kaccinna sāgaraṃ tīrtvā sātyakiḥ satyavikramaḥ /
goṣpadaṃ prāpya sīdeta mahaujāḥ śinipuṅgavaḥ //

api kauravamukhyena kṛtāstreṇa mahātmanā /
sametya bhūriśravasā svastimānsātyakirbhavet //

vyatikramamimaṃ manye dharmarājasya keśava /
ācāryādbhayamutsṛjya yaḥ praiṣayata sātyakim //

grahaṇaṃ dharmarājasya khagaḥ śyena ivāmiṣam /
nityamāśaṃsate droṇaḥ kaccitsyātkuśalī nṛpaḥ //