Mahabharata · Chapter 7.132

[svayaṃ śiṣyo maheśasya bhṛgūttamadhanurdharaḥ /
śiṣyatvaṃ prāptavānkarṇastasya tulyo'stravidyayā //

tadviśiṣṭo'pi vā karṇaḥ śiṣyaḥ śiṣyaguṇairyutaḥ / kuntīputreṇa bhīmena nirjitaḥ sa tu līlayā // ]

yasmiñjayāśā mahatī putrāṇāṃ mama sañjaya /
taṃ bhīmādvimukhaṃ dṛṣṭvā kinnu duryodhano'bravīt //

kathaṃ ca yuyudhe bhīmo vīryaślāghī mahābalaḥ //

karṇo vā samare tāta kimakārṣīdataḥ param /
bhīmasenaṃ raṇe dṛṣṭvā jvalantamiva pāvakam //
sañjaya uvāca /

rathamanyaṃ samāsthāya vidhivatkalpitaṃ punaḥ /
abhyayātpāṇḍavaṃ karṇo vātoddhūta ivārṇavaḥ //

kruddhamādhirathiṃ dṛṣṭvā putrāstava viśāmpate /
bhīmasenamamanyanta vaiśvānaramukhe hutam //

cāpaśabdaṃ tataḥ kṛtvā talaśabdaṃ ca bhairavam /
abhyadravata rādheyo bhīmasenarathaṃ prati //

punareva tayo rājanghora āsītsamāgamaḥ /
vaikartanasya śūrasya bhīmasya ca mahātmanaḥ //

saṃrabdhau hi mahābāhū parasparavadhaiṣiṇau /
anyonyabhīkṣāñcakrāte dahantāviva locanaiḥ //

krodharakrekṣaṇau tīvrau niḥśvasantāvivoragau /
śūrāvanyonyamāsādya tatakṣaturarindamau //

vyāghrāviva susaṃrabdhau śyenāviva ca śīghragau /
śarabhāviva saṅkruddhau yuyudhāte parasparam //

tato bhīmaḥ smarankleśānakṣadyūte vane'pi ca /
virāṭanagare caiva duḥkhaṃ prāptamarindamaḥ //

rāṣṭrāṇāṃ sphītaratnānāṃ haraṇaṃ ca tavātmajaiḥ /
satataṃ ca parikleśānsaputreṇa tvayā kṛtān //

dagdhumaicchaśca yaḥ kuntīṃ saputrāṃ tvamanāgasam /
kṛṣṇāyāśca parikleśaṃ sabhāmadhye durātmabhiḥ //

keśapakṣagrahaṃ caiva duḥśāsanakṛtaṃ tathā /
paruṣāṇi ca vākyāni karṇonoktāni bhārata //

patimanyaṃ parīpsasva na santi patayastava /
patitā narake pārthāḥ sarve ṣaṇḍatilopamāḥ //

samakṣaṃ tava kauravya yadūcuḥ kauravāstadā /
dāsībhāvena kṛṣṇāṃ ca bhoktukāmāḥ sutāstava //

yaccāpi tānpravrajataḥ kṛṣṇājinanivāsinaḥ /
paruṣāṇyuktavānkarṇaḥ sabhāyāṃ sannidhau tava //

tṛṇīkṛtya ca yatpārthāṃstava putro vavalga ha /
viṣamasthānsamastho hi saṃrabdho gatacetanaḥ //

bālyātprabhṛti cārighnaḥ svāni duḥkhāni cintayan /
niravidyata dharmātmā jīvitena vṛkodaraḥ //

tato viṣphārya sumahaddhemapṛṣṭhaṃ durāsadam /
cāpaṃ bharataśārdūlastyaktātmā karṇamabhyayāt //

sa sāyakayairjālairbhīmaḥ karṇarathaṃ prati / bhānumadbhiḥ śilādhautairbhānoḥ prācchādayatprabhāṃ

tataḥ prahasyādhirathistūrṇamasyañśitāñśarān /
vyadhamadbhīmasenasya śarajālāni patribhiḥ //

mahāratho mahābāhurmahābāṇairmahābalaḥ /
vivyādhādhirathirbhīmaṃ navabhirniśitaistadā //

sa totrairiva mātaṅgo vāryamāṇaḥ patattribhaḥ /
abhyadhāvadasambhrāntaḥ sūtaputraṃ vṛkodaraḥ //

tamāpatantaṃ vegena rabhasaṃ pāṇḍavarṣabham /
karṇaḥ pratyudyayau yuddhe matto mattamiva dvipam //

tataḥ pradhyāpya jalajaṃ bherīśatasamasvanam /
akṣubhyata balaṃ harṣāduddhūta iva sāgaraḥ //

taduddhūtaṃ balaṃ dṛṣṭvā nāgāśvarathapattimat /
bhīmaḥ karṇaṃ samāsādya cchādayāmāsa sāyakaiḥ //

aśvānṛkṣasavarṇāṃśca haṃsavarṇairhayottamaiḥ /
vyāmiśrayadraṇe karṇaḥ pāṇḍavaṃ chādayañcharaiḥ //

ṛkṣavarṇānhayānkarkairmiśrānmārutaraṃhasaḥ /
nirīkṣya tava putrāṇāṃ hāhākṛtamabhūdbalam //

te hayā bahvaśobhanta miśritā vātaraṃhasaḥ /
sitāsitā mahārāja yathā vyomni valāhakāḥ //

saṃrabdhau krodhatāmrākṣau prekṣya karṇavṛkodarau /
santrastāḥ samakampanta tvadīyānāṃ mahārathāḥ //

yamarāṣṭropamaṃ ghoramāsīdāyodhanaṃ tayoḥ /
durdarśaṃ bharataśreṣṭha pretarājaputraṃ yathā //

samājamiva taccitraṃ prekṣamāṇā mahārathāḥ /
nālakṣayañjayaṃ vyaktamekasyaiva mahāraṇe //

tayoḥ praikṣanta sammardaṃ sannikṛṣṭaṃ mahāstrayoḥ /
tava durmantrite rājansaputrasya viśāmpate //

chādayantau hi śatrughnāvanyonyaṃ sāyakaiḥ śitaiḥ /
śarajālāvṛtaṃ vyoma cakrāte'dbhutavikramau //

tāvanyonyaṃ jighāṃsantau śaraistīkṣṇairmahārathau /
prekṣaṇīyatarāvāstāṃ vṛṣṭimantāvivāmbudau //

suvarṇavikṛtānvāṇānvimuñcantāvarindamau /
bhāsvaraṃ vyoma cakrāte maholkābhiriva prabho //

tābhyāṃ muktāḥ śarā rājangārdhrapatrāścakāśire /
śreṇyaḥ śaradi mattānāṃ sārasanāmivāmbare //

saṃsaktaṃ sūtaputreṇa dṛṣṭvā bhīmamarindamam /
atibhāramamanyetāṃ bhīme kṛṣṇadhanañjayau //

tatrādhirathibhīmābhyāṃ śarairmuktairdṛḍhaṃ hatāḥ /
iṣupātamatikramya peturaśvanaradvipāḥ //

patadbhiḥ patitaiścānyairgatāsubhiranekaśaḥ /
kṛto rājanmahārāja putrāṇāṃ te janakṣayaḥ //

manupyāśvagajānāṃ ca śarīrairgatajīvitaiḥ /
kṣaṇena bhūmiḥ sañjajñe saṃvṛtā bharatarṣabha //