Mahabharata · Chapter 7.118

droṇaṃ sa jitvā puruṣapravīra-- stathaiva hārdikyamukhāṃstvadīyān /
prahasya sūtaṃ vacanaṃ babhāṣe śinipravīraḥ kurupuṅgavāgrya //

nimittamātraṃ vayamadya sūta dagdhā rathāḥ keśavaphalgunābhyām /
hatānnihanmeha nararṣabheṇa vayaṃ sureśātmasamudbhaveta //
sañjaya uvāca /

tamevamuktvā śinipuṅgavastadā mahāmṛdhe so'gryadhanurdharo'rihā /
kiransamantātsahasā śarānbalī samāpatacchayena ivāmiṣāśayā //

taṃ yāntamaśvaiḥ śaśiśaṅkhavarṇai-- rvigāhya sainyaṃ puruṣapravīram /
nāśaknuvanvārayituṃ samantā-- dādityaraśmipratimaṃ rathāgryam //

asahyavikrāntamadīnasatvaṃ sarve gaṇā bhārata ye tvadīyāḥ /
sahasranetrapratimaprabhāvaṃ divīva sūryaṃ jaladavyapāye //

amarṣapūrṇastvaticitrayodhī śarāsanī kāñcanavarmadhārī /
sudarśanaḥ sātyakimāpatantaṃ nyavārayadrājavaraḥ prasahya //

tayorabhūdbhāratasamprahāraḥ sudāruṇastaṃ samatipraśaṃsan /
yodhāstvadīyāśca hi somakāśca vṛtrendrayoryuddhamivāmaraughāḥ //

śaraiḥ sutīkṣṇaiḥ śataśo'bhyavidhya-- tsudarśanaḥ sātvatamukhyamājau /
anāgatāneva tu tānpṛṣatkāṃ-- ściccheda rājañśinipuṅgavo'pi //

tathaiva śakrapratimo'pi sātyakiḥ sudarśane yānkṣipati sma sāyakān /
dvidhā tridhā tānakarotsudarśanaḥ śarottamaiḥ syandanavaryamāsthitaḥ //

tānvīkṣya bāṇānnihatāṃstadānīṃ sudarśanaḥ sātyakibāṇavegaiḥ /
krodhāddidhakṣanniva tigmatejāḥ śarānamuñcattapanīyacitrān //

punaḥ sa bāṇaistribhiragnikalpai-- rākarṇapūrṇairniśitaiḥ supuṅkhaiḥ /
vivyādha dehāvaraṇaṃ vibhidya te sātyakerāviviśuḥ śarīram //

tathaiva tasyāvanipālaputraḥ sandhāya bāṇairaparairjvaladbhiḥ /
ājaghnivāṃstānrajataprakāśāṃ-- ścaturbhiraśvāṃścaturaḥ prasahya //

tathā tu temābhihatastarasvī naptā śinerindrasamānavīryaḥ /
sudarśanasyeṣugaṇaiḥ sutīkṣṇai-- rhayānnihatyāśu nanāda nādam //

athāsya sūtasya śiro nikṛtya bhallena śakrāśanisannibhena /
sudarśanasyāpi śinipravīraḥ kṣureṇa kālānalasannibhena //

sakuṇḍalaṃ pūrṇaśaśiprakāśaṃ bhrājiṣṇu vaktraṃ vicakarta dehāt /
yathā purā vajradharaḥ prasahya balasya saṅkhye'tibalasya rājan //

nihatya taṃ pārthivaputrapautraṃ raṇe yadūnāmṛṣabhastarasvī /
mudā sametaḥ parayā mahātmā rarāja rājansurarājakalpaḥ //

tato yayāvarjunameva vīro nivārya sainyaṃ tava mārgaṇaughaiḥ /
sadaśvayuktena rathena rājam̐-- llokaṃ visismāpayiṣurnṛvīraḥ //

tattasya vismāpayanīyamagrya-- mapūjayanyodhavarāḥ sametāḥ /
pravartamānāniṣugocare'rī-- ndadāha bāṇairhutabhugyathaiva //