Mahabharata · Chapter 7.111

prītiyuktaṃ ca hṛdyaṃ ca mānanīyaṃ ca sarvaśaḥ /
kālayuktaṃ ca citraṃ ca svadhiyā cābhibhāṣitam //

dharmarājasya tadvākyaṃ niśyamya śinipuṅgavaḥ /
sātyakirbharataśreṣṭha pratyuvāca yudhiṣṭhiram //

śrutaṃ te gadato vākyaṃ sarvametanmayā'cyuta /
nyāyayuktaṃ ca satyaṃ ca phalgunārthe yaśaskaram //

evaṃvidhe tathā kāle mādṛśaṃ prekṣya sattama /
vaktumarhasi rājendra yathā pārthaṃ tathaiva mām //

na me dhanañjayasyārthe prāṇā rakṣyāḥ kathañcana /
tvatprayuktaḥ punarahaṃ kiṃ nakuryāṃ mahāhave //

lokatrayaṃ yodhayeyaṃ sadevāsuramānuṣam /
tvatprayukto narendrendra kimpunastānsudurbalān //

suyodhanabalaṃ tvadya yodhayiṣye samantataḥ /
vijeṣye ca raṇe rājansatyametadbravīmi te //

kuśalyahaṃ kuṃśalinaṃ samāsādya dhanañjayam /
hate jayadrathe rājanpunareṣyāmi te'ntikam //

avaśyaṃ tu mayā sarvaṃ vijñāpyastvaṃ narādhipa /
vāsudevasya yadvākyaṃ phalgunasya ca dhīmataḥ //

dṛḍhaṃ tvabhihitaścāhamarjunena punaḥpunaḥ /
madhye sarvasya sainyasya vāsudevasya śṛṇvataḥ //

adya mādhava rājānamapramatto'nupālaya /
āryāṃ yuddhe matiṃ kṛtvā yāvaddhanmi jayadratham //

tvayi cāhaṃ mahābāho pradyumne vā mahārathe /
nṛpaṃ nikṣipya gaccheyaṃ nirapekṣo jayadratham //

jānīṣe hi raṇe droṇaṃ kuruṣu śreṣṭhasammatam /
pratijñā cāpi te nityaṃ śrutā droṇasya mādhava //

grahame dharmarājasya bhāradvājo'pi gṛdhyati /
śaktaścāpi raṇe droṇo nigrahītuṃ yudhiṣṭhiram //

evaṃ tvayi samāghāya dharmarājaṃ narottamam /
ahamadya gamiṣyāmi saindhavasya vadhāya hi //

sa tvamadya raṇe yatto rakṣa mādhava pāṇḍavam /
rakṣeṇe dharmarājasya dhruvo hi vijayo mama //

jayadrathaṃ ca hatvā'haṃ drutameṣyāmi mādhava /
dharmarājaṃ na ceddroṇo nigṛhṇīyādraṇe balāt //

nigṛhīte naraśreṣṭhe bhāradvājena mādhava /
saindhavasya vadho na syānmamāprītistathā bhavet //

evaṅgate naraśreṣṭhe pāṇḍave satyavāditi /
asmākaṃ gamanaṃ vyaktaṃ vanaṃ prati bhavetpunaḥ //

so'yaṃ mama jayo vyaktaṃ vyartha eva bhaviṣyati /
yadi droṇo raṇe kruddho nigṛhṇīyādyudhiṣṭhiram //

sa tvamadya mahābāho priyārthaṃ mama mādhava /
jayārthaṃ ca yaśorthaṃ ca rakṣa rājānamāhave //

sa bhavānmayi nikṣepo nikṣiptaḥ savyasācinā /
bhāradvājādbhayaṃ nityaṃ manyamānena vai prabho //

tasyāpi ca mahābāho nityaṃ paśyāmi saṃyuge /
nānyaṃ hi pratiyoddhāraṃ raukmiṇeyādṛte prabho //

māṃ cāpi manyate yuddhe bhāradvājasya dhīmataḥ / so'haṃ sambhāvanānaṃ caitāmācāryavacanaṃ ca tat /
pṛṣṭhato notsahe kartuṃ tvāṃ vā tyaktuṃ mahīpate //

ācāryo laghuhastatvādabhedyakavacāvṛtaḥ /
upalabhya raṇe krīḍedyathā śakuninā śiśuḥ //

yadi kārṣṇirdhanuṣpāṇiriha syānmakaradhvajaḥ /
tasmai tvāṃ visṛjeyaṃ vai sa tvāṃ rakṣedyathā'rjunaḥ //

kuru tvamātmano guptiṃ kaste goptā gate mayi /
yaḥ pratīyādrame droṇaṃ yāvadgacchāmi pāṇḍavam //

mā ca te bhayamadyāstu rājannarjunasambhavam /
na sa jātu mahābāhurbhāramudyamya sīdati //

ye ca sauvīrakā yodhāstathā saindhavapauravāḥ /
udīcyā dākṣiṇātyāśca ye cānye'pi mahārathāḥ //

ye ca karṇamukhā rājanrathodārāḥ prakīrtitaḥ /
ete'rjunasya kruddhasya kalāṃ nārhanti ṣoḍaśīm //

udyuktāḥ pṛthivīpāla sasurāsuramānuṣāḥ /
sarākṣasagaṇā rājansakinnaramahoragāḥ //

jaṅgamasthāvaraiḥ sārdhaṃ nālaṃ pārthasya saṃyuge /
evaṃ jñātvā mahārāja vyetu te bhīrdhanañjaye //

evaṃ vīrau maheṣvāsau kṛṣṇau satyaparākramau / na tatra karmaṇo vyāpatkathañcidapi vidyate /

daivaṃ kṛtāstratāṃ yogamamarṣaṃ śauryamāhave /
kṛtajñatāṃ dayāṃ caiva bhrātustvamanucintaya //

mayi cāpi sahāye te gacchamāne'rjunaṃ prati /
droṇe citrāstratāṃ sahkhye rājaṃstvamanucintaya //

ācāryo hi bhṛśaṃ rājannigrahe tava gṛdhyati /
pratijñāmātmano rakṣansatyāṃ kartuṃ ca bhārata //

kuruṣvādyātmano guptiṃ kaste goptā gate mayi /
yasyāhaṃ pratyayātpārthaṃ gaccheyaṃ phalgunaṃ prati //

na hyahaṃ tvāṃ mahārāja anikṣipya mahāhave /
kvacidyāsyāmi kauravya satyametadbravīmi te //

na paśyāmi rathaṃ kañcidyaste goptā bhavediha /
śaktaṃ yaṃ manyase rājangoptāraṃ prati pāṇḍava //

etadvicārya bahuśo buddhyā buddhimatāṃ vara /
dṛṣṭvā śreyaḥ paraṃ buddhyā tato rājanpraśādhi mām //
yudhiṣṭhira uvāca /

evametanmahābāho yathā vadasi mādhava /
na tu me śuddhyate bhāvaḥ śvetāśvaṃ prati māriṣa //

kariṣye paramaṃ yatnamātmano rakṣaṇe hyaham /
gaccha tvaṃ samanujñāto yatra yāto dhanañjayaḥ //

ātmasaṃrakṣaṇaṃ saṅkhye gamanaṃ cārjunaṃ prati /
vicāryaitatsvayaṃ buddhyā gamanaṃ tatra rocaye //

sa tvamātiṣṭha yānāya yatra yāto dhanañjayaḥ /
mamāpi rakṣaṇaṃ bhīmaḥ kariṣyati mahābalaḥ //

pārṣataśca sasodaryaḥ pārthivāśca mabāhalāḥ /
draupadeyāśca māṃ tāta rakṣiṣyanti na saṃśayaḥ //

kekayā bhrātaraḥ pañca rākṣasaśca ghaṭotkacaḥ /
virāṭo drupadaścaiva śikhaṇḍī ca mahārathaḥ //

dhṛṣṭaketuśca balavānkuntibhojaśca mātulaḥ / nakulaḥ sahadevaśca pāñcālāḥ sṛñjayāstathā /
ete samāhitāstāta rakṣiṣyanti na saṃśayaḥ //

na droṇaḥ saha sainyena kṛtavarmā ca saṃyuge /
samāsādayituṃ śakto na ca māṃ dharṣayiṣyati //

dhṛṣṭadyumnaśca samare droṇaṃ kruddhaṃ parantapaḥ /
vārayiṣyati vikramya veleva makarālayam //

yatra sthāsyati saṅgrāme pārṣataḥ paravīrahā /
na droṇasya balaṃ tāta kramettatra kathañcana //

eṣa droṇavināśāya samutpanno hutāśanāt /
kavacī sa śarī khaṅgī dhanvī ca varabhūṣaṇaḥ //

eṣa droṇaṃ raṇe kruddhaṃ vārayeta sa vai prabho /
pāñcālaḥ sahitaiḥ sarvaiḥ pāṇḍavānāṃ ca dhanvibhiḥ //

vikrudhaṃ gaccha śaineya mā kārṣīrmayi sambhramam /
dhṛṣṭadyumno raṇe kruddhaṃ droṇamāvārayiṣyati //