Mahabharata · Chapter 6.99

tataḥ śāntanavo bhīṣmo niryayau saha senayā /
vyūhaṃ cāvyūhata mahatsarvatobhadramātmanaḥ //

kṛpaśca kṛtavarmā ca śaibyaścaiva mahārathaḥ /
śakuniḥ saindhavaścaiva kāmbhojaśca sudakṣiṇaḥ //

bhīṣmeṇa sahitāḥ sarve putraiśca tava bhārata /
agrataḥ sarvasainyānāṃ vyūhasya pramukhe sthitāḥ //

droṇo bhūriśravāḥ śalyo bhagadattaśca māriṣa /
dakṣiṇaṃ pakṣamāśritya sthitā vyūhasya daṃśitāḥ //

aśvatthāmā somadattaścāvantyau ca mahārathau /
mahatyā senayā yuktā vāmaṃ pakṣamapālayan //

duryodhano mahārāja trigartaiḥ sarvato vṛtaḥ /
vyūhamadhye sthito rājanpāṇḍavānprati bhārata //

alambuso rathaśreṣṭhaḥ śrutāyuśca mahārathaḥ /
pṛṣṭhataḥ sarvasainyānāṃ sthitau vyūhasya daṃśitau //

evaṃ ca taṃ tadā vyūhaṃ kṛtvā bhārata tāvakāḥ /
sannaddhāḥ samadṛśyanta pratapanta ivāgnayaḥ //

tato yudhiṣṭhiro rājā bhīmasenaśca pāṇḍavaḥ /
nakulaḥ sahadevaśca mādrīputrāvubhāvapi //

agrataḥ sarvasainyānāṃ sthitā vyūhasya daṃśitāḥ /
dhṛṣṭadyumno virāṭaśca sātyakiśca mahārathaḥ //

sthitāḥ sainyena mahatā parānīkavināśanāḥ /
śikhaṇḍī vijayaścaiva rākṣasaśca ghaṭotkacaḥ //

cekitāno mahābāhuḥ kuntibhojaśca vīryavān /
sthitā raṇe mahārāja mahatyā senayā vṛtāḥ //

abhimanyurmaheṣvāso drupadaśca mahābalaḥ /
yuyudhāno maheṣvāso yudhāmanyuśca vīryavān //

kekayā bhrātaraścaiva sthitā yuddhāya daṃśitāḥ /
evaṃ te'pi mahāvyūhaṃ prativyūhya sudurjayam //

pāṇḍavāḥ samare śūrāḥ sthitā yuddhāya daṃśitāḥ /
tāvakāstu raṇe yattāḥ sahasenā narādhipāḥ //

abhyudyayū raṇe pārthānbhīṣmaṃ kṛtvā'grato nṛpa /
tathaiva pāṇḍavā rājanbhīmasenaparogamāḥ //

bhīṣmaṃ yoddhumabhīpsantaḥ sangrāme vijayaiṣiṇaḥ /
kṣvelāḥ kilakilāḥ śaṅkhānkrakacāngoviṣāṇikāḥ //

bherīmṛdaṅgapaṇavānnādayantaśca puṣkarān /
pāṇḍavā abhyavartanta nadanto bhairavānravān //

bherīmṛdgaśaṅkhānāṃ dundubhīnāṃ ca niḥsvanaiḥ /
utkṛṣṭasiṃhanādaiśca valgitaiśca pṛthagvidhaiḥ //

vayaṃ pratinadantastānagacchāma tvarānvitāḥ /
sahasaivābhisankraddhāstadāsīttumulaṃ mahat //

tato'nyonyaṃ pradhāvantaḥ samprahāraṃ pracakrire /
tataḥ śabdena mahatā pracakampe vasundharā //

pakṣiṇaśca mahāghoraṃ vyāharanto vibabhramuḥ /
saprabhaścoditaḥ sūryo niṣprabhaḥ samapadyata //

vavuśca vātāstumulāḥ śaṃsantaḥ sumahadbhayam /
ghorāśca ghoranirhrādāḥ śivāstatra vavāśire //

vedayantyo mahārāja mahadvaiśasamāgatam /
diśaḥ prajvalitā rājanpāṃsuvarṣaṃ papāta ca //

rudhireṇa samunmiśramasthivarṣaṃ papāta ca /
rudatāṃ vāhanānāṃ ca netrebhyaḥ prāpatañjalam //

susruvuśca śakṛnmūtraṃ pradhyāyanto viśāmpate /
antarhitā mahānādāḥ śrūyante bharatarṣabha //

rakṣasāṃ puruṣādānāṃ nadatāṃ bhairavānravān /
sampatantaśca dṛśyante gomāyabalavāyasāḥ //

śvānaśca vividhairnādairbhaṣantastatra māriṣa . jvalitāśca maholkā vai samāhatya divākaram /
nipetuḥ sahasā bhūmau vedayantyo mahadbhayam //

mahāntyanīkāni mahāsamucchraye tatastayoḥ pāṇḍavadhārtarāṣṭrayoḥ /
cakampire śaṅkhamṛdaṅganiḥsvanaiḥ prakampitānīva vanāni vāyunā //

narendranāgāśvasamākulānā- mabhyāyatīnāmaśive muhūrte /
babhūva ghoṣastumulaścamūnāṃ vātoddhutānāmiva sāgarāṇām //