Mahabharata · Chapter 6.97

tato duryodhano rājā śakuniścāpi saubalaḥ /
duḥśāsanaśca putraste sūtaputraśca durjayaḥ //

samāgamya mahārāja mantraṃ cakrurvivakṣitam /
kathaṃ pāṇḍusutāḥ saṅkhye jetavyāḥ sagaṇā iti //

tato duryodhano rājā sarvāṃstānāha mantriṇaḥ /
sūtaputraṃ samābhāṣya saubalaṃ ca mahābalam //

droṇo bhīṣma kṛpaḥ śalyaḥ saumadattiśca saṃyuge /
na pārthānprati bādhante na jāne kinnu kāraṇam //

avadhyamānāste cāpi kṣapayanti balaṃ mama /
so'smi kṣīṇabalaḥ karṇa kṣīṇaśastraśca saṃyuge //

droṇasya pramukhe vīrā hatāste bhrātaro mama /
bhīmasenena rādheya mama caiva ca paśyataḥ //

nikṛtaḥ pāṇḍavaiḥ śūrairavadhyairdaivatairapi /
so'haṃ saṃśayamāpannaḥ prakariṣye kathaṃ raṇam //
sañjaya uvāca /

tamabravīnmahārāja sūtaputro narādhipam /
mā śoca bharataśreṣṭha kariṣye'haṃ priyaṃ tava //

bhīṣmaḥ śāntanavastūrṇamapayātu mahāraṇāt /
nivṛtte yudhi gāṅgeye nyastaśastre ca bhārata //

ahaṃ pārthānhaniṣyāmi sahitānsarvasomakaiḥ /
paśyato yudhi bhīṣmasya śape satyena te nṛpa //

pāṇḍaveṣu dayāṃ nityaṃ sa hi bhīṣmaḥ karoti vai /
aśaktaśca raṇe bhīṣmo jetumetānmahārathān //

abhimānī raṇe bhīṣmo nityaṃ cāpi raṇapriyaḥ /
sa kathaṃ pāṇḍavānyuddhe jeṣyate tāta sangatān //

sa tvaṃ śīghramito gatvā bhīṣmasya śibiraṃ prati /
anumānya guruṃ vṛddhaṃ śastraṃ nyāsaya bhārata //

nyastaśastre tato bhīṣme nihatānpaśya pāṇḍavān /
mayaikena raṇe rājansasuhṛdgaṇabāndhavān //

evamuktastu karṇena putro duryodhanastava /
abravīdbhrātaraṃ tatra duḥśāsanamidaṃ vacaḥ //

anuyātraṃ yathā sarvaṃ sajjībhavati sarvaśaḥ /
duḥśāsana tathā kṣipraṃ sarvamevopapādaya //

evamuktvā tato rājankarṇamāha janeśvaraḥ /
anumānya raṇe bhīṣmameṣo'haṃ dvipadāṃ varam //

āgamiṣye tataḥ kṣipraṃ tvatsakāśamarindama /
apakrānte tato bhīṣme prahariṣyasi saṃyuge //

niṣpapāta tatastūrṇaṃ putrastava viśāmpate /
sahito bhrātṛbhistaistu devairiva śatakratuḥ //

tatastaṃ nṛpaśārdūlaṃ śārdūlasamavikramam /
āropayaddhayaṃ tūrṇaṃ bhrātā duḥśāsanastadā //

aṅgadī baddhamukuṭo hastābharaṇavānnṛpa /
dhārtarāṣṭro mahārāja vibabhau sa pathi vrajan //

bhaṇḍīpuṣpanikāśena tapanīyanibhena ca /
anuliptaḥ parārddhyena candanena sugandhinā //

arajombarasaṃvītaḥ siṃhakhelagatirnṛpa /
śuśubhe vimalārciṣmānnabhasīva divākaraḥ //

taṃ prayāntaṃ naravyāghraṃ bhīṣmasya śibiraṃ prati . anujagmurmaheṣvāsāḥ sarvalokasya dhanvinaḥ /
bhrātaraśca maheṣvāsāstridaśā iva vāsavam //

hayānanye samāruhya gajānanye ca bhārata /
rathānanye naraśreṣṭhaṃ parivavruḥ samantataḥ //

padātayaśca tvaritā nakharaprāsayodhinaḥ / parivavrurmaheṣvāsaṃ dhārtarāṣṭraṃ mahāratham //

āttaśastrāśca suhṛdo rakṣaṇārthaṃ mahīpateḥ /
prādurbabhūvuḥ sahitāḥ śakrasyevāmarā divi //

sa pūjyamānaḥ kurubhiḥ kauravāṇāṃ mahābalaḥ . prayayau sadanaṃ rājā gāṅgeyasya yaśasvinaḥ /
anvīyamānaḥ satataṃ sodaraiḥ parivāritaḥ //

dakṣiṇaṃ dakṣiṇaḥ kāle sambhṛtya svabhujaṃ tadā /
hastihastopamaṃ saumyaṃ sarvaśatrunibarhaṇam //

pragṛhṇannañjalīnnṝṇāmudyatānsarvato diśaḥ /
śuśrāva madhurā vāco nānādeśanivāsinām //

saṃstūyamānaḥ sūtaiśca māgadhaiśca mahāyaśāḥ /
pūjayānaśca tānsarvānsarvalokeśvareśvaraḥ //

pradīpaiḥ kāñcanaistatra gandhatailāvasecitaiḥ /
parivavrurmahārājaṃ prajvaladbhiḥ samantataḥ //

sa taiḥ parivṛto rājā pradīpaiḥ kāñcanairjvalan /
śuśubhe candramāyukto dīptairiva mahāgrahaiḥ //

kañcukoṣṇīṣiṇastatra vetrajharjharapāṇayaḥ /
protsārayantaḥ śanakaistaṃ janaṃ sarvato diśam //

samprāpya tu tato rājā bhīṣmasya sadanaṃ śubham /
avatīrya hayāccāpi bhīṣmaṃ prāpya janeśvaraḥ //

abhivādya tato bhīṣmaṃ niṣaṇṇaḥ paramāsane / kāñcane sarvatobhadre sparddhyāstaraṇasaṃvṛte /
uvāca prāñjalirbhīṣmaṃ bāṣpakaṇṭho'śrulocanaḥ //

tvāṃ vayaṃ hi samāśritya saṃyuge śatrusūdana . utsahema raṇe jetuṃ sendrānapi surāsurān /
kimu pāṇḍusutānvīrānsasuhṛdgaṇabāndhavān //

tasmādarhasi gāṅgeya kṛpāṃ kartuṃ mayi prabho /
jahi pāṇaḍusutānvārānmahendra iva dānavān //

pūrvamuktaṃ mahābāho haniṣyāmi sasomakān /
pāñcālānkekayaiḥ sārdhaṃ karūpāṃśceti bhārata //

tvadvacaḥ satyamevāstu jahi pārthānsamāgatān /
somakāṃśca maheṣvāsānsatyavāgbhava bhārata //

dayayā yadi vā rājandveṣyabhāvānmama prabho /
mandabhāgyatayā vāpi mama rakṣasi pāṇḍavān //

anujānīhi samare karṇamāhavaśobhinam /
sa jeṣyati raṇe pārthānsasuhṛdgaṇabāndhavān //
sañjaya uvāca /

sa evamuktvā nṛpatiḥ putro duryodhanastava /
novāca vacanaṃ kiñcidbhīṣmaṃ satyaparākramam //