Mahabharata · Chapter 6.93

vimukhīkṛtya varsāṃstu tāvakānyudhi rākṣasaḥ /
jighāṃsubharataśreṣṭha duryodhanamupādravat //

tamāpatantaṃ samprekṣya rājānaṃ prati vegitam /
abhyadhāvañjighāṃsantastāvakā yuddhadurmadāḥka //

tālamātrāṇi cāpāni vikarṣanto mahārathāḥ /
tamekamabhyadhāvanta nadantaḥ siṃhasaṅghavat //

athainaṃ śaravarṣeṇa samantātparyavākiran /
parvataṃ vāridhārābhiḥ śaradīva valāhakāḥ //

sa gāḍhaviddho vyathitastotrārdita iva dvipaḥ /
utpapāta tadā'kāśaṃ samantādvainateyavat //

vyanadatsumahānādaṃ jīmūta iva śāradaḥ /
diśaḥ khaṃ vidiśaścaiva nādayanbhairavasvanaḥ //

rākṣasasya tu taṃ śabdaṃ śrutvā rājā yudhiṣṭhiraḥ /
uvāca bharataśreṣṭha bhīmasenamarindamam //

yudhyate rākṣaso nūnaṃ dhārtarāṣṭrairmahārathaiḥ /
yathā'sya śrūyate śabdo nadato bhairavaṃ svanam //

atibhāraṃ ca paśyāmi tasminrākṣasapuṅgave /
pitāmahaśca sankruddhaḥ pāñcālānhantumudyataḥ //

teṣāṃ ca rakṣaṇārthāya yudhyate phalgunaḥ paraiḥ /
etajjñātvā mahābāho kāryadvayamupasthitam //

gaccha rakṣasva haiḍimbaṃ śaṃśayaṃ paramaṃ gatam /
bhrāturvacanamājñāya tvaramāṇo vṛkodaraḥ //

prayayau siṃhanādena trāsayansarvapārthivān /
vegena mahatā rājanparvakāle yathodadhiḥka //

tamanvagātsatyadhṛtiḥ saucittiryuddhadurmadaḥ /
śreṇimānvasudānaśca putraḥ kāśyasya cābhibhūḥ //

abhimanyumukhāścaiva draupadeyā mahārathāḥ /
kṣatradevaśca vikrantaḥ kṣatradharmā tathaiva ca //

anūpādhipatiścaiva nīlaḥ svabalamāsthitaḥ /
mahatā rathavaṃśena haiḍimbaṃ paryavārayan //

kuñcaraiśca sadā mattaiḥ ṣaṭsahasraiḥ prahāribhiḥka /
abhyarakṣanta sahitā rākṣasendraṃ ghaṭotkacam //

siṃhanādena mahatā nemighoṣeṇa caiva ha /
khuraśabdanipātaiśca kampayanto vasundharām //

teṣāmāpatatāṃ śrutvā śabdaṃ taṃ tāvakaṃ balam /
bhīmasenabhayodvignaṃ vivarṇavadanaṃ tathā //

parivṛtya mahārāja parityajya ghaṭotkacam /
tataḥ pravavṛte yuddhanka tatra teṣāṃ mahātmanām //

tāvakānāṃ pareṣāṃ ca sangrāmeṣvanivartinām /
nānārūpāṇi śastrāṇi visṛjanto mahārathāḥ //

anyonyamabhidhāvantaḥ samprahāraṃ pracakrire /
vyatiṣyaktaṃ mahāraudraṃ yuddhaṃ bhīrubhayāvaham //

hayā hayaiḥ samājagmuḥ pādātāśca padātibhiḥ . rathā rathaiḥ samāgacchannāgā nāgaiśca saṃyuge
anyonyaṃ samare rājanprārthayānāḥ samabhyayuḥ //

sahasā cābhavattīvraṃ sannipātanmahadrajaḥ /
gajāśvarathapattīnāṃ pādanemisamuddhatam //

dhūmrāruṇaṃ rajastīvraṃ raṇabhūmiṃ samāvṛṇot /
naiva sve na pare rājansamajānanparasparam //

pitā putraṃ na jānīte putro vā pitaraṃ tathā /
nirmaryāde tathābhūte vaiśase romaharṣaṇe //

śastrāṇāṃ bharataśreṣṭha manuṣyāṇāṃ ca rjatām /
sumahānabhavacchabdaḥ pretānāmiva bhārata //

gajavājimanuṣyāṇāṃ śoṇitānrataraṅgiṇī /
prāvavartata nadī tatra keśaśaivalaśādvalā //

narāṇāṃ caiva kāyebhyaḥ śirasāṃ patatāṃ raṇe /
śuśruve sumahāñchabdaḥ patatāmaśmanāmiva //

viśiraskairmanuṣyaiśca chinnagātraiśca vāraṇaiḥ /
aśvaiḥ sambhinnadehaiśca sankīrṇā'bhūdvasundharā //

nānāvidhāni śastrāṇi visṛjanto mahārathāḥ /
anyonyamabhidhāvantaḥ samprahārārthamudyatāḥ //

hayā hayānsamāsādya preṣitā hayasādibhiḥ /
samāhatya raṇe'nyonyaṃ nipeturgatajīvitāḥ //

narā narānsamāsādya krodharaktekṣaṇā bhṛśam /
urāṃsyurobhiranyonyaṃ samāśliṣya nijaghnire //

preṣitāśca mahāmātrairvāraṇāḥ paravāraṇaiḥ /
abhyaghnanta viṣaṇāgrairvāraṇāneva saṃyuge //

te jātarudhirotpīḍāḥ patākābhiralaṅkṛtāḥ /
saṃsaktāḥ pratyadṛśyanta meghā iva savidyutaḥ //

kecidbhinnā viṣāṇāgrairbhinnakumbhāśca tomaraiḥ /
vinadanto'bhyadhāvanta garjamānā dhanā iva //

keciddhastairdvidhācchinnaiśchinnagātrāstathā'pare /
nipetustumule tasmiṃśchinnapakṣā ivādrayaḥ //

pārśvaistu dāritairanye vāraṇairvaravāraṇāḥ /
mumucuḥ śoṇitaṃ bhūri dhātūniva mahīdharāḥ //

nārācanihatāstvanye tathā viddhāśca tomaraiḥ /
vinadanto'bhyadhāvanta viśṛṅgā iva parvatāḥ //

kecitkrodhasamāviṣṭā madāndhā niravagrahāḥ /
rathānhayānpadātīṃśca mamṛduḥ śataśo raṇe //

tathā hayā hayārohaistāḍitāḥ prāsatomaraiḥ /
tena tenābhyavartanta kurvanto vyākulā diśaḥ //

rathino rathibhiḥ sārdhaṃ kulaputrāstanutyajaḥ /
parāṃ śaktiṃ samāsthāya cakruḥ karmāṇyabhītavat //

svayaṃvara ivāmarde prajahruritaretaram /
prārthayānā yaśo rājansvargaṃ vā yuddhaśālinaḥ //

tasmiṃstathā vartamāne sangrāme romaharṣaṇe /
dhārtarāṣṭraṃ mahatsainyaṃ prayayau vimukhīkṛtam //