Mahabharata · Chapter 6.85

sa tāḍyamānastu śarairdhanañjayaḥ padāhato nāga iva śvasanbalī /
bāṇāṃśca bāṇena mahārathānāṃ ciccheda cāpāni raṇe prasahya //

sañchidya cāpāni ca tāni rājñāṃ teṣāṃ raṇe vīryavatāṃ kṣaṇena /
vivyādha bāṇairyugapanmahātmā niḥśeṣatāṃ teṣvatha manyamānaḥ //

nipeturājau rudhirapradigdhā- ste tāḍitāḥ śakrasutena rājan /
vibhinnagātrāḥ patitottamāṅgā gatāsavaśchinnatanukrakāyāḥ //

mahīṃ gatāḥ parthabalābhibhūtā vicitrarūpā yugapadvineśuḥ /
dṛṣṭvā hatāṃstānyudhi rājaputrāṃ- strigartarājaḥ prayayau rathena //

teṣāṃ rathānāmatha pṛṣṭhagopā dvātriṃśadanye'bhyapatanta pārtham /
tathaiva te taṃ parivārya pārthaṃ vikṛṣya cāpāni mahāravāṇi //

avīvṛṣanbāṇamahaughavṛṣṭyā yathā giriṃ toyadharā jalaughaiḥ /
sampīḍyamānastu śaraughavṛṣṭyā dhanañjayastānyudhi jātaroṣaḥ //

ṣaṣṭyā śaraiḥ saṃyati tailadhautai- rjaghāna tānapyatha pṛṣṭhagopān /
rathāṃśca tāṃstanavajitya saṅkhye dhanañjayaḥ prītamanā yaśasvī //

athātvaradbhīṣmavadhāya jiṣṇu- rbalāni rājansamare nihatya /
trigartarājo nihatānsamīkṣya mahātmanā tānatha bandhuvargān //

raṇe puraskṛtya narādhipāṃstān jagāma pārthaṃ tvarito vadhāya
abhidrutaṃ cāstrabhṛtāṃ variṣṭhaṃ dhanañjayaṃ vīkṣya śikhaṇḍimukhyāḥ //

abhyadyayuste śitaśastrahastā rirakṣiṣanto rathamarjunasya /
pārtho'pi tānāpatataḥ samīkṣya trigartarājñā sahitānnṛvīrāna //

vidhvaṃsayitvā samare dhanuṣmān gāṇḍīvamuktairniśitaiḥ pṛṣatkaiḥ /
bhīṣmaṃ yiyāsuryudhi sandadarśa duryodhanaṃ saindhavādīṃśca rājñaḥ //

saṃvārayiṣṇūnabhivārayitvā muhūrtamāyodhya balena vīraḥ /
utsṛjya rājānamanantavīryo jayadrathādīṃśca nṛpānmahaujāḥ / yayau tato bhīmabalo manasvī gāṅgeyamājau śaracāpapāṇiḥ //

bhīṣmo'pi dṛṣṭvā samare kṛtāstrān sa pāṇḍavānāṃ rathino'bhyudārān /
vihāya sangrāmamukhe dhanañjayaṃ javena pārthaṃ punarājagāma //

yudhiṣṭhiraśca prabalo mahātmā samāyayau tvarito jātakopaḥ /
madrādhipaṃ samabhityajya saṅkhye svabhāgamāptaṃ tamanantakīrtiḥ / sārdhaṃ sa mādrīsutabhīmasenai- rbhīṣmaṃ yayau śāntanavaṃ raṇāya //

taiḥ samprayuktaiḥ sa mahārathāgryai- rgaṅgāsutaḥ samare citrayodhī /
na vivyadhe śāntanavo mahātmā samāgataiḥ pāṇḍusutaiḥ samastaiḥ //

athaitya rājā yudhi satyasandho jayadratho'tyugrabalo manasvī /
ciccheda cāpāni mahārathānāṃ prasahya teṣāṃ dhanuṣā vareṇa //

yudhiṣṭhiraṃ bhīmasenaṃ yamau ca pārthaṃ kṛṣṇaṃ yudhi sañjātakopaḥ /
duryodanaḥ krodhaviṣo mahātmā jaghāna bāṇairanalaprakāśaiḥ //

kṛpeṇa śalyena śalena caiva tathā vibho citrasenena caujau /
viddhāḥ śaraiste'tivivṛddhakopai- rdevā yathā daityagaṇaiḥ sametaiḥ //

chinnāyudhaṃ śāntanavena rājā śikhaṇḍinaṃ prekṣya ca jātakopaḥ /
ajātaśatruḥ samare mahātmā śikhaṇḍinaṃ kruddha uvāca vākyam //

uktvā tathā tvaṃ pituragrato mā- mahaṃ haniṣyāmi mahāvrataṃ tam /
bhīṣmaṃ śaraughairvimalārkavarṇaiḥ satyaṃ vadāmīti kṛtā pratijñā //

tvayā ca naināṃ saphalāṃ karoṣi devavrataṃ yanna nihaṃsi yuddhe /
mithyāpratijño bhava mātra vīra rakṣasva dharmaṃ svakulaṃ yaśaśca //

prekṣasva bhīṣmaṃ yudhi bhīmavegaṃ sarvāṃstapantaṃ mama sainyasaṅghān /
śaraughajālairatitigmavegaiḥ kālaṃ yathā kālakṛtaṃ kṣaṇena //

nikṛttacāpaḥ samare'napekṣaḥ parājitaḥ śāntanavena cājau /
vihāya bandhūnatha sadarāṃśca kva yāsyase nānurūpaṃ tavedam //

dṛṣṭvā hi bhīṣmaṃ tamanantavīryaṃ bhagnaṃ ca sainyaṃ dravamāṇamevam /
bhīto'si nūnaṃ drupadasya putra tathā hi te mukhavarṇo'prahṛṣṭaḥ //

ajñāyamāne ca dhanañjaye tu mahāhāve samprasakte nṛvīre /
kathaṃ hi bhīṣmātprathitaḥ pṛthivyāṃ bhayaṃ tvamadya prakaroṣi vīra //

sa dharmarājasya vaco niśamya 6-85-26brūkṣākṣaraṃ vipralāpānubaddham /
pratyādeśaṃ manyamāno mahātmā pratatvare bhīṣmavadhāya rājan //

tamāpatantaṃ mahatā javena śikhaṇḍinaṃ bhīṣmamabhidravantam /
nivārayāmāsa hi śalya ena- mastreṇa ghoreṇa sudurjayena //

sa cāpi dṛṣṭvā samudīryamāṇa- mastraṃ yugāntāgnisamaprakāśam /
na sammumoha drupadasya putro rājanmahendrapratimaprabhāvaḥ . tasthau ca tatraiva mahādhanuṣmān śaraistadastraṃ pratibādhamānaḥ //

athādade vāruṇamanyadastraṃ śikhaṇḍyatho'graṃ pratighātamasya /
tadastramastreṇa vidāryamāṇaṃ khasthāḥ surā dadṛśuḥ pārthivāśca //

bhīṣmastu rājansamare mahātmā dhanuśca citraṃ dhvajameva cāpi /
chittvā'nadatpāṇḍusutasya vīro yudhiṣṭhirasyājamīḍhasya rājñaḥ //

tataḥ samutsṛjya dhanuḥ sabāṇaṃ yudhiṣṭhiraṃ vīkṣya bhayābhibhūtam /
gadāṃ pragṛhyābhipapāta saṅkhye jayadrathaṃ bhīmasenaḥ padātiḥ //

tamāpatantaṃ sahasā javena jayadrathaḥ sagadaṃ bhīmasenam /
vivyādha ghorairyamadaṇḍakalpaiḥ śitaiḥ śaraiḥ pañcaśaraiḥ samantāt //

acintayitvā sa śarāṃstarasvī vṛkodaraḥ krodhaparītacetāḥ /
jaghāna vāhānsamare samantāt susammatānsindhurājasya saṅkhye //

tato'bhivīkṣyāpratimaprabhāva- stavātmajastvaramāṇo rathena
abhyāyau bhīmasenaṃ nihantuṃ samudyatāstraḥ surarājakalpaḥ //

jayadratho bhagravāhaṃ rathaṃ ta tyaktvā yayau yatra rājā kurūṇām /
bhayena bhīmasya samūḍhacetāḥ sasaubalastatra yuddhasya bhītaḥ //

bhīmo'pyathainaṃ sahasā vinadya pratyudyayau gadayā tarjayānaḥ /
samudyatāṃ tāṃ yamadaṇḍakalpāṃ dṛṣṭvā gadāṃ te kuravaḥ samantāt //

vihāya sarve tava putramugnaṃ

pātaṃ gadāyāḥ parihartukāmāḥ /
apakrāntāstumule sampramarde sudūruṇe bhārata mohanīye //

amūḍhacetāstvatha citraseno mahāgadāmāpatantīṃ nirīkṣya /
rathaṃ samutsṛjya padātirājau pragṛhya khaṅgaṃ vipulaṃ ca carma / avaplutaḥ siṃha uvācalāgrā- jjagāmānyaṃ bhramapa bhūmideśam //

gadāpi sā prāpya rathaṃ sucitraṃ sāśva sasūtaṃ vinihatya saṅkhye /
jagāma bhūmiṃ jvalitā maholka bhraṣṭā'mbarādgāmiva sampatantī //

āścaryabhūtaṃ sumahattvadīyā dṛṣṭvaiva tadbhārata samprahṛṣṭāḥ /
sarve vineduḥ sahitāḥ samantā- tpupūjire tava putrasya śauryam //