Mahabharata · Chapter 6.80

kṣatriyāste mahārāja parasparakṛtāgasaḥ /
jagmuḥ svaśibirāṇyeva rudhireṇa samukṣitāḥ //

viśramya ca yathānyāyaṃ pūjayitvā parasparam /
sannaddhāḥ samadṛśyanta bhūyo yuddhacikīrṣavaḥ //

tatastava suto rājaṃścintayābhipariplutaḥ /
visravacchoṇitāktāṅgaḥ papracchedaṃ pitāmaham //

sainyāni raudrāṇi bhayānakāni vyūḍhāni samyagbahuladhvajāni /
vidārya hatvā ca nipīḍya śūrāṃ- ste pāṇḍavā labdhajayāḥ prahṛṣṭāḥ //

sammohya sarvānyudhi kīrtimanto vyūhaṃ ca taṃ makaraṃ mṛtyukalpam /
praviśya bhīmena raṇe hato'smi ghoraiḥ śarairmṛtyudaṇḍaprakāśaiḥ //

kruddhaṃ tamudvīkṣya bhayena rāja- nsammūrcchito na labhe śāntimadya /
icche prasādāttava satyasandha prāptuṃ jayaṃ pāṇḍaveyāṃśca hantum //

tenaivamuktaḥ prahasanmahātmā duryodhanaṃ manyugataṃ viditvā /
taṃ pratyuvācāvimanā manasvī gaṅgāsutaḥ sastrabhṛtāṃ variṣṭhaḥ //

pareṇa yatnena vigāhya senāṃ sarvātmanā'haṃ tava rājaputra /
icchāmi dātuṃ vijayaṃ sukhaṃ ca na cātmānaṃ chādaye'haṃ tvadarthe //

ete tu raudrā bahavo mahārathā yaśasvinaḥ śūratamāḥ kṛtāstrāḥ /
ye pāṇḍavānāṃ samare sahāyā jitaklamā roṣaviṣaṃ vamanti //

keneha śakyāḥ sahasā vijetuṃ vīryoddhatāḥ kṛtavairāstvayā ca /
ahaṃ hyetānpratiyotsyāmi rāja- nsarvātmanā jīvitaṃ tyajya vīra //

raṇe tavārthāya mahānubhāva na jīvitaṃ rakṣitavyaṃ mamādya /
sarvāṃstavārthāya sadevadaityām̐- llokāndaheyaṃ kimu śatrusenām // 6-80-12atānpāṇḍavānyodhayiṣyāmi rājan priyaṃ ca te sarvamahaṃ kariṣye /
sañjaya uvāca /
śrutvā pituste vacanaṃ pratīto duryodhanaḥ prītamanā babhūva //

sarvāṇi sainyāni tataḥ prahṛṣṭo nirgacchatetyāha nṛpāṃśca sarvān /
tadākṣayā tāni viniryayurdrutaṃ gajāśvapādātarathāyutāni //

praharṣayuktāni tu tāni rāja- nmahānti nānāvidhaśastravanti /
sthitāni nāgāśvapadātimanti virejurājau tava rājanbalāni //

śastrāstravidbhirnaravīrayodhai- radhiṣṭhitāḥ sainyagaṇāstvadīyāḥ /
rathaughapādātagajāśvasaṅghaiḥ prayādbhirājau vidhivatpraṇunnaiḥ //

samuddhataṃ vai taruṇārkavarṇaṃ rajo babhau cchādayatsūryaśmīn /
rejuḥ patākā rathadantisaṃsthā vāteritā bhrāmyamāṇāḥ samantāt //

nānāliṅgaiḥ samare tatra rājan meghairyutā vidyutaḥ khe yathaiva /
vṛndaiḥ sthitāścāpi susamprayuktā- ścakāśire dantigaṇāḥ samantāt //

dhanūṃṣi viṣphārayatāṃ nṛpāṇāṃ babhūva śabdastumulo'tighoraḥ /
vimathyato devamahāsuraughai- ryathārṇavasyādiyuge tadānīm //

tadugranāgaṃ bahurūpavarṇaṃ tavātmajānāṃ samudīrṇakopam /
babhūva sainyaṃ ripusainyahanta- yugāntameghaughanibhaṃ tadānīm //