Mahabharata · Chapter 6.76

evaṃ bahuguṇaṃ sainyamevaṃ bahuvidhaṃ param /
vyūḍhamevaṃ yathāśāstramamoghaṃ caiva sañjaya //

juṣṭamasmākamatyantamabhikāmaṃ ca naḥ sadā /
prahṛṣṭaṃ vyasanopetaṃ purastāddṛṣṭavikramam //

nātivṛddhamabālaṃ ca na kṛśaṃ na ca pīvaram /
laghuvṛttāyataprāyaṃ sāgarākāramavyayam //

āttasannāhaśastraṃ ca bahuśastraparigraham /
asiyuddhe niyuddhe ca gadāyuddhe ca kovidam //

prāsarṣṭitomareṣvājau parigheṣvāyaseṣu ca /
bhiṇḍipāleṣu śaktīṣu musaleṣu ca sarvaśaḥ //

kampaneṣu ca cāpeṣu kaṇapeṣu ca sarvaśaḥ /
kṣeṇaṇīyeṣu citreṣu muṣṭayuddheṣu ca kṣamam //

aparokṣaṃ ca vidyāsu vyāyāme ca kṛtaśramam /
śastragrahaṇavidyāsu sarvāsu pariniṣṭhitam //

ārohe paryavaskande saraṇe sāntaraplute /
samyakpraharaṇe yāne vyapayāne ca kovidam //

nāgāśvarathayāneṣu bahuśaḥ suparīkṣitam /
parīkṣya ca yathānyāyaṃ vetanenopapāditam //

na goṣṭhyā nopakāreṇa na ca bandhunimittataḥ /
na sauhṛdabalairvāpi nākulīnaparigrahaiḥ //

samṛddhajanamāryaṃ ca tuṣṭasambandhibāndhavam /
kṛtopakārabhūyiṣṭhaṃ yaśasvi ca manasvi ca //

svajanaistu narairmukhyairbahuśo dṛṣṭakarmabhiḥ /
lokapālopamaistāta pālitaṃ lokaviśrutam //

bahubhiḥ kṣatriyairguptaṃ pṛthivyāṃ lokasammataiḥ /
asmānabhigataiḥ kāmātsabalaiḥ sapadānugaiḥ //

mahodadhimivāpūrṇamāpagābhiḥ samantataḥ /
apakṣapakṣisankāśai rathairnāgaiśca saṃvṛtam //

nānāyodhajalaṃ bhīmaṃ vāhanormitaraṅgiṇam /
kṣepaṇyasigadāśaktiśaraprāsasāmākulam //

dhvajabhūṣaṇasambādhaṃ ratnapaṭṭasusañcitam /
paridhāvadbhiraśvaiśca vāyuvegavikampitam //

apāramiva garjantaṃ sāgarapratimaṃ mahat /
droṇabhīṣmāsisangaptaṃ guptaṃ ca kṛtavarmaṇā //

kṛpaduḥśāsanābhyāṃ ca jayadrathamukhaistathā /
bhagadattavikarṇābhyāṃ drauṇisaubalabāhlikaiḥ //

guptaṃ pravīrairlaukaiśca sāravadbhirmahātmabhiḥ /
yadahanyata sainyaṃ me diṣṭamatra parāyaṇam //

naitādṛśaṃ samudyogaṃ dṛṣṭavanto hi mānuṣāḥ /
ṛṣayo vā mahābhāgāḥ purāṇā bhuvi sañjaya //

īdṛśo'pi balaughastu saṃyuktaḥ śastrasampadā /
vadhyate yatra sangrāme kimanyadbhāgadheyataḥ //

viparītamidaṃ sarvaṃ pratibhāti hi sañjaya /
yatredṛśaṃ balaṃ ghoraṃ nāvadhīdyudhi pāṇḍavān //

pāṇḍavārthāya niyataṃ devāstatra samāgatāḥ /
yudhyante māmakaṃ sainyaṃ yathā'vadhyata sañjaya //

ukto'pi vidureṇāhaṃ hitaṃ pathyaṃ ca nityaśaḥ /
na ca jagrāha tanmandaḥ putro duryodhano mama //

tathyāṃ manye matiṃ tasya sarvajñasya mahātmanaḥ /
āsīttathā'gataṃ tāta yena dṛṣṭamidaṃ purā //

athavā bhāvyamevaṃ hi sañjayaitena sarvathā /
purā dhātrā yathā diṣṭaṃ tattathā na tadanyathā //