Mahabharata · Chapter 6.51

krauñcaṃ dṛṣṭvā tato vyūhamabhedyaṃ tanayastava /
rakṣamāṇaṃ mahāghoraṃ pārthenāmitatejasā //

ācāryamupasangamya kṛpaṃ śalyaṃ ca pārthiva /
saumadattiṃ vikarṇaṃ ca so'śvatthāmānameva ca //

duḥśākasanādīnbhrātṝṃśca sarvaneva ca bhārata /
anyāṃśca subahūñśūrānyuddhāya samupāgatān //

prāhedaṃ vacanaṃ kāle harṣayaṃstanayastava /
nānāśastrapraharaṇāḥ sarve yuddhaviśāradāḥ //

ekaikaśaḥ samarthā hi yūyaṃ sarve mahārathāḥ /
pāṇḍuputrānraṇe hantuṃ sasainyānkimu saṃhatāḥ //

aparyāptaṃ tadasmākaṃ balaṃ bhīṣmābhirakṣitam /
paryāptamidameteṣāṃ balaṃ bhīmābhirakṣitam //

saṃsthānāḥ śūrasenāśca vetrikāḥ kukurāstathā /
ārocakāstrigartāśca madrakā yavanāstathā //

śatruñjayena sahitāstathā duḥśāsanena ca /
vikarṇena ca vīreṇa tathā nandopanandakaiḥ //

citrasenena sahitāḥ sahitāḥ pāribhadrakaiḥ /
bhīṣmamevābhirakṣantu saha sainyapuraskṛtāḥ //

tato bhīṣmaśca droṇaśca tava putrāśca māriṣa /
avyūhanta mahāvyūhaṃ pāṇḍūnāṃ pratibādhakam //

bhīṣmaḥ sainyena mahatā samanantātparivāritaḥ /
yayau prakarṣanmahatīṃ vāhinīṃ sararāḍiva //

tamanvāyānmaheṣvāso bhāradvājaḥ pratāpavān /
kuntalaiśca daśārṇaiśca māgadhaiśca viśāmpate //

vidamarbhairmekalaiścaiva karṇaprāvaraṇairapi /
sahitāḥ sarvasainyena bhīṣmamahāvaśobhinam //

gāndhārāḥ sindhusauvīrāḥ śibayo'tha vasātayaḥ /
śakuniśca svasainyena bhīṣmamāhavaśobhinam //

tato duryodhano rājā sahitaḥ sarvasodaraiḥ /
aśvātarkervikarṇaiśca tathā cāmbaṣṭhakosalaiḥ //

daradaiśca śakaiścaiva tathā kṣudrakamālavaiḥ /
abhyarakṣata saṃhṛṣṭaḥ saubaleyasya vāhinīm //

bhūriśravāḥ śalaḥ śalyo bhagadattaśca māriṣaḥ /
vindānuvindāvāvantyau vāmaṃ pārśvamapālayan //

saumadattiḥ suśarmā ca kāmbhojaśca sudakṣiṇaḥ /
śrutāyuścācyutāyuśca dakṣiṇaṃ pakṣamāsthitāḥ //

aśvatthāmā kṛpaścaiva kṛtavarmā ca sātvataḥ /
mahatyā senayā sārdhaṃ senāpṛṣṭe vyavasthitāḥ //

pṛṣṭhagopāstu tasyāsannānādeśyā janeśvarāḥ / 6-51-20bketumānvasudānaśca putraḥ kāśyasya cābhibhūḥ //

tataste tāvakāḥ sarve hṛṣṭā yuddhāya bhārata /
dadhmuḥ śaṅkhānmudā yuktāḥ siṃhanādāṃstathonnadan //

teṣāṃ śrutvā tu hṛṣṭānāṃ vṛddhaḥ kurupitāmahaḥ /
siṃhanādaṃ vinadyoccaiḥ śaṅkhaṃ dadhmau pratāpavān //

tataḥ śaṅkhāśca bheryaśca peśyaśca vividhāḥ paraiḥ /
ānakāścābhyahanyanta sa śabdastumulo'bhavat //

tataḥ śvetairhayairyukte mahati syandane sthitau /
pradadhmatuḥ śaṅkhavarau hemaratnapariṣkṛtau //

pāñcajanyaṃ hṛṣīkeśo devadattaṃ dhanañjayaḥ /
pauṇḍraṃ dadhmau mahāśaṅkhaṃ bhīmakarmā vṛkodaraḥ //

antavijayaṃ rājā kuntīputro yudhiṣṭhiraḥ /
nakulaḥ sahadevaśca sughoṣamaṇipuṣpakau //

kāśirājaśca śaibyaśca śikhaṇḍī ca mahārathaḥ /
dhṛṣṭadyumno virāṭaśca sātyakiśca mahārathaḥ //

pāñcālyāśca maheṣvāsā draupadyāḥ pañca cātmajāḥ /
sarve dadhyurmahāśaṅkhānsiṃhanādāṃśca nedire //

sa ghoṣaḥ sumahāṃstatra vīraistaiḥ samudīritaḥ /
nabhaśca pṛthivīṃ caiva tumulo vyanunādayan //

evamete mahārāja prahṛṣṭāḥ kurupāṇḍavāḥ /
punaryuddhāya sañjagmustāpayānāḥ parasparam //