Mahabharata · Chapter 6.46

rājañśatasahasrāṇi tatratatra padātinām /
nirmaryādaṃ prayuddhāni tatte vakṣyāmi bhārata //

na putraḥ pitaraṃ jajñe pitā vā putramaurasam /
na bhrātā bhrātaraṃ tatra svastrīyaṃ na ca mātulaḥ //

na mātulaṃ ca svasrīyo na sakhāyaṃ sakhā tathā /
āviṣṭā iva yudhyante pāṇḍavāḥ kurubhiḥ saha //

rathānīkaṃ naravyāghrāḥ kecidabhyapatanrathaiḥ /
abhajyanta yugaireva yugāni bharatarṣabha //

ratheṣāśca rateṣābhiḥ kūrā rathakūbaraiḥ /
sangataiḥ sahitāḥ kecitparasparajighāṃsavaḥ //

na śekuścalituṃ kecitsannipatya rathā rathaiḥ /
prabhinnāstu mahākāyāḥ sannipatya gajā gajaiḥ //

bahudhā dārayankruddhā viṣāṇairitaretaram /
satoraṇapatākaiśca vāraṇā varavāraṇaiḥ //

abhisṛtya mahārāja vegavadbhirmahāgajaiḥ /
dantairabhihatāstatra cukruśuḥ paramāturāḥ //

abhinītāśca śikṣābhistotrāṅkuśasamāhatāḥ /
aprabhinnāḥ prabhinnānāṃ sammukhābhimukhā yayuḥ //

prabhinnairapi saṃsaktāḥ kecittatra mahāgajāḥ /
krauñcavanninadaṃ kṛtvā dudruvuḥ sarvato diśam //

samyakpraṇītā nāgāśca prabhinnakaraṭāmukhāḥ /
ṛṣitomaranārācairnirviddhā varavāraṇāḥ //

praṇedurbhinnamarmāṇo nipetuśca gatāsavaḥ /
prādravanta diśaḥ kecinnadanto bhairavānravān //

gajānāṃ pādarakṣāstu vyūḍhoraskāḥ prahāriṇaḥ /
ṛṣṭibhiśca dhanurbhiśca vimalaiśca paraśvathaiḥ //

gadābhirmusalaiścaiva bhindipālaiḥ satomaraiḥ . āyasaiḥ parighaiścaiva nistiraṃśairvimalai śitaiḥ /

pragṛhītaiḥ susaṃrabdhā dravamāṇāstatastataḥ /
vyadṛśyanta mahārāja parasparajighāṃsavaḥ //

rājamānāśca nistriṃśāḥ saṃsiktā naraśoṇitaiḥ /
pratyadṛśyanta śūrāṇāmanyonyamabhidhāvatām //

avakṣiptāvadhūtānāmasīnāṃ vīrabāhubhiḥ /
sañjajñe tumulaḥ śabdaḥ patatāṃ paramarmasu //

gadāmusalarugṇānāṃ bhinnānāṃ ca varāsibhiḥ /
dantidantāvabhinnānāṃ mṛditānāṃ ca dantibhiḥ //

tatra tatra naraughāṇāṃ krośatāmitaretaram /
śuśruvurdāruṇā vācaḥ pretānāmiva bhārata //

hayairapi hayārohāścāmarāpīḍadhāribhiḥ /
haṃsairiva mahāvegairanyonyamabhividrutāḥ //

tairvimuktā mahāprāsā jāmbūnadavibhūṣaṇāḥ /
āśugā vimalāstīkṣṇāḥ sampeturbhujagopamāḥ //

aśvairagnyajavaiḥ kecidāplutya mahato rathāt /
śirāṃsyādadire vīrā rathināmaśvasādinaḥ //

bahūnapi hayārohānbhallaiḥ sannataparvabhiḥ /
rathī jaghāna samprāpya bāṇagocaramāgatān //

navameghapratīkāśāścākṣipya turagāngajāḥ /
pādaireva vimṛdganti mattāḥ kanakabhūṣaṇāḥ //

pāṭhyamāneṣu kumbheṣu pārśveṣvapi ca vāraṇāḥ /
prāsairvinihatāḥ kecidvineduḥ paramāturāḥ //

sāśvārohānhayānkāṃścidunmathya varavāraṇāḥ /
sahasā cikṣipustatra sankule bhairave sati //

sāśvārohānviṣāṇāgrairutkṣipya turagāngajāḥ /
rathaughānabhimṛdgantaḥ sadhvajānabhicakramuḥ //

puṃstvādatimadatvācca kecittatra mahāgajāḥ /
sāśvārohānhayāñjaghnuḥ karaiḥ sacaraṇaistathā //

aśvārohaiśca samare hastisādibhireva ca . pratimāneṣu gātreṣu pārśvaṣvabhi ca vāraṇān /
āśugā vimalāstīkṣṇāḥ sampeturbhujagopamāḥ //

narāśvakāyānnirbhidya lauhāni kavacāni ca /
nipeturvimalāḥ śaktyo vīrabāhubhirarpitāḥ //

maholkakāpratimā ghorāstatra tatra viśāmpate /
dvīpicarmāvanaddhaiśca vyāghracarmacchadairapi //

vikośairvimalaiḥ khaṅgairabhijadhnuḥ parānraṇe /
abhiplutamabhikruddhamekapārśvāvadāritam //

vidarśayantaḥ sampetuḥ khaṅgacarmaparaśvathaiḥ /
kecidākṣipya kariṇaḥ sāśvānapi rathānkaraiḥ //

vikarṣanto diśaḥ sarvāḥ sampetuḥ sarvaśabdagāḥ /
śaṅkubhirdāritāḥ kecitsambhinnāśca paraśvathaiḥ //

hastibhirmṛditāḥ kecitkṣuṇṇāścānye turangamaiḥ /
rathaneminikṛttāśca nikṛttāśca paraśvathaiḥ //

vyākrośanta narā rājaṃstatratatra sma bāndhavān /
putrānanye pitṝnanye bhrātṝṃśca saha bandhubhiḥ //

mātulānbhāgineyāṃśca parānapi ca saṃyuge /
vikīrṇāntrāḥ subahavo bhagnasakthāśca bhārata //

bāhubhiścāpare chinnaiḥ pārśveṣu ca vidāritāḥ /
krandantaḥ samadṛśyanta tṛṣitā jīvitepsavaḥ //

tṛṣāparigatāḥ kecidalpasatvā viśāmpate /
bhūmau nipatitāḥ saṅkhye mṛgayāñcakrire jalam //

rudhiraughapariklinnāḥ kliśyamānāśca bhārata /
vyanindanbhṛśamātmānaṃ tava putrāṃśca sangatān //

apare kṣatrikayāḥ śūrāḥ kṛtavairāḥ parasparam . naiva śastraṃ vimuñcanti naiva krandanti māriṣa /
tarjayanti ca saṃhṛṣṭāstatratatra parasparam //

ādaśya daśanaiścāpi krodhātsvaradanacchadam /
bhrukuṭīkuṭilairvakraiḥ prekṣanti ca parasparam //

apare kliśyamānāstu śarārtā vraṇapīḍitāḥ /
niṣkūjāḥ samapadyanta dṛḍhasatvā mahābalāḥ //

anye ca virathāḥ śūrā rathamanyasya saṃyuge / prārthayānā nipatitāḥ sankṣuṇṇā varavāraṇaiḥ /
aśobhanta mahārāja sapuṣpā iva kiṃśukāḥ //

sambabhūvuranīkeṣu bahavo bhairavasvanāḥ /
vartamāne mahābhīme tasminvīravarakṣaye //

nijaghāna pitā putraṃ putraśca pitaraṃ raṇe /
svastrīyo mātulaṃ cāpi svasrīyaṃ cāpi mātulaḥ //

sakhā sakhāyaṃ ca tathā sambandhī bāndhavaṃ tathā /
evaṃ yuyudhire tatra kuravaḥ pāṇḍavaiḥ saha //

vartamāne tathā tasminnirmaryāde bhayānake /
bhīṣmamāsādya pārthānāṃ vāhinī samakampata //

ketunā pañcatāreṇa tālena bhāratarṣabha . rājatena mahābāhurucchritena mahārathe /
babhau bhīṣmastadā rājaṃścandramā iva meruṇā //