Mahabharata · Chapter 6.44

evaṃ vyūḍheṣvanīkeṣu māmakeṣvitareṣu ca /
ke pūrvaṃ prāharaṃstatra kuravaḥka pāṇḍavā nu kim //
sañjaya uvāca /

bhrātṛbhiḥ sahito rājanputro duḥśāsanastava /
bhīṣmaṃ pramukhataḥ kṛtvā prayayau saha senayā //

tathaiva pāṇḍavāḥ sarve bhīmasenapurogamāḥ /
bhīṣmeṇa yuddhamicchantaḥ prayayurhṛṣṭamānasāḥ //

kṣveḍāḥ kilakilāśabdāḥ krakacā goviṣāṇikāḥ /
bherīmṛdaṅgamurajā hayakuñjaraniḥsvanāḥ //

ubhayoḥka senayorhyāsaṃstataste'smānsamādravan /
vayaṃ tānpratirdantastadā'sīttumulaṃ mahat //

mahāntyanīkāni mahāsamucchraye samāgame pāṇḍavadhārtarāṣṭrayoḥ /
cakampire śaṅkhamṛdaṅganiḥsvanaiḥ prakampitānīva vanāni vāyunā //

narendra nāgāśvaratākulānā- mabhyāgatānāmaśive muhūrte /
babhūva ghoṣastumulaścamūnāṃ vātoddhutānāmiva sāgarāṇām //

tasminsamutthite śabde tumule romaharṣaṇe /
bhīmaseno mahābāhuḥ prāṇadadgovṛṣo yathā //

śaṅkhadundubhinirghoṣaṃ vāraṇānāṃ ca bṛṃhitam /
siṃhanādaṃ ca sainyānāṃ bhīsasenaravo'bhyabhūt //

hayānāṃ heṣamāṇānāmanīkeṣu sahasraśaḥ /
sarvānabhyabhavaccabdānbhīmasya nadataḥ svanaḥ //

taṃ śrutvā ninadaṃ tasya sainyāstava vitatrasuḥ /
jīmūtasyeva nadataḥ śakrāśanisamasvanam //

vāhanāni ca sarvāṇi śakṛnmūtraṃ pramusruvuḥ /
śabdena tasya vīrasya siṃhasyevetareka mṛgāḥ //

darśayanghoramātmānaṃ mahābhramiva nādayan /
vibhīṣayaṃstava sutānbhīmasenaḥ samabhyayāt //

tamāyāntaṃ maheṣvāsaṃ sodaryāḥ paryavārayan /
chādayantaḥ śaravrātairmeghā iva divākaram //

duryodhanaśca putraste durmukho duḥsahaḥ śalaḥ /
duḥśāsanaścātirathastathā durmarṣaṇo nṛpaḥ //

viviṃśatiścitraseno vikarṇaśca mahārathaḥ /
purumitro jayo bhojaḥ saumadattiśca vīryavān //

mahācāpāni dhunvanto meghā iva savidyutaḥ /
ādadānāśca nārācānnirmuktāśīviṣopamān //

atha te draupadīputrāḥ saubhadraśca mahārathaḥ /
nakulaḥ sahadevaśca dhṛṣṭadyumnaśca pārṣataḥ //

dhārtarāṣṭrānpratiyayurardayantaḥ śitaiḥ śaraiḥ /
vajrairiva mahāvegaiḥ śikharāṇi dharābhṛtām //

tasminprathamasangrāme bhīmajyātalaniḥsvane /
tāvakānāṃ pareṣāṃ ca nāsītkaścitparāṅmukhaḥ //

lāghavaṃ droṇaśiṣyāṇāmapaśyaṃ bharatarṣabha /
nimittavedhināṃ caiva śarānutsṛjatāṃ bhṛśam //

nopaśāmyati nirghoṣo dhanuṣāṃ kūjatāṃ tathā /
viniśceruḥ śarā dīptājyotīṃṣīva nabhastalāt //

sarve tvanye mahīpālāḥ prekṣakā iva bhārata /
dadṛśurdarśanīyaṃ taṃ bhīmaṃ jñātisamāgamam //

tataste jātasaṃrambhāḥ parasparakṛtāgasaḥ /
anyonyaspardhayā rājanvyāyacchanta mahārathāḥ //

kurupāṇḍavasene te hastyaśvarathasankule /
śuśubhāte raṇe'tīva paṭe citrārpite iva //

tataste pārthivāḥ sarve pragṛhītaśarāsanāḥ /
sahasainyāḥ samāpetuḥ putrasya tava śāsanāt //

yudhiṣṭhireṇa cadiṣṭāḥ pārthivāste sahasraśaḥ /
vinadantaḥ samāpetuḥ putrasya tava vāhinīm //

ubhayoḥ senayostīvraḥ sainyānāṃ sa samāgamaḥ /
antardhīyata cādityaḥ sainyena rajasā vṛtaḥ //

prayuddhānāṃ prabhagnānāṃ punarāvartināmapi /
nātra sveṣāṃ pareṣāṃ vā viśeṣaḥ samadṛśyata //

tasmistu tumule yuddhe vartamāne mahābhaye /
ati sarvāṇyanīkāni pitā te'bhivyarocata //